Advertise on podcast: Nuus

Kort-, en selfs blitskursusse is nie net goedkoper nie, maar dikwels beter vir leer en die onmiddellik inspan van nuwe vaardighede. Die Namibiese Kwalifikasie-owerheid het op Mariental gesprek gevoer oor 'n voorgestelde beleidsraamwerk vir mikrokwalifikasies, wat daarop gemik is om kortkursusse te formaliseer en gehalte te verseker. Hardap-goewerneur Riaan McNab sê sulke kursusse kan help om onderwys en opleiding aan te pas by vinnige tegnologiese veranderinge, die groeiende hernubare-energiesektor en nuwe vaardigheidsbehoeftes.

Die beskerming van inheemse sade en gewasse is die sleutel tot die bou van veerkragtige voedselstelsels. Namibië en die SAOG-streek skerp tans werk op om plant-genetiese hulpbronne vir voedselsekerheid en klimaatveerkragtigheid te bewaar. Vera Corry, omgewings- en landboukenner verbonde aan die Namibiese Organiese Vereniging, sê plaaslik aangepaste plantvariëteite kan die land se strawwe klimaatstoestande weerstaan en verskaf beter voeding. Sy het aan Kosmos 94.1 Nuus gesê Namibië moet in gene-banke belê, gemeenskapsaadbanke uitbrei en saaduitruiling tussen gemeenskappe bevorder.

Die DA sê hy sal begin om politieke partye te betrek by koalisiegesprekke om munisipaliteite te bestuur waar geen party 'n volstrekte meerderheid behaal het nie. Die party se federale uitvoerende komitee het besluit om samesprekings te begin ná wat hy as 'n sterk verkiesingsprestasie beskryf. Ashor Sarupen van die DA sê die party het na vore getree as die grootste politieke krag in verskeie munisipaliteite waar geen party 'n algehele meerderheid het nie, dikwels met 'n aansienlike voorsprong bo sy naaste mededinger. Die DA het 'n volstrekte meerderheid in 13 rade, een meer as tevore, maar het vennote nodig in 35 of meer - 13 meer rade as na die 2021-verkiesings.

Julius Malema, leier van die EFF, stel voor sy party moet saam met die ANC, die SAKP en die MK-party werk en 'n koalisie-regering vorm. Malema sê die ANC sal dalk sy president, Cyril Ramaphosa, moet opoffer om die MK-party te akkommodeer as deel van 'n moontlike koalisie-ooreenkoms. Terwyl hy die media by die Onafhanklike Verkiesingskommissie se uitslagsentrum in Midrand, Johannesburg, toegespreek het, het Malema gesê Suid-Afrika staan voor 'n krisis, wat hy aan Ramaphosa se leierskap toeskryf.

‘n Navorsingstegnikus by die ministerie van landbou, Nitu Mataya, is bekommerd oor die uitsluiting van die Zambezi-streek uit die 132 miljoen Namibiese dollar NamiGreen-projek. Die projek streef daarna om voedselsekerheid en klimaatsveerkragtigheid in Namibië te versterk deur akwakultuur (visboerdery) en tuinbou op 'n sirkulêre, volhoubare manier met mekaar te kombineer. Die projek wil ook kwesbare ekosisteme herstel, kweekhuisgasse verminder en die lewensgehalte van sowat 30 000 plaaslike inwoners verbeter. Dit fokus op die Kavango-streke, Omusati, Omaheke en //Kharas.

Ondanks die ANC se swak vertoning by die stembus op baie plekke in Suid-Afrika, bly die party volgens sekretaris-generaal Fikile Mbalula die grootste in die land, met volstrekte oorwinnings in verskeie munisipaliteite tydens die plaaslikeregeringsverkiesings. In 'n toespraak aan die media by die Verkiesingskommissie se Resultatesentrum in Midrand, Johannesburg, het Mbalula gesê die party het met 99 persent van die stemdistrikte reeds verklaar 30,91-persent van die nasionale stemme op hom verenig, . Hy sê die uitslae bewys die ANC se voortgesette teenwoordigheid regoor die land, ondanks die veranderende politieke landskap.

