Advertise on podcast: Plátubarrin

Hetta er tann triðja og eisini best umtókta útgávan hjá svenska rokkbólkinum, Europe. Kend løg eru heitislagið, sum er 'The Final Countdown', 'Carrie', og 'Rock the Night'. Talan er ikki um ein av mongu varðunum á leiðini, tí heitislagið er eitt av stóru eyðkennunum fyri øll fýrsini í rokki. Sambært Bestsellingalbums.com er sølutalið fyri heildarverið 6-7 milliónir eintøk, ella kanska er talið størri, hvat aðrar netsíður vilja vera við. Vit spæla Temaplátuna sum eina fjøruti ára heiðran. Hon hevur almennan útgávudag 26. mei 1986. Sangarin, Joey Tempest, skrivaði einmanna níggju av teimum tíggju sangunum, sum eru við í The Final Countdown heildarverkinum. Í USA rakk útgávan til nr. 8 á albumlistanum, Billboard 200, meðan Europe plátan í 1988, Out of This World, var á amerikanska Top 20. Onga aðrar útgávur enn hesar báðar hevur Europe havt á Top 20 vestan hav. Tær eru tvær av trimum, sum bólkurin hevur givið út hjá Epic Records. Í september 1985 byrjaði manningin upptøkurnar í Zürich, Sveis. Eftir viðmæli frá plátufelagnum, Epic, var amerikanski produsarin Kevin Elson settur at stjórna upptøkunum, sum umframt Sveis fóru fram í Svøríki og í tveimum støðum í USA; Atlanta, Georgia og Berkeley, Kalifornia. Plátubarrin 9. mai 2026 (endabrestur hetta sendiskeiðið)

Hetta er tann fyrsta og eisini best umtókta einstaklingaútgávan hjá abbasangaranum, Agnethu Fältskog, á enskum máli. Talan er um popptónleik og Mike Chapman var framleiðari. Frammanundan hevði Chapman havt stóra undirtøku sum lagskrivari og framleiðari fyri nøvn sum Blondie, Sweet, Smokie, og Suzi Quatro. Ein útbygd 'Wrap Your Arms Around Me' varð endurútgivin á fløgu í 2005 við fimm eykaløgum, harímillum eru báði tann enska og tann spanska útgávan av duettlagnum, 'Never Again', sum Agnetha og Tomas Ledin høvdu sungið inn í 1982; árið fyri temaplátuna. Kend løg á temaplátuni eru heitislagið, "Wrap Your Arms Around Me", og "Can't Shake Loose", "Take Good Care of Your Children", og "The Heat is On", ið verður mett at vera hennara best umtókta í altjóða høpi. Hinvegin var "Can't Shake Loose" á Top 30 í USA og tí kann ein altíð kjakast um handan spurningin. Virkesemið í Abba var steðgað upp árið fyri, seint í 1982 og Agnetha Fältskog royndi eins og hin kvinnuligi abbasangarin, Frida, at fóta sær sum solistur á altjóða pallinum. Aftrat temaplátuni gav Fältskog tvey onnur ensktmælt heildarverk út í fýrsunum; 'Eyes of a Woman' í 1985 og 'I Stand Alone' í 1987. Plátubarrin 2. mai 2026

Talan er um eina av størstu rokkútgávunum í áttatiárunum. Best umtókta lagið, 'Livin' On a Prayer', er millum heimsins best laðaðu rokkvarðar. Annað sera kent lag á 'Slippery When Wet' er 'You Give Love a Bad Name'. Desmond Child, ein av stóru lagskrivarunum í søguni, hjálpti Bon Jovi manningini at gera hittløgini til plátuna. Temaplátan var tann triðja útgávan hjá amerikanska rokkbólkinum, Bon Jovi, og tann fyrsti Billboard eittarin hjá hesum bólki. Higartil er hon seld oftari enn 25 milliónir ferðir. Billboard hevur eisini upplýst, at við ársenda árið eftir í 1987 var hon tann mest selda heildarútgávan av øllum. Tað var fyrstu ferð, at ein harðrokkbólkur hevði havt trý stakløg frá somu útgávu á Top 10 í USA. Eisini var tað fyrstu ferð, at ein hardrokkbólkur hevði havt tvær singleplátur, har tann seinna avsloysti tað fyrru, á ovastu rók á popplistanum fyri stakløg í Amerika. Framvegis er 'Slippery When Wet' tann best umtókta Bon Jovi útgávan. Øll løgini verða spæld í hesum tematátti. Plátubarrin 25. apríl 2026

