Advertise on podcast: Koɗo men hannde

To RDC, ñawu Ebola ina jokki raaɓtude e ndii leydi. E ko hooreeɓe ɓen kumpiti talaata ko ɓuri 9 000 tawraa ñawu nguu, ko ɓuri 4300 maayi e nder diiwe 7. Haɓugol e ñawu nguu no ɓeydii tiiɗude sabu rafi ndeenaagu bannge e nokkuuji to ngu ɓuri jalaade. Yimɓe ɓee kadi koolaaki eɓɓooje daɗɗaaɗe ɗee kadi ŋakkugol kaɓirɗe cafrirɗe ngam haɓde e oo rafi, wallaani. E ɗee balɗe kadi hollitaama wonnde ñawu nguu yottiima leyɗeele goɗɗe ɓadiiɗe RDC ko ɓeydi kulol lañugol e leyɗe jama. Rama DIALLO yeewtidii e Pr Mamadou Saliou SOW, cawroowo to suudu cawrirdu Donka to Guinée, tefoowo dow ɗii ñawuuji raaɓooji. Keɗoɗen

Front pour la refondation de la Nation, ɗum ko fedde heyre nde Joseph Kabila wartidi e politiki RDC. Ndee fedde heyre nde o tawdaa e muurtuɓe M23 hollitaama hanki to Goma saare mawnde fuɗnange RDC, to murtuɓe M23, heewɓe haɓude e laamu RDC njooɗi. Kanko ñawaaɗo kasu maayde saabu tuumeede jamfaade leydi makko, o anndinii sosugol ndee fedde e sahaa mo leydi ndii heɓindantoo suɓgooji laamu baɗooji e hitaande 2028. Holko ɗum hasii battinde e politiki leydi ndii. Holko hawtugol makko e ɓee murtuɓe haɓooɓe e laamu Kinshassa waawi addude e leydi ndii. Holko gartugol makko waawi battinde e Felix Tchisekedi, cappaaɗo honndu yiɗde ƴamde manda tataɓo ko sariya RDC newnantaa gooto. Pr Fabilou, kumpitiiɗo politik, jaŋnginoowo to duɗal toowngal Gaoundere.

Guinee Bissau suɓgooji laamu e depiteeɓe no aadanoo 6 lewru 12ɓurdu warooru. Hannde lamndi na gon so on aadi laatoto. Fedde tammbiinde suɓgooji laamu leydi din anndini ɓe keɓɓindaaki tafon,horeejo jaagorɓe laamu gun kasi jokkinii ɗin kongi. Gartol Oumarou Sissoko Emballo laamiiɗo kiɗɗo laataaki e ɗiɗi lewru ndu hono ko o naniranoo.Laamu leydi ndi fiirtiɗi ɗum saabu e wii maɓɓe no leydi ndin worndi jooni e ndeenaagu humtataa gartol makko.Lunndiyankooɓe ɓee no ñiŋi ɗum ,yi'ude ɗee jaaɓe hono muuyugol konunkooɓe ɓee duumaade e laamu Bissau waasude teddinde ko ɓe aadodinoo koreeji ɗi nde ɓe ƴettunoo laamu,wiide ɓe ngaɗan subgo wartirde laamu e juuɗe siwilɓe.Wartude e nduu jiɓdu Rama Diallo lamndoke Mamadou Albert SY hertorɗo politiki e oo alhaali. Keɗoɗen yeewtere hakkunde maɓɓe.

Hitaande kala, ɗoo e Senegal no taykaa tampiri mawndi so ndunngu hewti, hikka kasin toɓooli no njokki battinde e koreeji ndii leydi. E ɗee balɗe tati sakkitiiɗe, cuuɗi caamii, yimɓe yoga maayi, njeyguuji e kaake boni. Laamu ngu anndinii no e darnde faabaade loriiɓe. Ko ɓuri miliyariiji 9 kaalisi cfa laamu ngu aadii yaltinde etaade ittude ɗee caɗeele toɓo ndunngu ɗo e senegal. Hade nguu laamu e laamuuuji paltiiɗi kaalisi heewi aykaneede ɗum ko tabiti yi'aaka. Ko saabii peeje e aadiiji laamuuji ɗi no ndonki gaynude ɗee caɗeele. Ko woni sabaabu ɗee caɗeele hitaande kala, keɗoɗen kertorɗo oo fannu Oumar LY, sariyayanke e batte leydi, hooreejo catal SONED Afrik e baŋŋe ɓamtaare.

