Advertise on podcast: Afrika Ya Mashariki

Hii leo tunaangazia mauaji yanayotokana na migogoro ya kimahusiano, tukichunguza takwimu zilizopo, na sababu zinazochangia ukatili huo.

Katika mwambao wa Ziwa Victoria, mamilioni ya wananchi wanategemea kilimo, uvuvi na ufugaji wa samaki kwa ajili ya chakula na kipato. Hata hivyo, mabadiliko ya tabianchi, kutotabirika kwa hali ya hewa na changamoto za uzalishaji vinaendelea kuathiri maisha yao. Je, teknolojia za satelaiti zinaweza kumsaidia mkulima kujua wakati unaofaa kupanda, mvuvi kufanya maamuzi sahihi na mfugaji wa samaki kupunguza hasara? Kupitia mradi wa KijaniSpace unaotekelezwa Tanzania, Kenya na Uganda kwa ufadhili wa Umoja wa Ulaya, teknolojia za anga na taarifa za kidijitali zinatazamwa kama sehemu ya suluhisho la changamoto hizo. Karibu katika Makala ya Afrika Mashariki, hii leo tunaangazia namna ubunifu wa kiteknolojia unavyoweza kubadili maisha ya wananchi wanaoishi katika bonde la Ziwa Victoria.

Karibu katika makala ya Afrika mashariki inayochunguza uhusiano kati ya urembo, kujiamini na shinikizo la kijamii. Tutaangazia simulizi za mwanawake aliyechagua kufanyiwa upasuaji wa urembo, pamoja na mitazamo ya wataalamu na wananchi.

Wiki hii tumeangazia namna nishati safi na umeme wa uhakika inavyoibadilisha Afrika. Afrika Mashariki imeendelea kushuhudia ongezeko kubwa la uwekezaji katika sekta ya nishati. Tanzania imeongeza uwezo wake wa uzalishaji wa umeme kufikia takribani megawati 4,600 baada ya kuanza kwa uzalishaji wa Mradi wa Kufua Umeme wa Julius Nyerere wenye uwezo wa MW 2,115. Kwa upande mwingine Ethiopia imeendelea kuongoza ukanda kupitia mradi wa GERD wenye uwezo wa MW 5,150, huku Kenya ikiendelea kuwa kinara wa nishati ya jotoardhi na Uganda ikiendelea kuimarisha uzalishaji kupitia miradi mikubwa ya umeme wa maji.

Tunaangazia siasa za Kenya na nafasi ya vijana katika hatua za awali za maandalizi ya Uchaguzi Mkuu wa mwaka 2027. Je, vijana wanaingia kwenye uwanja wa siasa kama wapiga kura tu, au wanataka kuwa wabeba jahazi la maamuzi ya taifa?

Baada ya kusubiri kwa zaidi ya miaka 15 tangu kupata uhuru mwaka 2011, Sudan Kusini imepanga kufanya uchaguzi wake wa kwanza wa kitaifa tarehe 22 Desemba 2026.  Je, uchaguzi huo utafungua ukurasa mpya wa demokrasia au utaibua mzozo mwingine wa kisiasa katika taifa hilo changa zaidi barani Afrika?

Katika kipindi cha miaka ya karibuni, viongozi wa upinzani katika nchi mbalimbali za Afrika Mashariki wameendelea kujikuta mahakamani wakikabiliwa na tuhuma mbalimbali zikiwemo uhaini.  katika Makala ya Afrika Mashariki, tunaangazia mwenendo wa kesi zinazowakabili viongozi wa upinzani katika nchi za Jumuiya ya Afrika Mashariki, je, ni ishara ya kuimarika kwa utawala wa sheria au kuna maswali yanayoendelea kuulizwa kuhusu ushindani wa kisiasa?

Kenya imeanza safari ya kutafuta dira mpya ya maendeleo baada ya Ruwaza ya Taifa ya Maendeleo 2030 kuelekea kufikia ukomo wake. Safari hii inakuja wakati Jumuiya ya Afrika Mashariki, EAC, ikiwa na dira yake ya pamoja ya mwaka 2050, inayolenga kujenga ukanda wenye uchumi shindani, miundombinu iliyounganishwa, viwanda, biashara, ajira na maendeleo ya watu.

