Advertise on podcast: Koɗo men hannde

Imminaaɓe Guinée, RD Congo e Kenya jaɓɓaama hanki Dawlaaji Ndentuɗi Amerik. Ɓe tawdaama e jonnde fawiinde e oorgirɗe hittuɗe, nde Donald Trump noddi. Faandaare Washington, ko newinngol henndagol ɗee oogirɗe mettuɗe heɓude, ɗe Chine fawi junngo e mun e nder leyɗe hewɗe saabii yo Etats Unis giddan ɗee jawle iriiɗe Afriknaaje ? Taw si ɓe waawan ballaade Chine, joogiiɓe doole e ɗen baŋŋe ? Ko Abdallah Oumarou, wilintinoowo jawle woni koɗo men hannde. Lamndal aranal ngal Ibrahima Timbi Bah waɗani mo no faati e Fuɗɗitagol program AGOA, eɓɓoore yaanannde Afriknaaɓe naadugol yeeyeteeɗi e nder Etats Unis ɓaawo yoɓugol saggale. Heɗoɗen.

République Démocratique du Congo, ko ɓuri yimɓe 200 maayi caggal unagol/joortugol leydi e nder oogirde, e ndee yontere faltiinde. Sifa ɗee mayɗeele hino heewi ko waɗata e nder Afrik. Hitaande kala ko yimɓe cappanɗe walla ujune woni e maayude e nder ɗee oogirɗe. Peeje ɗe hooreeɓe leyɗe Afrik ɓami waawaali tawo dartinde ɗii musibaaji. Holko saabi ɗiin dabareeji battinaali ? Holko haana waɗeede ngam ustugol ɗee maayeele e ɗee oogirɗe ? Koɗo men hannde ko Cherif Sow, hertorɗo kisal e nder oogirɗe. Himo jaaboo lamnde Ibrahima Timbi Bah.

Ko lappannde mawnde waɗi Niger e nder jemma 28 no weetude 29 nduu lewru 1ɓuru faltiindu. Ko yimɓe jogiiɓe kaɓorɗe yani e boowal laaɗe diwooje (ayropoor) Niamey. Caggal hare tiiɗnde, waɗboniyankooɓe ɓee, saabino fitinaaji mawɗi. Laaɗe weeyo siwilje 3 fellano. Konunkooɓe ardiiɓe Niger hollii wonndema ko France, Benin e Côte-d’Ivoire woni caggal oo bone. E bi’ol maɓɓe konunkooɓe Niger 4 barmii, kuliyankooɓe 11 nanngaama, 20 waraama, e ɓeen Faransinaajo gooto, e wiide maɓɓe. Kono, fedde kuliyankoore "Etat Islamik" hollii ko kañun waɗi ndee fiyannde. Nde yaltinii nate e widiwooji ndee hippannde. Ngam taskagol ndee fiyannde hiɗen jaɓɓii e oo sabaka Dr Mamadou Sow, jannginoowo to duɗal toowngal Nouakchott. Himo jaaboo lamnde Ibrahima Timbi Bah...

Burkina Faso, konunkooɓe ardiiɓe ndii leydi hino e laawol fusugol pelle politik. Duuɓi 2 caggal nde ɓe dartini golle majje, ɓee konunkooɓe holli ɓe ɓamii eɓɓoore sariya fusirnde ɗee pelle. Sabu e bi’ol maɓɓe golle ɗee baale saabike lurral hakkunde ɓiɓɓe leydi ndii. Huunde nde Profeseer Bacari Gueye salii. E bi’ol oo jaayndeyankeejo hertorɗo dawro, ngal pellital laamu Burkina Faso ko deƴƴinirngal ɓiɓɓe ndii leydi. Ko kanko woni koɗo men hannde. Himo jaaboo lamnde Ibrahima Timbi Bah.

Hooreejo leydi nigeria, jofni njillu ngu balɗe ɗiɗi hankin Turquie. Bola Ahmed Tinubu siifi sartiiji ɗuuɗuɗi faatiiɗi , ngeygu, deenaagu e uyki. Ɗum ko taaɓannde mawnde ndii leydi Recep Tayyip Erdogan, jogiindi darnde tiidɗe e nder leyɗe Afrik. E nder ɗii duuɓi 20 sakkitiiɗi, kaalisiiji heɓiiɗi e gollidal hakkunde Turquie e Afrik ɓeydike sanne. E hitaande 2000, keɓal ngal gollidal ko miliyarji 4 dollars, e hitaande 2022 ngal keɓal no fawi miliyarji 45 dollars. Ko e banŋe honɗe ngal gollidal ɓuri semmbude ? Ko holno Turquie dañiri ndee darnde yeeso leyɗe mawɗe wano Chine, Russie, France e Inde ? Koɗo men hannde ko Dr Dr Aboubacar Demba Diaby, hertorɗo dawro. Himo jaaboo lamnde Ibrahima Timbi Bah....