Mali, Gila e ndee talaataare faltiinde Kidal ko juuɗe laami Mali woni. Konunkooɓe leydi ndii e wallidiiɓe mun Africa Corps heɓti ndee Saare Kidal lebbi jowi caggal nde ɓe riiwa e mayre . Murtuɓe FLFA e gollidiiɓe maɓɓe JNIM jaɓtunooɓe Kidal e lewru 4ɓuru ndee hitaande yaltu e ndee saare ado konu Mali hewtude ton. Ko ɗum saabi hare waɗaali hakkunde ɓee ɗiɗo. Ko holɗum walli Konu Mali heɓtugol Kidal ? Fii holɗum murtuɓe FLA dartaaki nguu konu ? Mbele woodi ko Algerie waɗi e oo alhaali ? Ngam taskagol ɗum hiɗen jaɓɓii Gourmo Abdoul LO, jannginoowo iniwersite Nouakchott. Himo jaaboo laamnde Ibrahima Timbi Bah

Cameroun, Tebbeeli gerto e boofooɗe wonaaɗe e yeeyeede hewɗe laaɓana ñawndu, sabu hiɗe wonndi e ñaw. Ko ɗum wiɗto ngo Iniwersite Yaoundé I waɗi feññini. Ɗii tebbeeli ɗee gortooɗe hino wonndi e tooke bonɗe wi’eteeɗe e faransiire métaux lourds, residus antibiotique e toxines. Ɗee tooke ko saabotooɗe ñabbeeli heewɗi, haa hewta cancer. Gila ngoo wiɗto yalti kulol mawngol hino woodani pelle naftortooɗe. Ko holno ɗee tooke hewtiri ɗee gertooɗe ? Ko holɗum haana waɗeede ngam hiwgol ñaamooɓe teewu gerto ? Tawsi sifa ɗee tooke no yi’ee gertooɗe wonɗe e leyɗe goɗɗe e nder Afrik? Koɗo men hannde ko Dr Hasimi Diallo weterineerjo. Himo jaaboo laamnde Ibrahima Timbi Bah.

Cheikh Hamadiou Kane maayi e ndee aseweere faltiinde. Oo winndiyanke Senegalnaajo mawɗo maayiri duuɓi 98. Ko deftere makko “L’aventure ambiguie” yaltinaande e hitaande 1961, okkimo darja. Ndeen deftere no fawi e jaggondiral pine. Toɓɓere himmannde Afriknaaɓe caggal nde kolonaaku naadi e renndooji Afrik pinal kesal lunndiingal aadaaji maɓɓe. Faandaare Cheikh Hamadiou Kane ko hollugol neɗɗo fow no haani reenude pinal mun hayso tawi himo waawi udditanaade pine goɗɗe. Ko holɗum haana maadeede e ngurdam Cheick Haamidou Kane? Ko honɗum woni batte ndee deftere makko e jannde e pine Afriknaaɓe? Koɗo men hannde ko Dr Mamadou Youri Sall, taarikayanke, jannginoowo Iniwersite Gaston Berger Mo Saint Louis. Hinomo jaaboo laamnde Ibrahima Timbi Bah