Tann fjórða og samstundis best umtókta Thomas Helmig útgávan við løgum sum 'Det er mig der står herude og banker på' og 'Nu hvor du har brændt mig af'. Eisini er eitt Gasolin' tøkulag frá 1976 á tikið við, og tað er eisini tað einasta, sum Helmig ikki skrivaði sjálvur til 'Vejen væk'.160.000 eintøk vórðus seld av 'Vejen Væk' og útgávan var tann best umtókta í Danmark um tað mundið. Blaðmaðurin Martin Kongstad skrivaði árið eftir í 1989 í tíðarritinum Gaffa: "Miðskeiðis í áttatiárunum bleiv ein bláur drongur sjónligur í tónleikinum. Í dag lyfta øll hattin fyri honum, sum stigvíst, plátu fyri plátu, vann sær offiserstign millum soldátar Tordenskjolds". Hetta seinasta sipar til afturvendandi somu sangararnar, sum næstan áttu danska popularitesbarometrið í 80'unum. Handa avmarkaða soldátarheimin viðmerkti Helmig soleiðis: "Eg hugsaði, at har innar vil eg fegin sleppa at vera við. Eg sá upp til Peter A.G., Steffen Brandt, og Kim Larsen, Anne Linnet og Lis Sørensen, og eg hevði eina stálstinna sannføring um, at tað fór eg at megna. Tað hevði onki at gera við at drikka vín afturvið laksi, tað, eg havi vunnið, er eitt fantastisk frælsi." Temaplátan frá 1988 gjørdi Thomas Helmig til eitt risastórt navn og fjepparaidol av teimum stóru. Plátubarrin 18. apríl 2026

'Diana' var tann 11. einstaklingaútgávan hjá Dianu Ross. Hon er við sínum øðrumplássi á US Billboard 200 og stórari sølu hennara best umtókta. Eisini vórðu fleiri singleplátuhitt tikin frá henni: 'Upside Down', 'My Old Piano', og 'I'm Coming Out', harav 'Upside Down' var plettskot á US Billboard Hot 100. Átta løg eru á plátuni; fýra á hvørjari síðu. Hetta var tann triðja við 'Dianu' í albumheitinum. 'Diana Ross' vóru útgávur í bæði 1970 og 1976, og so bara 'Diana' her í 1980. Nile Rodgers og Bernard Edwards úr Chic skrivaðu øll løgini til plátuna og løgdu tey eisini til rættis. Albumið 'Diana' kom út hjá Motown Records tann 22. mai í 1980, men Diana Ross broytti sjálv mixingina, uttan at teir báðir áðurnevndu vistu av tí. Tað hendi eftir at plátuvendarin, Frankie Crocker, hevði ávarað Dianu um, at útgávan sum hon lág kundi gera enda á hennara karrieru. Millum annað tí disco hevði rættiliga brádliga fingið ringt orð á seg í USA. Saman við Russ Terrana, einum tøkningi hjá Motown, endavendi hon ljóðsporunum og setti meira ferð á løgini, áðrenn plátan varð givin út. Eisini vóru fleiri drúgvar, instrumentalar disco-passagur tiknar burtur. Framleiðandi lagskrivararnir báðir, Bernard Edwards og Nile Rodgers, mótmæltu handlingini og stevndu síðani. Men tey samstarvaðu aftur seinni, so tað rættaði seg. Poppur, R&B, soul og disco eru stílirnir á hesari best umtóktu LP-útgávu hennara. Plátubarrin 11. apríl 2026

