Advertise on podcast: Ej šī! Parunuosim?

Kaidi bejuši pandemejis blokusefekti saimis i dorba vidē? Kai tī ītekmiejuši myusus i sabīdreibu kūpumā? Kai pasaryupeit par sevi i par leidzvylvākim, kab nuokušīs gods byutu krītni lobuoks par aizejūšū? Sarunā pīsadaleja Lauma Žubule, organizaceju psiholoģe i supervizore, Inga Zeltiņa-Ušpele - školuotuoja, sabīdriski aktiva persona, i, prūtams, Leila Rasima, jaunīšu mentore i vīna nu podkasta iniciatorem i moderatorem. Podkāstu atbolsta Aktīvo iedzīvotāju fonds projekta "Klausies. Saproti. Rīkojies." aktivitašu ītvarūs.

Itymā reizē myusim pīsavīnoja sirdī jūprūjom latgalīts, bet nu filosofejis pietnīks i pasnīdziejs Cīrihis universitatē - Artūrs Logins. Parunuom par dažaidom dilemmom, ar kū sasaskoras na tikai zinuotnīki, bet arī mes poši ikdīnā, pīmāram, par "trolley dilemma". Pīsaskuoram aktualom Twitter diskusejom, kas labi sasasauc ar dilemmu tematiku.

Itymā reizē Leila un Aija tiksīs ar Mairitu Lūsi, un vysys kūpā raudzēsim saprast, cik zaļi dzeivojom myusu zaļajā, skaistajā Latgolā. Mairitu gribēm aicynuot i ar jū pacelt zaļuos temys jau seņ - jei ir latgalīte, kura ir aktiva Zero Waste Latvija bīdre, kai ari Atkrytumu apsaimnīkuošonys dorba grupys vadeituoja Reigys dūmē. Mairita rauga padarēt vīgluoku atkrytumu naradeišonu un šķiruošonu. Runuojam par tū, kai myusim veicās ar atkrytumim, par Zero Waste i minimālismu, par tū, voi myusim ir juozajyutās vaineigim, ka našķirojom atkrytmus kai nuokās voi ka pierkom daudzi produktu plastmasys īpokuojumūs.  Atbolsta Aktīvo iedzīvotāju fonds.

Vieleišonys garom i jau pratiski aizamiersušs. Prīcej šmuka vosora, tiuleņ Leigū - dzeive ir skaista! Un dzeive ir krītni skaistuoka, kod izavielīs tū baudēt, darēt sovys dzelis, naīspringt iz probemom i reizem pat pīviert acs iz vysaidom nataisneibom. Dzeivojom tok viņ vīnreiz un vysys pasauļa suopis naizsuopeisi. Un bīži viņ myusim arī līkās - kū tod es tī taids vīns varu izdarēt? Kū muns vīns bolss maina? Vieleišonys paruodē, ka koč kū maina gon, i na moz. Kotrs, kurš aizguoja nūbolstuot, tū izdarē na viņa par sevi, bet par vēl 2 cylvākim. Vīns par trejim - gondreiž kai “Treis musketīrūs”! Bet voi tīm 2, kas nabeja vielēt, vyspuor var kū puormest? Kurš ir aita - tys, kurš īt bolsuot i, pīmāram, vāluok atskuorš, ka izdariejs pavysam aplomu izvieli, voi tys, kurš palīk sātā i nabolsoj nimoz? Cik sūļi nu demokratejis leidz autoritārismam? Voi tei ir eista demokrateja, ja 66% cylvāku ļaun vysu izlemt cytim i pat naaizīt iz vieleišonom? Voi varbyut tei ir normāla demokratejis sastuovdaļa - izavielēt naizavielēt? Kai nuookās, ka gon Latvejā, gon pasaulī demokrateja jūprūjom ir tik trausla i apdraudeita? Voi obligatu vieleišonu īvīšona byutu demokratiska? Voi varbyut kaidys bolvys, lotereja voi samoksa par bolsuošonu byutu loba ideja? Kas ir tys, kū varom reali darēt lokāli pi seva, Latgolā, lai styprynuotu myusu breiveibu i demokrateju? 

 Itī i vēl daudzi cyti nūpītni i na cik nūpītni vaicuojumi pyrmūdiņ 20:00 Facebook tīšraidē. Itymā reizē Leilai i Aijai pīsavīnuos Inga Zeltiņa-Ušpele. Inga ir sociali aktiva rēzeknīte, kura struoduojusi Eiropas Komisejā Luksemburgā, bet nu jau laiceņu atsagrīzuse atpakaļ dzymtajā Latgolā. Atbolsta Aktīvo iedzīvotāju fonds.