Tunaangazia mjadala kuhusu mustakabali wa maonesho ya nanenane nchini Tanzania. Je yaendelee kuwa jukwaa la teknolojia za kilimo pekee au yafungue milango kwa biashara zote?

Katika Makala ya wiki hii, tunaangazia safari ya Tohara ya kitabibu kutoka mila hadi afya ya umma.

Katika Makala ya Afrika Mashariki, tunaangazia mchakato wa mazungumzo ya kitaifa nchini Jamhuri ya Kidemokrasia ya Kongo, nafasi ya viongozi wa dini na matarajio ya wadau wa kisiasa katika kutafuta amani na maridhiano ya kudumu.

Baada ya mvutano wa kisiasa uliojitokeza mara baada ya uchaguzi mkuu uliopita huko Zanzibar, sasa Chama Cha Mapinduzi (CCM) na ACT-Wazalendo vimesaini makubaliano mapya ya maridhiano. Lakini je, makubaliano hayo yatafungua ukurasa mpya wa demokrasia, au ni hatua ya kujenga utulivu kuelekea uchaguzi ujao? Makubaliano hayo yaliyosainiwa Julai 9, 2026 yanajumuisha mapitio ya Katiba, mageuzi ya uchaguzi, maboresho ya mfumo wa sheria, kuimarisha uwajibikaji katika utumishi wa umma, kuundwa kwa chombo cha kisheria cha kusimamia utekelezaji wa makubaliano pamoja na kuendeleza Serikali ya Umoja wa Kitaifa. Hafla ya utiaji saini imefanyika Ikulu Zanzibar mbele ya Rais wa Jamhuri ya Muungano wa Tanzania Samia Suluhu Hassan, Rais wa Zanzibar Dkt. Hussein Ali Mwinyi pamoja na viongozi wa dini, serikali na wadau mbalimbali. Karibu katika Makala ya Afrika Mashariki hii leo tunaangazia makubaliano ya kisiasa kati ya CCM na ACT-Wazalendo Zanzibar, matarajio yake, changamoto zake na athari zake kwa mustakabali wa demokrasia visiwani  karibu tuwe pamoja hadi tamati.

Tunaangazia hali ya Ziwa Victoria, changamoto zinazolikabili pamoja na juhudi za kikanda zinazofanyika kulinusuru ziwa hilo ambalo ni mhimili wa uchumi na maisha ya wananchi wa Afrika Mashariki. Ziwa Victoria, ambalo ni tegemeo la mamilioni ya wananchi wa Afrika Mashariki, linaendelea kukumbwa na changamoto kubwa za mazingira, uvuvi haramu na uchafuzi wa maji. Ripoti mpya ya mwaka 2025 imeonya kuwa bila hatua za haraka, uchumi, afya na maisha ya wananchi wa ukanda huo yako hatarini. Jumuiya ya Afrika Mashariki imezindua ripoti ya mwaka 2025 kuhusu hali ya Bonde la Ziwa Victoria, ikieleza changamoto zinazoendelea kulikabili ziwa hilo ikiwemo uvuvi haramu, uchafuzi wa mazingira na kupungua kwa samaki muhimu wa biashara. Ripoti hiyo yenye sura tisa imechambua kwa kina hali ya ikolojia, mazingira, viwanda, mipango miji, ajira, utalii pamoja na maendeleo ya miundombinu katika ukanda wa Ziwa Victoria.

Makala ya Afrika Mashariki, ikiangazia juu ya ripoti ya Tume ya uchunguzi wa matukio ya wakati na baada ya uchaguzi mkuu wa October 29, 2025 nchini Tanzania.

April 7, 1994 ni siku ya ambayo historia ya Rwanda ilianadikwa kwa wino mwekundu kumaanisha hatari, kifo cha Rais zamani wa Taifa hilo Juvenal Habyarimana aliuawa akitokea nchini Tanzania katika mchakato wa kusaka amani nchini Rwanda, baada ya waasi wa kundi la RPF wakati huo, ambalo kwa sasa ni chama kilichopo madarakani, kuanzisha vita dhidi ya serikali ya Juvenal Habyarimana, wakimtuhumu kuwatenga raia wa Rwanda kutoka jamii ya watutsi.   Hapo ndipo ghasia zikazuka kote nchini humo kwa jamii ya Wahutu na Watutsi kushambuliana vikali kutoka mijini hadi katika vijiji.