Talan er um ta seinastu Uriah Heep útgávuna við David Byron á forsangi. 'One Way or Another', 'Weep in Silence', og 'Misty Eyes' er mest spældu løgini. Stílistiskt sæð er plátan rættiliga fesjut; alt frá bluesrokki til harmoniløg í misjavnari framleiðslu, men ikki er vist, at tað bara er ringt. Útgávudagur var í mai 1976. Fimti ára útgávdagur er sostatt í mai 2026. Hetta var eisini tann seinna Uriah Heep plátan við John Wetton, bassisti og sangara, ið bleiv enn kendari seinni við bólkinum Asia. Tá teir fóru á konserferð eftir útgávu av 'High and Mighty', vísti tað seg, at alkoholimsan hjá sangaranum, David Byron, hevði tikið valdið á honum. Ken Hensley hevur sagt, at vanliga hevði atferðin verið, at Byron drakk seg fullan eftir eina konsert, men nú drakk hann alsamt og var tí svikaligur á palli. Fyrr hevði tað verið soleiðis, at David Byron raðfesti framførslurnar fremst, men í 1976 hevði fløskan tikið hesa støðu, segði Hensley. Framleiðarin, Gerry Bron, førdi fram, at stór sosial frástøða var komin í millum sangaran og hinar bólkalimirnar. Ja, tá 'High and Mighty' var tøk í juni '76, nærkaðist tónleikaliga náttin hjá David Byron. Skjótt fór Uriah Heep at senda hann á dyr. Tað fór at verða um ein mánaða ella so, í juli. Ein kann metaforiskt sæð siga, at í juni vóru báðir klokkupinnarnir á 12-talinum, ið er midnátt, ella 'Midnight', hvat ein 'High and Mighty' sangur eisini hevur sum heiti. Fleiri viðmerkjarar halda, at sum heildarverk er temaplátan misjøvn, meðani hon stendur seg betri lag fyri lag. Okkurt av løgunum er framúr væl úr hondum greitt. Plátubarrin 4. apríl 2026

Starlight gav í fjør síni tvey fyrstu løg út og í ár er ætlanin at koma við enn fleiri. Tann fyrsta útgávan í framhaldinum í 2026 er rokkballadan 'Dreymaland', sum Niclas Johannesen hevur framleitt og Óli Poulsen ljóðblandað. Við at trýsta á pílin niðanfyri hoyrir tú fyrst aðru lagútgávuna frá í fjør, 'Rótasúpan', síðani samrøðuna við Jóhan Martin Jacobsen, Jákup Hansen, og Fimmboða Lisberg, og at enda tann nýggja sangin frá 28. mars 2026. Bólkurin Starlight er upprunaliga frá 1979 og mannaður við suðuroyingum burturav, harav Sámal Samuelsen býr í Noregi og Kári Lisberg í Danmark. Hinir tríggir búgva í Havn, so ein kann siga, at øll Starlight manningin býr í útlegd, men kortini ber væl til at savnast og taka løg upp saman við Niclasi Johannesen. Fyrra lagið í fjør, 'Knáir gamlir menn', var á Top 10, tá Ársins útvaprshitt 2026 skuldi veljast í samband við Faroese Music Awards (FMA) '26. Um nakrar vikur ætlar Starlight at útgeva tann næsta sangin í røðini, sum vit her í Plátubarrini eisini fara at leggja dent á tá. Plátubarrin 28.3.2026