Ethiopie, hare hakkunde laamu nguu e pelle murtuɗe fuɗɗitike gila e nduu lewru faltiindu. Pelle murtuɗe rennduɗe caggal TPLF hino eɓɓi liɓugol laamu Abiy Ahmed, oo hooreejo jaagorɓe Ethiopie. Ɗee pelle waawi jaɓtude ayropooruuji tati e nder ngal diiwal Tigré hedde rewo leydi ndii. Kono, konu laamu nguu hino jokki haɓugol ɗee pelle. Hooreeɓe Ethiopie hino tuumi leyɗe kawtalje maɓɓe wallittagol ɓee murtuɓe. Ko ɗum saabi yo ɓe raɗo diplomatɓe Erythrée e Egypte. Taw si ɗee pelle murtuɗe waawa liɓude laamu Abiy Ahmed ? Ko holɗum woni darnde ɗee leyɗe kawtalje, taw si ko goonga hiɗe wallitaade ɓee murtuɓe ? Koɗo men hannde ko Dr Aboubacar Demba Diaby, janginoowo to iniwersite Sonfonia, Guinée. Himo jaaboo laamnde Ibrahima Timbi Bah…

Senegal, ko balɗe 30 tan heddii ɗoo fuɗɗagol fijooji olempik sukaaɓe. Ngal kawrital fijooji mawngal waɗan gila 31 lewru 10ɓuru haa 13 lewru 11ɓuru. Ko faati e heɓlo, ardiiɓe Senegal nantini wonndema mahanteeriiji jaɓɓotooɗi ɗii fijooji fow gaynaama darneede walla wattiteede. Ko ngol wontata laawol aranol yo ɗi waɗu e nder duunde Afrik. Ko ɗum holli, ɗii ko fijooji taariikayankooji, laatantooɗi ateletɓe afrikyankooɓe hoolaare ngam dañugol mbuuñaaji, ko ɗum anndini Oumou Souleymane Kane, komiserjo CAF, ardiiɗo kiɗɗo fuku koyngal rewɓe e nder fedde Mauritanie toppitiinde Lato Balon. Ko kanko woni koɗo men hannde. Himo jaaboo laamnde Ibrahima Timbi Bah

Burkina Faso, waɗii hannde duuɓi 4 gila kapiteen Ibrahima Traoré liɓi laamu kolonel Paul-Henri Sandaogo Damiba. Kapiteen Traoré foduno wonndema o ɓooyata e laamu. Kono lebbi seeɗa caggal ɗum, o jonni hoore makko manda timmuɗo mo rewnaaka e suɓngooji. O fusi pelle politik ɗee fow, o rawɗike lunndiiɓe laamu, o soki walla o majjini woɓɓe. E nder ɗii duuɓi 4 ŋakkere ndeenaagu yaaraali caggal hay si tawi Ibrahima Traoré nantini eɓɓooje ɓamtaare rewnaanɗe e waylugol jawle iriiɗe Burkin Faso, semmbingol jannde leydi ndii. Ngam taskagol ɗii duuɓi 4 ɗi Kapiteen Traoré ardii Burkina Faso, hiɗen jáɓɓii Dr Mamadou Gaani Sow jannginowo Iniwersite hertorɗo Sahel. Himo jaaboo laamnde Ibrahima Timbi Bah

Guinee :Hankin 28 lewru 9 ɓuru 2026, Pelle daraniiɗe hakke neɗanke FIDH, OGDH, AVIPA wurnintini duuɓi17 warngooji 28 settambur 2009, pankare ko yimɓe ko ɓuri 150 maayi, woɓɓe barmina, rewɓe ko ɓuri temedere doola. E hitande 2024, horeeɓe kununkoɓe no tawa e ɓen ardinooɗo leydi ndin on saayi captaine Moussa Dadis Camara fawano jukkooje sabu warnedanke. Duuɓi ɗiɗi feƴƴi lorriɓe go hetti hakke mun, woɓɓe hino habbi hettugol hakkemun, hiɓe lanndi yo ñaawore nodditaande nden waɗu. Hiɗen jaɓɓi Asmaou Diallo hooreejo gomu lorriɓe AVIPA. Himo e faandu haala Mamadou Adama Diall

