Werben im Podcast: Birreweich

Sit 6 Mönät händer nüt meh vo eus ghört und jetzt simmer zrugg mitere ganz guete Usred. De Ismet verzellt, wie er sich selber gfunde hät in Australie und dass s lebe ohni Social Media besser isch. Druffolgend prahlt de Petar mitem iPhone 13 woruf denn e hitzigi Fragerundi zstand chunt wos drum gaht, ob d Handyproduktion moralisch akzeptiert werde dörf oder nöd. Zum Schluss chömemer, wie au immer, zude Diskussion über verschiedeni Näme, erchläred wie d Tamile ihre Nachname bechömed und de Yves macht publik, wie er sis Chind wür taufe. 

Am Afang vo dere Episode erchlärt eus de Ismet, was er und Madonna gmeinsam hend und wieso er jetzt sit neustem Yoga am Morge macht. Ahschlüssend chömemer uf e Site zspreche, womer bi sexueller Belästigung über s Internet chan automatisch Ahzeigene erstelle. De Yves und de Petar verzelled denn vo Stories wo sie selber mitbecho hend, wie gwüssi Manne sache gmacht hend, womer nöd macht und versueched s d "Awareness" zwecke. Mer schweifed denn is Thema "üble Nachrede" und sind schockiert, was sich alles im Internet diesbezüglich organisiere laht. Ahschlüssend wird no über lüt gmotzt, wo LinkedIn missbruchet. 

Ide hüttige Episode verzellemer vo eusne Erfahrige imene Operationssaal und wie es isch, betäubt zsi, springed aber denn rasch zum Thema behaarti Füess und ziehnd Connection vo behaarte Füess und de altbekannte Ugg Boots wo viel Fraue im Winter ahhänd. Ahschlüssend denkemer ah eusi Primarschuel zrugg, argumentiered wer de schönst Schuelthek gha het und de Ismet erchlärt wie sin Pausekiosk funktioniert het. Am Endi vode Episode chömemer zum Schluss, dass mir eus meh Kompliment sölled verteile und somit ghöremer es Gständnis vom Ismet. 

Hüt träumemer vo eusere Million und überlegged, was mer würed mache, wennmer im Lotto würed günne. Mir erchläred fasch scho wie profis, uf was mir wert legged und wie mer passivs Ihkomme generiert. Ahschlüssend chömed Tipps fürs Läbe (während Coronazite) und wie mer eusi Motivation holt. Mer versueched de Ismet z motiviere sin Arsch z bewege. Am Schluss chömemer, wie au immer, zum Thema Chatzene und de Ismet het e vision vonere Paarig vom Kater vom Petar und de Chatz vom Yves. Wie das wohl wür usgseh. 

Ide hüttige Episode erchlärt eus de Yves, wieso Babies eigentli Profi-Taucher sind und spezielli Skills hend, wird aber denn dur hupendi Tamil Tiger Ahänger unterbroche. Ahschlüssend git eus de Ismet en Ihblick id Beziehig vo ihm und em Jeff Bezos. Mer kritisieret Amazon und vergliches mit andere Webshops. Zum Schluss chömemer no zum Thema Obdachlosigkeit und Drogeabhängigkeit. 

Nach de zweiwöchige Pause (ufgrund vo eusne Semesterprüefige) chömemer wieder zrugg mit ere Folg, womer afängliche über Usgrenzig bide Chind (achtung, ernstes Thema) redet. Ahschlüssend prahlemer mit eusne Chochkünst und chömed so zude Erinnerige vo eusere Sek-Zit. Am Schluss erchlärt de Ismet, wie er de Jeff Bezos klar macht und so rich wird.  Wichtigi Information: mir sind GEGE jeglichi Usgrenzig, Rassismus und Diskriminierig und findet dass all das ufjedefall KEIN Platz i eusere Welt verdient. Mir versueched unterhaltsam Themene mit gspaltene Meinige ufzgriffe und drüber zrede. #mirsindvoda  

Ja, ihr händ richtig glese, es sind ganz spezielli Cherze zum Thema worde. Vorher hemmer aber e wunderschöni Gsangsilag vom Ismet becho und ahschlüssend erfahre, wie die best Diät ablauft. De Petar hät denn sin Senf zum Selfcheckout im Coop in Oerlike geh und vom Yves erfahrt mer, wie mer e PS5 fascht gratis bechunt. Zum Schluss hät de Yves unbedingt über Cherze welle rede und es isch zum Highlight vode hütige Episode cho. Für jede, wo sich für eus und d'Aktivitäte hinter de Kulisse interessiert, hemmer en Instagram Account erstellt @birreweich. Für Lüt ohni Instagram hemmer au e E-Mail Adresse [email protected].  

I de erste Folg vo eusem Podcast zeigemer scho, wie kreativ mir sind und springed vo Thema zu Thema.  Vom Autohändler in Schwamedinge über Instafame zum Strebertalk tüemmer so, als würemer wüsse vo was mir redet. Jede git sin Senf dezue, es entstönd spannendi Gspröch und es bildet sich Meinige. Mer findet use, wie de Ismet und de Petar mit ihrem Social Media Fame umgönnd. Usserdem besprechemer, was mir für Tipps fürs lerne händ, will mir momentan tüüf ide Lernphase für eusi Semesterprüefige sind. Für jede, wo sich für eus und d'Aktivitäte hinter de Kulisse interessiert, hemmer en Instagram Account erstellt @birreweich. Für Lüt ohni Instagram hemmer au e E-Mail Adresse [email protected].