Frumplátan hjá diskobólkinum Boney M. við løgum sum 'Daddy Cool' og 'Sunny', og føroyska hittinum 'No Woman No Cry'. Hetta fyrsta heildarverkið hjá Boney M., hvørs 50 ára útgávudagur er í 2026, hevði størstu søluna í Spania og Fraklandi, har 300.000 eintøk vórðu seld í hvørjum landi. Sølan á týska heimamarknaðinum var 250.000 útgávueintøk. Í Svøríki fóru 100.000 plátur og kassettubond um søludiskin, hvat roknað út eftir fólkatalinum gevur størstu undirtøkuna av øllum. Í Bretlandi knógvaði 'Take the Heat off Me' akkurát Top 40. 'Daddy Cool' var stóra singleplátuhittið. Tað var plettskot í londum sum Svøríki, Noregi og Belgia, men eisini á stóru plátumarknaðunum í Vesturtýsklandi, Fraklandi, og Spania, meðani tað rakk til nr. 6 á UK Singles Chart. Hinvegin varð onnur singleplátan frá útgávuni, lagið 'Sunny', nr. 3 í Bretlandi. Av stóru londunum var 'Sunny' plettskot í Vesturtýsklandi og Fraklandi. Í Føroyum spældi Útvarp Føroya løg frá sjálvari LP-plátuni. Millum annað hevði tað við sær, at endurinnspælingin hjá Boney M. av Bob Marley sanginum, 'No Woman No Cry', bleiv kend millum manna her á landi. Talan er um europeiskan diskotónleik við góðum ljóði og nógvum fiólum. Týskarin, Frank Farian, átti Boney M., og at hjálpa sær at leggja til rættis hevði hann annan týskan tónleikamann, Stefan Klinkhammer, ið eins og Frank Farian ikki livir meira. Teir dugdu sítt handverk, tí eisini við nútíðar oyrum ljóðar útgávan avbera væl. Eykaløg í sendingini eru: 'Love for Sale' (album: Love for Sale), 'King of the Road' (album: Nightflight to Venus), 'Two of Us' (album: Oceans of Fantasy). Plátubarrin 21. mars 2026

Here I Go Again og Crying in the Rain. Vit hoyra hasi bæði hittini og eisini hini løgini á plátuni, harav annað nógv spælt lag er Rough an' Ready. Ein av tónleikarunum, Bernie Marsden, greiðir KVF frá einum av løgunum. Talan var um Whitesnake svanasangin hjá gittaristunum báðum, Mickey Moody og Bernie Marsden, og bólkaleiðarin, Davdi Coverdale valdi at fara víðari við øðrum manningarlista. Okkara Temapláta, Saints and Sinners, frá 1982 var tað fimta studioalbumið í røðini við útgávum hjá Whitesnake, og tað triðja, ið rakk Top 10 í Bretlandi. Nógv spæld løg eru Here I Go Again, Crying in the Rain, sum við stórari eydnu vórðu endurinnspæld til stóru Amerika- sjálvheitisplátuna í '87, tá John Sykes var komin við á gittarin. Tá var Whitesnake ikki longur eitt hard- og bluesrokkorkestur, men eitt meira hard- og heavyorkestur við nógvum spælingum á MTV, tí John Sykes orkar ikki fyri bluesrokki Here I Go Again hevði størri týdning fyri bólkin, enn ein kanska gevur sær far um. Áðrenn tað lagið fer frá í táttinum, hoyra vit annan av lagskrivarunum, Bernie Marsden, greiða kringvarpsmanninum, Ragnari A. Jacobsen, frá sanginum og hvat hann hevði havt at siga fyri seg. Hetta er eitt brot tikið úr sendingini 'RagnarRokk' tann 6. januar í 2022. Henda Saints and Sinners útgáva frá 1982 var rættiliga nógv Deep Purple. Whitesnake sangarin, David Coverdale, hevði jú eina fortíð í DP og eftir Whitesnake plátuna, Snakebite, var nevniliga annar purplari komin uppí Whitesnake; tangentspælarin John Lord, sum loysti av fyri Peter Solley. Meira Purple: Dave "Duck" Dowle varð longu í 1979 tikin frá trummunum og enn ein ex-Deep Purple tónleikari, Ian Paice, kom í hansara stað. Duck hevði spælt við á teimum tveimum fyrstu studioalbumunum, Trouble í '78 og Lovehunter í '79. Hinvegin varð Saints and Sinners tann seinasta innspælingin hjá Ian Paice við Whitesnake. Sostatt eru tríggir við á Saints and Sinners, sum eisini spældu seinastu sjeytiáraplátuna hjá Deep Purple, Come Taste The Band, frá 1975. Tað gjørdu teir eisini á báðum Whitesnake studioútgávunum frammanundan hesari, Ready an' Willing í '80 og Come And Get It í '81. Plátubarrin 14. mars 2026

