Advertise on podcast: Matarspjallið

Í matarspjalli dagsins, í Mannlega þættinum á Rás 1, heyrðum við í Sigurlaugu Margréti, sem er einu sinni sem oftar á faraldsfæti norður í landi. Við veltum því fyrir okkur hvað væri þjóðhátíðarmatur og svo sagði hún frá matreiðslubókinni Lambakjöt, sem hún fann á ferðum sínum fyrir norðan. Bókin er frá 1981 og er í þýðingu Sigrúnar Davíðsdóttur.

Í matarspjalli dagsins í Mannlega þættinum kom Sigurlaug með matreiðslubókina The Monet Cookbook. Sem sagt matur innblásinn af franska málaranum Claude Monet, en hann var víst mikill sælkeri auk þess að vera frábær málari. Hann skyldi eftir sig bækur fullar af uppskriftum sem Sigurlaug sagði okkur frá í þættinum í dag.

Í matarspjalli dagsins í Mannlega þættinum hringdum við í Sigurlaugu Margréti þar sem hún er stödd í borg ljóssins, París, og fengum hana til að segja okkur aðeins til dæmis frá herra Fernand, sem gerir heimsfrægt beouf bourguignon og svo velti hún því fyrir sér hvað Frakkar tala um þegar þeir fara út að borða. Sem sagt franskt matarspjall frá París í dag.

Sigurlaug Margrét fór í rannsóknarleiðangur til Kóngsins Köbenhavn og í matarspjalli dagsins í Mannlega þættinum fengum við að vita hvað hún sá og smakkaði á þar, það voru danskar pylsur, purusteik og krembollur, svo eitthvað sé nefnt.

Í matarspjalli dagsins í Mannlega þættinum skoðuðum við aðeins hvað er boðið upp á á kosningarskrifstofum í aðdraganda kosninga. Við hringdum vestur á Ísafjörð í Guðrúnu S. Matthíasdóttur, eða Gunnu Siggu, en hún er kölluð tertudrottning Vestfjarða. Kosningakaffi, bakkelsi og tertur í matarspjalli dagsins.

Í matarspjalli dagsins töluðum við um vegasjoppur. Framundan er tíminn þar sem fólkið í landinu leggur í ferðalög um þjóðveginn og aðra vegi okkar fallega lands. Og þá þarf auðvitað að stoppa við og við og fylla á bílinn og fá sér í gogginn. Þar koma svokallaðar vegasjoppur sterkar inn, margar landsþekktar, hafa staðið vaktina í áratugi, sumar þó ekki lengur og aðrar jafnvel að koma aftur. Eins og til dæmis Hreðavatnsskáli, þar sem nýir aðilar hafa tekið við rekstrinum. Við hringdum í Brynju Brynjarsdóttur, listakonu og bónda á Hraunsnefi, en hún og Jóhann Harðarson, eiginmaður hennar, hafa tekið að sér að reka Hreðarvatnsskála eftir að dóttir þeirra og tengdasonur keyptu skálann. Við fengum að vita hvað verður á boðstólnum hjá þeim og hvað er framundan á þessum rótgróna stað.

Í matarspjallinu dagsins í Mannlega þættinum veltum við fyrir okkur sakbitinni sælu, þ.e.a.s. hvað fáum við okkur að borða þegar enginn sér til. Við spurðum fólk hér í Efstaleitunu hvað væri þeirra sakbitna sæla og ræðum það svo með Sigurlaugu Margréti, besta vini bragðlaukanna. Það er óhætt að segja að það eru áhugaverðir hlutir sem fólk fær sér í kvöldmat þegar enginn sér.

Halldór Gylfason, föstudagsgestur Mannlega þáttarins, sat áfram með okkur í matarspjalli dagsins með Sigurlaugu Margréti, besta vini bragðlaukanna. Þar sagði Halldór frá sínum uppáhaldsmat, hvernig maður ber sig að við hlaðborð, hvað var í matinn á hans æskuheimili og hvað hann eldar helst.

Þar sem það er síðasti virki dagurinn fyrir páska í dag, einskonar föstudagur, þá fengum við Sigurlaugu Margréti, besta vin bragðlaukanna, til þess að koma í matarspjall í dag í Mannlega þættinum. Þar ræddum við um páskamat og aðallega páskalambið. En einnig kom við sögu föstudagurinn langi og rósmarín.

Hallveig Rúnarsdóttir föstudagsgestur Mannlega þáttarins sat áfram með okkur Sigurlaugu Margréti í Matarspjallinu í dag. Hallveig sagði frá einum af sínum uppáhaldsréttum, confit de canard, eða andalæri elduð upp úr eigin fitu á franska vísu. en þau er hægt að fá víða í verslunum í dag í stórum niðursuðudósum.

Í matarspjallinu í Mannlega þættinum í dag töluðum við um brauðsúpu. Ekki eru allir jafn spenntir fyrir henni, sum okkar elska hana á meðan önnur... jah ekki jafn mikið.

Þó að rigni, þó að blási, ég skemmti mér...segir í textanum góða. Við viljum trúa því, a.m.k. að nú sé mesti snjórinn farinn a.m.k. hér syðra og þótt hann sé kannski ekki að hopa annars staðar á landinu, þá getur maður alveg dregið fyrir og látið eins og vorið sé að koma. Hið innra a.m.k. Í matarspjalli dagsins í Mannlega þættinum töluðum við um smárétti sem sniðugt er að hafa með t.d. freyðivíni, sem forrétti eða við hvaða tilefni sem er.