Suid-Afrika se ANC het ’n reuseknou in die munisipale verkiesings gekry, met sy steun wat tot 31% getuimel het. Die Demokratiese Alliansie staan op 24,6% nadat 99,8% van stemdistrikte getel is. Die ANC se steun het sedert 2021 met byna 15 persent getuimel. In 135 uit die 213 munisipale rade het geen party’n volstrekte meerderheid behaal nie. Koalisies gaan dus deurslaggewend wees. Vier rade se uitslae was vroegoggend nog uitstaande. Die Onafhanklike Verkiesingskommissie sal die uitslae vanaand om sesuur formeel aankondig. Wetgewing is in Suid-Afrika onderweg om te verhoed dat koalisiepolitiek rade lamlê en dienslewering benadeel. Professor André Duvenhage, politieke wetenskaplike aan die Noordwes Universiteit op Potchefstroom, het sy indrukke met Kosmos 94.1 gedeel.

Buiten vir Namibiese stemme wat opnuut opgaan vir die dekriminalisering van dagga, is daar ook ondersteuning uit Suid-Afrika vir hierdie wetswysiging. Die nuwe, plaaslike konsepwet was egter nog nie vir die publiek beskikbaar nie. Jeremy Acton, ‘n Suid-Afrikaanse aktivis, het sy mening oor die verwikkelinge in Namibië met Kosmos 94.1 Nuus gedeel.

Stedelike en landelike ontwikkeling-minister James Sankwasa, dreig om munisipale skuld van raadslede se toelaes af te trek indien hulle nie sy opdrag uitvoer om dienste aan wanbetalers af te sny nie. Hy het tydens die burgemeestersforum in Rundu gevra waarom munisipaliteite finansiële probleme aanvoer terwyl miljoene se uitstaande skuld steeds nie ingevorder word nie.

'n Plaaslike projek geniet wêreldwye erkenning omdat dit landelike gemeenskappe in die hart van toerisme plaas. RuralRevive, 'n inisiatief van die Wolwedans-stigting, is tydens die 2026 Wêreldwye Toekennings vir Verantwoordelike Toerisme in Londen aangewys as die goue wenner in die kategorie vir regeneratiewe toerisme. Annely Ickua van RuralRevive sê aan Kosmos 94.1 Nuus dat die toekenning erkenning gee aan die werk om Maltahöhe deur volhoubare landbou te transformeer. Annely Ickua Naweek

Om protokolle vir invoere deur Suid-Afrika uit sy twee buurlande te voltooi, gaan volgens Dr. Frikkie Maré, uitvoerende hoof van die buurland se Rooivleisprodusente-organisasie (RPO), minstens ‘n paar maande neem.

Vir Namibiese veeboere en hul eweknieë in Botswana, gaan die grense na Suid-Afrika ondanks gerugte tot die teendeel nie binnekort oopswaai vir uitvoere nie. Dr. Frikkie Maré, uitvoerende hoof van die buurland se Rooivleisprodusente-organisasie (RPO), het die gerugte Vrydag as ongegronde skinderstories bestempel. Hy verduidelik:

Die organisasie Ganja Users of Namibia verwelkom die kabinet se besluit om die dwelmwet van 1971 met die 2026 Narkotikawetsontwerp te probeer vervang, maar dring aan op die volledige dekriminalisering van persoonlike besit deur volwassenes. Die organisasie se sekretaris-generaal, Borro Ndungula, sê die kriminalisering van individue wat dagga vir persoonlike gebruik besit, skend grondwetlike regte en oorlaai howe. Hy doen 'n beroep op die parlement om eerder 'n gesondheidsgerigte benadering te volg. Hy het met Kosmos 94.1 Nuus gepraat.

Landboukundige Wallie Roux waarsku dat loslopende vee 'n ernstige bedreiging vir Namibië se pogings inhou om bek-en-klouseer onder beheer te bring. Roux sê munisipale skutgeriewe bied slegs 'n tydelike oplossing en beklemtoon dat streng toepassing van veemerking en boere se aanspreeklikheid die enigste langtermynoplossings is. Hy het met Kosmos 94.1 Nuus gepraat.

Die bloed het in Windhoek geloop op die eerste naweek van die maand, met COPPS 94.1 se gemeenskapspolisiëringspatrollie wat na meer as een beweerde aanranding uitgeroep is. In een geval het inwoners blykbaar die reg in eie hande geneem en ‘n verdagte lelik gekarnuffel. Francois Lottering was daar.