Advertise on podcast: On Tottaama Konngol

Hannde e altine ñannde 26 lewru 2ɓuru 2024 ka taskaram men On Tottaama Konngol, en yewtii fii Dental Leyɗe Hirnaange Afrik.                           CEDEAO ittii yagginanɗe fagguduyankooje fawunoo e dow Niijeer caggal nde konunkooɓe ciwlii laamu Mohammed BAZUM. Ɗee yagginanɗe yowaaɗe, ko yeru udditigol keeri weeyo e njordi hakkunde Niijeer e leyɗe goɗɗe sokanooɗe heɓii lebbi jeeɗiɗi, e fuɗɗitagol gollidal to banŋe faggudu hakkunde Niijeer e leyɗe CEDEAO. Kono yagginanɗe fawaaɗe e hoore konunkooɓe ciwliiɓe laamu Mohammed BAZUM, ittaaka. CEDEAO ko ƴettii ko e jonnde nde hooreeɓe Dental ngal waɗi e asewe yawtunde Abuja laamorde Najeriya, ƴetti ngal pellital. CEDEAO anndinii kadi e nder ɗerol ngol ɓe lollini ka timmoode tumnbondiral wonnde ɓe ittii goɗɗe e yagginanɗe ɗe ɓe fawi Gine e Mali kadi. Ko holno taskorɗon ngal pellital CEDEAO ittugol yagginanɗe fagguduyankooje fawaaɗe e dow Niijeer? Holko saabii CEDEAO ƴettude ngal pellital?              E miijo hooreeɓe laamu faddewu Niijeer, jaɓɓorto weltaare ngal pellital ndii njuɓɓudi yalndeyankoori?

Hannde e altine, ñannde 23, 2ɓuru, en yewtii hannde kadi ko faati e alhaali dawro Senegaal. Makki SALL anndinii hanki e nder jooɗodal makko e jaayndeyankooɓe Senegaal wonnde happu laamu makko timman ñannde 2 lewru nayaɓuru hitaande nde wonuɗen e mun ɗoo. Hooreejo Senegaal holli kadi wooteeji ɗin no waawi laataade ado maa ɓawto ndee ñalaade, kono o taƴaali ñalaande suɓngooji ɗin wano yoga e ɓiɓɓe leydi ndii haɓɓornoo non hanki. E bi’ol makko ko e diisondiral hakkunde makko e dawroyankooɓe ngal ɓe waɗata e altine e talaata,  ñalaade wooteeji ɗii fottantee. Makki SALL anndinii kadi wonnde sariya yaafagol no waawaa wootede fii accitugol Usmaan Sonko e Basiru Joomaay FAAY. Ko holno taskorɗon ndee yewtere Hooreejo Senegaal Makki SALL.

Hannde e alkamisa, ñannde 22, 2ɓuru ka taskaram men On Tottaama Konngol, en yewtii ko faati e alhaali ɓeydagol cuggeeli yoga e ñaameteeji e nder jeere(luumo) leyɗe Afrik. Nguurdam yoga e afriknaaɓe no ɓeydoo tun sattude ñannde kala. Hannde yimɓe ɗuuɗuɓe ko e hoore karahan woni e heɓirde ñaametee. Ko saabii dum, ko ɓeydagol cugguuli yoga e ñaameteeji e nder jeere leyɗe Afrik. Hannde coggu piiji ɓureeteeɗi ñaameede e nder lewru suumaye wano nebbam, sukkar maaro, cogu mum ɓeydike e nder leyɗe ɗuuɗuɗe. Ko holno alhaali oo fewndori e nder leydi mon? Holko saabii ngol ɓeydagol cogguuli ɗin e ndeɗr ndee jeere? Ko holno ɗee caɗeele ɗoo re’irtee e nder leyɗeele ɗen?

Hannde e talaata, ñannde 20, 2ɓuru 2024, ka taskaram On Tottaama Konngol, en yewtii ko faati e Dental Leyɗe Afrik UA. Mohammed Wuld El-Ghazuwani, hooreejo Moritani suɓaama e ndee jonnde hooreeɓe leyɗe Afrik, timmude hanki e altine, ko ardoo dental ngal e ɗii lebbi 12 arooji. O Lomtike Azali Asumaani hooreejo Komoor mo happu laamu mum timmi e nduu lewru. Oo hooreejo keso ndee fedde hoolii e nder yewtere daɓɓere nde o waɗii wonnde golle ɗe o felliti laatinnde e nder lebbi arooji. Ko holno ñaawirɗon ardiigu e golle Azali Asumaani hooreejo Komoor, ardinooɗo  UA e nde hitaande feƴƴunde? E miijo mon ko golle holɗe teerii Mohammed Uld El-Ghazuwani hooreejo keso ngal dental?

Hannde e altine, ñannde 19, 2ɓuru, ka taskaram On Tottaama Konngol, en yewtii hannde kadi ko faati e alhaali dawro Senegaal. Caggal nde hooreejo leydi ndii Makki SALL anndini e aljuma e nder ɗerol, wonndema o nanii hollitol nduu suudu reenooru doosngal Senegaal, ko yowiti e yuɓɓinngol suɓngooji hooreyaaku no yaawiri, e noddude kaaldal e kawral hakkunde Senegalnaaɓe, en yahi ko ɓuri yimɓe teemeɗɗe jeego jagganooɓe e alhaali dawro accitaama e ɗee ɓalɗe. Hay si tawii hooreejo leydi ndii fodiino e saa’i wonnde o yollitataako walla ukkitotaako e alhaaliiji sariya leydi ndii, yoga no holli wonnde ko e ley konngol makko nanngaaɓe ɓee wonaa e yaafeede. Makki SALL newnii kadi waɗugol seppooji ɗoftiiɗi sariya. O fuɗɗike kadi diisondirde e dawroyankooɓe. Ko holno ñaawirɗon ɗee pellite Makki SALL? Ko holɗum ɗe battinnta e alhaali dawro Senegaal Hiɗon miiji wonnde ɗee pellite waaway ustude walla ñippude caɗeele dawro woodaaɗe hannde e nder Senegaal? 