Onkuntíð heldur tú teg vera í tónleikaheiminum hjá ABBA, aðrar løtur á ferð við CHESS. Soleiðis er henda Tema- og frumpláta hjá Gemini frá '85, ið systkini Karin og Anders Glenmark sungu. Kendasta lagið er 'Another You, Another Me'. Hesin temaplátutáttur er eisini ein minnissending um Karin Glenmark, sum doyði í oktober 2025. Hon var eina av Chess-sangaranum og saman við bróðrinum, Anders Glenmark, stovnaði hon duettbólkin Gemini, hvørs frum- og sjálvheitisútgáva, 'Gemini', koma árið eftir Chess-plátuna, har Karin hevði leiklutin sum Svetlana, ið sang frá kórinum á konsertum. Tónleikin til Chess skrivaðu Benny Andersson og Björn Ulvaeus, og teir skrivaðu eisini ein fittan part av hesi Temaplátu, sum teir haraftrat framleiddu saman við Anders Glenmark. Tað var soleiðis, at Björn og Benny høvdu einar 20-25 minuttir av tilfari, sum teir ikki fingu nýtt í samband við sangleikin og útgávuna Chess, og sumt av tí vit hoyra frá hesi temaplátu, var nevniliga avlop frá Chess sangleikinum, umframt Abba avlop. Á Gemini systkina-debutini spæla eisini fleiri av gomlu Abba-tónleikarunum við, eitt nú bassgittaristurin, Rutger Gunnarsson, sáli, og Benny Andersson spælir allar tangentarnar. Haraftrat tók upptøkumaðurin hjá Abba, Michael B. Tretow, tvey av løgunum upp. Hetta nú gott 40 ára gamla verk hava onnur enn eg, verturin, lýst sum dapurt, myrkt, við vónloysi og sorblýdni lagt aftrat. Tó eins og hjá Abba kunnu tekstir vera tungir, samstundis sum lagið er lívligt, okkurt dømi um tað er á Gemini. Talan er um eitt fleirstreingjað og minimalistisk ljóðlandskap, hvørs treytir Benny setti við sínum synthezisara. Sangtekstirnir hjá Bjørn fylgja eisini hasum, tó teir harumframt prógva góðu evnini hjá Bjørn Ulvaes sum orðasmiði. Aftrat Ulvaeus og Andersson skrivaðu Ingela Forsman og Anders Glenmark tilfar til útgávuna. Plátubarrin 7. mars 2026

Talan er um triðju og eisini best umtóktu heildarútgávuna, sum John Fogerty hevur givið út sum einstaklingur. Kendastu løgini eru 'The Old Man Down the Road' og 'Rock and Roll Girls'. Harumframt verður heitislagið, 'Centerfield', nógv nýtt í USA, tá baseball dystir verða spældir. Tíggju ár vóru liðin síðani aðru útgávuna hjá Fogerty í 1975 og tí verður 'Centerfield' eisini kallað eitt come-back. Sum album var hon plettskot á Billboard 200, og tvær singleplátur frá albuminum vóru ávíkavist á Top 10 og Top 20 á US Billboard Hot 100 vestan hav. John Fogerty var sangarin og gittarspælarin, sum føroyingar kenna væl frá Creedence Clearwater Revival útgávum í árunum rundanum 1970. Eisini skrivaði hann tey flestu CCR løgini, harav Útvarp Føroya spældi, og onkuntíð spælir enn, løg sum Have You Ever Seen The Rain, Proud Mary, Bad Moon Rising, Who'll Stop The Rain, Travelin' Band, Up Around the Bend, Lodi, As Long as I Can See the Light, og fleiri onnur. Stílistiskt sæð verður tilfarið alment kallað: heartland rokkur, americana, og rock and rollur, heríroknað blues og country. Temaplátan verður bólkað sum rokkur. Í støðum minnir hon um Creedence, men hon er eisini sín egin. Plátubarrin 28. februar 2026