Hulɓineede, nanngeede sokee, leepteede e majjineede... Boneeji fewtinteeɗi e jaayndeyankooɓe hino mawni e nduu adunaaru. E nder diiwal Sahel e leyɗe goɗɗe e nder Afrik, jaayndeyankooɓe wonnduɓe e sifa ɗee caɗeele hino ɗuuɗi. Wurin heewɓe e maɓɓe ndogii njalti e nder leyɗe maɓɓe ngam hiwgol wonki maɓɓe. Ko ardiiɓe ɗee leyɗe e pelle jogiiɗe kaɓirɗe woni caggal ɗii boneeji. E ngal ñallal hannde hertanaangal keɓal kabaaru kuuɓuɗo, hiɗen njaɓɓii Yero Amel Ndiaye, jaayndeyankeejo Mauritanie. E faandu haala Ibrahima Timbi Bah, o arti e caɗeele ɗe kanko e gollidiiɓe makko njogii. Heɗoɗen...

Mbatu hooreeɓe leyɗe to Dental Adunaaru ONU hino jokki. Piile laatiiɗe annde nduu adunaaru hino yewteede e nder ndee jonnde. Gila e kareeli e nder diiwal "Moyen Orient" haa e hare wonnde waɗde Ukraine, hay huunde accaaka. Kono hikka toɓɓere wonnde hino nanngi hakkille mawɓe nduu adunaaru. Ndeen ko alhaali Hakkille Tafaaɗe. Yi’annde mawɓe leyɗe ɗee hino serti. Si Europnaaɓe wonndude e Canada e Australie hino faala yo sarti huɓindiiɗo IA yo waɗe, Etats Unis kañum yaada e ndeen eɓɓoore. E bi’ol Donald Trump, si ndeen feere laati, ɓamtaare hakkille tafaaɗe ŋakkay e nder Dawlaaj Ndenuɗi Amerik. Ko laaɓi koon, hannde Hakkille Tafaaɗe ko karallaagal maapinngal toowa ganndalɓe woɓɓe. Sabu e yi’annde maɓɓe, si ndee jannde heyre huɓindaaka hinde waawi saabaade bone mawɗo. Ko holɗum saabi ngol kulol ? Taw si no woodi ko ngol feŋii ? Ko holto jannde hakkille tafaaɗe tolni hannde e nder Afrique? Koɗo men hannde ko Mamadou Saidou Diallo, hertorɗo IA. Himo jaaboo laamnde Ibrahima Timbi Bah

Etats Unis, gila Donald Trump arti e laamu, ɗanniyankooɓe 25 000 yaltinaama e nder ndii leydi. Heewɓe e maɓɓe ko e leyɗe woɗɗitiiɗe leydi maɓɓe wonaa e naɓeede e hoore doole. Ko ɗum wiɗto ngo rfi e meejaaji goɗɗi waɗi feññini. Ngoo wiɗto anndini ko holno, Washington woni huutorde leyɗe goɗɗe wonndude e pelle adunayankooje hono HRC e OMI ngam yaltingol ɗanniiɓe e nder Etats Unis. E biol Mamadou Adama Diallo, jannginoowo Iniwersite, hertorɗo politik Amerique, ko diplomasi e kaalisi laamu Trump woni e gollirde ngam tabintinngol ndee eɓɓoore makko raɗornde hoɓɓe. Ko kanko woni koɗo men ahnnde himo jaaboo laamnde ibrahima Timbi Bah

Hannde ko koɗo mawɗo jaɓɓiɗen. Kylian Mbappe, kapitenjo ɗiɗɗal France fuku-koyngal. Kanko tigi o holli wonndema ko kanko woni fijoowo balon ɓurɗo mawnude e oo saaha e nduu adunaaru. E oo subaka hannde, Kylian Mbappe holli yi’annde mun e toɓɓe heewɗe : Ndee balonre kaŋŋe, ɓamtaare fuku-koyngal Afrique, suɓegol Zinedine Zidane eltugol ɗiɗɗal France... Ko Olivier Pron, banndiraawo amen rfi fransiire waɗi ndee yewtere. Heɗoɗen...