Hannde e aljuma, ñannde 16, 2ɓuru 2024, ka taskaram On Tottaama Konngol, en kaali ko faati e alhaali Senegaal. Suudu toppitiindu reenugol doosngal leydi ndii riiwii sariya mo suudu sarɗinkooru Senegaal wooti ko faati e dirtinngol suɓngooji hooreeyaaku happaaɗi ñannde 25, lewru ɗiɗaɓuru hitaande nde wonɗen e mum ɗoo. E bi’ol ɓee ñaawooɓe e nduu suudu, oo sariya bugitorɗo wooteeji ɗin yeeso, no lumndii doosngal leydi ngal. Ɓe yamirii hooreeɓe ɓen yuɓɓingol woote ɗen ko ɓuri e yaawude. Ko holno ñaawirɗon ngal pellital taarikayankewal nduu suudu daraniindu reenugol doosngal Senegaal? Taw ngal pellital no juhi on onon walla ko ngal habbinoɗon ? E miijo mon holko ngal pellital waawi battinnde e alhaali dawro Senegaal e alhaali wooteeji saatiiɗi ?

Hannde e taskaram On Tottaama Konngol, on holli mijooji mon ko faati e ndee eɓɓoore nde laamuji faddewu ƴetti fii haɓugol ngenaaje bonɗe e nder leyɗe maɓɓe. Ko e dow ɗum ɗuɗuuɓe e gollanannooɓe laamuji feƴuuɗi fawaa juuɗe (nanngaama). Ko holno njiruuɗon ngal pellital. Mbele ko njotiigu walla ko faale laɓɓinde leyɗe ɗee e ngeenaaje bonɗe ?

Hannde e alarba, ñannde 3, 1ɓuru, en jokkitike yewtere men no yowitii e alhaali caɗeele dawro fewndiiɗe Senegaal, caggal nde suudu sarɗinkooru ndun wooti sariya dirtinɗo suɓngooji hooreyaaku happanooɗi ñannde 25 lewru ndu wonuɗen e muuɗum. Gila ɗum leydi ndii deeƴaali. Leyɗe ɗuuɗuɗe e dente Afriyankooje imminii hooreeɓe maɓɓe ngam yahude yewta fii oo alhaali. Hooreeɓe hiɓɓe ɗiɗo Senegaal, Abdu Juuf e Abdullaay Waad kadi noddii denndaangal senegalnaaɓe dartinnde fitinaaji e nder leydi ndii, e kadi yo dawroryankooɓe e pelle sosiyete siwilje jaɓu noddaandu Makki SALL ko faati e kaaldal e diiwondiral hakkunde ɓiɓɓe leydi. Ko holno ñaawirɗon nduu noddaandu ɓee hooreeɓe ɗiɗo? Taw si nduu noddaandu maɓɓe jaɓete?

Hannde e talaata, ñannde 3, 2ɓuru 2024, ka taskaram On Tottaama Konngol, en yewtii ko faati e alhaali dawro fewndiiɗo Senegaal wonndude e ngaral e nder leydi ndii, imminaaɓe Dental Leyɗe Hirnaande Afrik CEDEAO e Dental Afrik (UA ) ngam jooɗodude e hooreeɓe leydi ndii, ardiiɓe dawro e pelle sosiyete siwilje fii jewte alhaali Senegaal.  Ko holno ñaawirɗon darnde ɗee pelle afriknaaje waawude ñippude ɗee caɗeele dawro fewndiiɗe Senegaal?

Hannde e altine, ñannde 12, 2ɓuru, en yewtii fii  ngoo foolotiro fuku-koyngal KAN2024 yuɓɓinaango Koɗɗiwaar, ko faati e tiindondire  timmal tokosal hakkunde RD. Konngo e Afrik Di Siid e timmal mawngal fijaangal hanki e alat hakkunde diɗɗal Koddiwaar e Najeriya. Kawrital ngal Koɗɗiwaar leydi yuɓɓinndi ngal mooɓondiral fooliri loggi ɗiɗi e gootol. Diɗɗal Koddiwaar ngal dañii deesewal KAN ngal hikka kadi. Ɗum ko caggal nde ɓe eppi yiltaade walla yaltude ka foolotiro e rogere guɓe (puulji). Ko holno taskorɗon ngoo foolotiro KAN hikka.  Ko holno ñaawirɗon ngal kawrital hakkunde Koddiwaar e Najeriya? Nguu poolgu ɗii mawɗi (ñiibi) Koddiwaar no juhi on walla ko ko tijjinoɗon?

Ka taskaram men On Tottaama Konngol hannde e aljuma ñannde 02, lewru 2ɓuru 2024, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitee jeewte waɗaaɗe ɗee.

Hannde e alkamisa, ñannde 8, 2ɓuru, en yewtii fii  coftal-ɓanli, ko faati e alhaali foolotiro fuku-koyngal KAN wonaango e fijeede Koddiwaar. Caggal nde kawrite ɗiɗaɓal timmoode gasi hanki e alarba,en anndii diɗɗe ɗiɗi wonuɗe e tiindondirde ka timmal, Koddiwaar e diɗɗal Najeriya. E miijo mon ko honngal e diɗɗe ɗee ɗiɗi ƴettata deesewal ngal ?