'Into The Gap' var ein av stórsøluplátunum í 80'unum, harav kendasta lagið er 'Hold Me Now'. Í hesum sambandi hoyra vit eisini løg frá øðrum album, sum Thompson Twins gav út í 80'unum og tí er talan er um eitt slag av heildarsending. Bólkasøgan verður søgd og hittløg undan og eftir 'Into The Gap' fara at tóna. Temapláta í Plátubarrini er 'Into the Gap' hjá bretska Thompson Twins bólkinum; eitt av stóru poppfyribrigdunum í áttatiárunum. Tann úgávan er frá 1984 og vit spæla fýra Gap-løg, men fyri at lýsa Thompson Twins sum best, havi eg haraftrat valt at spæla trý løg frá 1985 plátuni, ið nevnist 'Here's To Future Days'. 'Into the Gap' hjá Thompson Twins verður víða mett sum eitt av teimum, um ikki tað fullkomna synth-pop meistaraverkið í áttatiárunum. Tað rakk upp á fyrstaplássið í Bretlandi, við sølu omanfyri fimm milliónir eintøk um allan heimin. Plátan er róst fyri sítt fullkomna popp ljóð, við gitnum hittum sum 'Hold Me Now', 'Doctor! Doctor!' og 'You Take Me Up'. Ummælarar og fjepparar rósa blandingini av fangandi, snildum melodium við fjølbroyttari, kreativari framleiðslu. Plátubarrin 21. februar 2026

'Blackout' er ikki bara ein pláta. 'Loudersound.com' hevur hana sum bestu útgávu bólksins yvirhøvur. Ein grundgeving er, at eftir rættiliga nógv virkin ár, var tað í samband við 'Blackout', at bólkurin fann sítt vælkenda stev. Hetta mentist síðani til ein rættiliga breiðan stíl, ið vit kenna so væl, og tað uttan at rokkurin varð ofraður. Útgávan var á Top 10 á Billboard 200. Plátubarrin 14. februar 2026 (handritið skrivað í 2022)

Av tempo-løgunum, sum eisini komu á singleplátu, er 'Healing Hands' tað kendasta, meðani tað minni kenda, 'Club At The End Of The Street', hevur verið ynskt í Plátubarrini, so heilt ókent er tað ikki. 'Sleeping With The Past' er poppur, harav okkurt lag kann kallast popp-rokkur. Í fýrsunum varð nógvur negativur kritikkur skrivaður um pláturnar hjá Elton John, og tað gjørdi hann firtnan. Sum eitt aftursvar gjørdi hann heildarverkið 'Reg Strikes Back' í 1988. 'Reg' er stytting av dópsnavni hansara, 'Reginald'. Men har var ov lítið krút í aftursvarinum til ummælararnar, so hann vann ikki tann tvírdráttin. Útgávan er heldur ikki ein Elton John klassikari. Tí var tað eitt sindur óvæntað frá Elton, at hann longu árið eftir í 1989 gav okkum hesa flottu temaplátuna, 'Sleeping With The Past'. Kanska var hon byrjanin til 90'ini, tí tey vóru eins og 70'ini eitt sera væleydnað útgávuskeið við løgum, sum hann skrivaði til tekstir hjá Bernie Taupin og Time Rice. Plátubarrin 7. februar 2026

Hesin tung- og harðrokk sjeytiárabólkur úr enska miðlandinum rakk upp í hæddirnar í áttatiárunum, og British Steel var byrjanin. Judast Priest útgávurnar undan henni høvdu selt lítið, men nú kom ferð á. Stakløgini vóru: 'Living After Midnight', 'Breaking the Law', og 'United'. Heitið frá einum av albumumløgunum, Metal Gods, var fest á sangaran, Rob Halford, sum gongur fyri at vera 'Metal God'. Útgávan í 1982, Screaming For Vengeance, er tann mest keypta Judas Priest heildarútgávan. Men 'British Steel' er tann størri klassikarin, nú eftirtíðin hevur talað. Enska blaðið, The Gurardian, lýsir British Steel sum definitiónina uppá heavy metal. Plátubarrin 10. januar 2026