2021.goda pyrmais mieness ir cauri i skaidrs - daudzys apsajimšonuos izkūpiejušs gaisā kai Zīmyssvātku snīgs! Par laimi, uzsnyga jauns! Itymā reizē podkāstā parunuosim par tū, voi apsajimšinuos vyspuor ir pozitīva vai na cik pozitīva līta, par kū dažim saīt, bet dažim nasaīt sasnīgt izvyrzātūs mierķus i par tū, kai myusu apsajimšonuos ītekmej sabīdreibu i cytus cylvākus myusim apleik. Sarunā pīsadola: Māris Resnis - "meža koučs", apmuoceibu i pīdzeivuojumu projektu vadeituojs, Maija Hartmane - Riezeknis nūvoda pošvaļdeibys Izgleiteibys-uzņiemiejdarbeibys kontaktpunkta specialiste, Leila Rasima - podkāsta vadeituoja & jaunīšu mentore projektā "Proti un dari!" Podkāstu atbolsta Aktīvo Iedzīvotāju Fonds.

Dorbs - tema, par kuru varātu runuot daudzi. Parunuom par tū, kai mainuos uztvere par tū, kas ir dorbs, par "b******t jobs", par "Adugs" skandalu i "Svetlanom". Facebook live sarunā pīsadaleja Aija Mežale, Leila Rasima, Vineta Vilcāne i Daiga Laizāne jeb DJ Deila Muse. 

Itymā reizē podkāsts "Ej šī! Parunuosim?" pīsavierš taidai myužeigai temai kai laime. Kaida ir laimis cena? Kas paleidz voi tīši ūtraiži - līdz myusim byut patīsi laimeigim? Voi depreseja ir īildzs nūmuokts nūskaņuojums voi slynkums voi tūmār koč kas cyts? Kaida lūma laimē ir montom i minimālismam? Voi Latgola var kļyut par laimis zemi - i kai? Sarunā pīsadola cylvāki, kas par itū temu dzeivī varbyut dūmoj nadaudz vaira kai cyti, a, mož i nā - Betija Elīza Lāce, Raimonds Platacis i sarunu moderej Leila Rasima & Aija Mežale.

Latgalīši pasaulī. Leluo emigrāceja. Pādejais lidūstā izslādz guni! Itymā reizī saruna par tū, kaida dzeive cytur, i kaidu Latgolu grybātu redzēt ourzemu pīredzi pīsasmālušī. Sarunai pīsaslēgs Juoņs Dreļs nu Kolumbejis, Raivis Bondars nu Īrejis, Aija Mežale nu Vuocejis i Leila Rasima - itūreiz nu Francejis. Byus gona jautri i interesanti!

Sasatykomēs jau ūtrajā podkāstā  "Ej šī! Parunuosim?" iz sarunu Facebook live. Par sīvīšu i veirīšu tīseibom, par dzymumu lūmom, par sīvišķeibu i veirišķeibu, par vīnleidzeibu, par tū, voi feministis patīšom īneist veirīšus, par bārnu (meitiņu) i sīvīšu seksualizeišonu, par Rebeku Kohu, Ghetto Games, Uģi Kuģi i daudzi kū cytu. Raudzejom iz ituom temom pasavērt Latgolys kontekstā, kai ari na viņ nu sīvīšu skotupunkta. Itūreiz sasarunuoja Leila Rasima, Helēna Viļuma un Kaspars Strods.

Ir kluot myusu pats pyrmīs podkāsts - kūpā ar Dāvi Gasuli. Jis ir arhitekts i pa pusei kuorsovīts. Runuosim par Kuorsovys automozguotuvem, Riezeknis LIDL, Reigys koncertzalu i Marsa parku. Par vidi, kurā dzievojom i kurā grybātu dzeivuot. Par tū, kas vajadzeigs laimei.

"Ej šī! Parunuosim?“ ir vīta sarunai - breivai i vīnkuoršai, taidai, kur dreikst pīsadalēt "parostī miersteigī" i runuot par temom, par kurom parosti runoj tikai "namiersteigī". :) Mes - Leila i Aija - asom divys latgalītis, i myusim tryukst podkāsta nu šenis, na uorzemem voi Reigys. Tod nu izdūmuom taisēt pošys! Runuosim par vysdažaiduokajom temom i aicynojom īsasaistēt arī tevi - ar komentārim, ar īrūsynuojumim temom & gostim (vairuok par tū losi Facebook: https://www.facebook.com/groups/293414518452052/). Ej šī! Prīcuosimēs tevi satikt! Un, prūtams - like, share & subscribe! 😊