Etats-Unis, seppooji mawɗi no waɗde Minneapolis waɗii balɗe. Ko jaggugol ɗanniyankooɓe e dow doole e nder ndee saare saabii ɗii seppooji. Yimɓe ɗiɗo waraama gila ɗi fuɗɗii. Ko polisiiɓe haɓooɓe ɗalle ɗe rewaani sariya wi’eteeɓe ICE saabii ɗee maayeele. Hoɗuɓe Minneaplis ɗuuɗuɓe no ŋiñi golle ɓeen polisiiɓe ɓe Trump, hooreejo Etats Unis naɓi e ndeen Saare. Holko saabii Donald Trump no haɓa ɗanniiɓe jooɗi Minneapolis ? Holko saabii ɗii fitinaaji mawnii ? Holko wonata batte noddaali Bill Clinton e Barack Obama hiɓɓe Etats-Unis caggal ɗee maayeele ? Ko holno Afriknaaɓe jooɗiiɓe Dawlaaji Ndentuɗi Amerik wuururi ɗii fitinaaji ? Koɗo men hannde ko Abdrahman Jallo, daraniiɗo Afriknaaɓe wonuɓe New York. Himo jaaboo lamnde Ibrahima Timbi Bah...

France no e laawol haɗugol sukaaɓe ɓe duuɓi mun toowaali gollirgol mejaaji renndo, ɗum woni réseau sociaux e faransiire. Ko Australie adii ƴettude sifa ngal Pellital. Ko saabii ɗum ko hiwgol hakkille koy sukaloy pamaroy, e boneeji yiilotooɗi e ɗii mejaaji renndo. Ndaarugol nate e widiyooji goɗɗi yiilotooɗi e ndow ɗii mejaaji renndo no okka sukaaɓe ɓee nawnaare hakkille, ko ɗum wiɗtooji hewɗi holli. Ngam firtugol ɗiin boneeji, koɗo men hannde ko Dr Seydou Ka, pisikologjo. E bi’ol makko feere moƴƴere nden wonaa haɗugol sakaaɓe ɓee gollirgol mejaaji renndo, ko rentingolɓe yiilotooɗi bonɗi e ɗii mejaaji. Himo jaaboo lamnde Ibrahima Timbi Bah

Senegaal ko leydi ɓurndi ñawlaade e nder Afrique. Ñamaale mayri no tuugi e 132 % PIB, ɗum woni ngalu leydi ndin. Ngam yoɓugol ɗee ñamaale, FMI, fedde ñawloore kaalisi, ñagike hooreeɓe Senegaal waylude no ɓe haani yoɓirde ndee ñamaande. Huunde nde ardiiɓe Senegaal ɓee calii sabu Ousmane Sonko, hooreejo jaagorɓe oo, wi’i ko ɗum waawa wonnde. Holko saabii hooreeɓe Senegaal ɓee calii ndee eɓɓoore FMI? Taw si feere wonnde no woodi? Mbele Senegaal hino waawi yoɓde ndee ñamaande si hawri no nde yoɓtirtee non waylaaka? Koɗo men hannde ko Dr Abdourahmane Ba, fagguduyankeejo mawɗo. Himo jaaboo laamnde Ibraahiima Timmbi Bah.

Groenland, ko ndee suriire ɓuurnde njanɗude e nduu adunaaru. Hinde hakkunde maayo Atlantique e Arctique hedde rewo nduu adunaaru, hakkunde Canada e Islande. Dawlaaji Ndentuɗi Amerik hino fala fawde junngo e ndee suriire jogiinde ɓiɓɓe 56 000 groenlandais. Donald Trump holli o gollirta doole ngam henndagol ndee suriire kono maa jonnde heñoraande waɗe e ndee toɓɓere. E bi’ol oo hooreejo Etats-Unis, ko leydi makko ndii tan waawi daranaade deenaagu Groenland. Hol saabi Dawlaaji Ndentuɗi Amerik hino faala fawde junngo e hoore Groenland ? Tawsi ndee eɓɓoore Donald Trump waawan laataade hay si tawi Leyɗe Europe faalaaka ɗum? Koɗo men hannde ko Mamadou Adama Diallo hertorɗo Etats-Unis. Himo jaaboo lamnde Ibrahima Timbi Bah.

Senegal, ko ujunaaje teemeɗɗe yimɓe jaɓɓii hanki fijooɓe maɓɓe fuku koyngal ƴettuɓe CAN e ndee hitaande hikka. Diɗɗal Senegl ɓami ngal deesewal caggal foolondiral timmal hakkunde maɓɓe e Maroc. Kono bononndaaji ɗi meeɗaaka yi’eede waɗuno e ngal foolondiral. Ɗin  fuɗɗii, ko nde arbitrejo on salii loggol Senegal, o jonni Maroc penaltiire ko lannoode pottital ngal. Eltoowo Senegal e fijooɓe mun holli ɓe janfaama. Woɓɓe e maɓɓe yalti ka teerin. Ɗum saabi yo  jinnganayɓe  Senegal woɓɓe jippo nanngondira e polisiiɓe halfinaaɓe deenaagu. Ardiiɓe pelle fuku koyngal Afrik e winndere metteninii ɗii bononndaaji. Ɓe holli wonndema wiɗtooji udditaama ngam laɓɓingol koko feƴƴi. E nder heen, Maroc waɗi wullitannde ka CAF, fedde Afriknaare toppitiinde Fuku koyngal. Taw si Senegal fawete yagginanɗe ? Koɗo men hannde ko Alpha Oumar Diallo, jaayndeyankoojo coftal ɓalli. Himojaaboo lamnde Ibrahima Timbi Bah.

Hanne heɓii hitaande gila Donald Trump arti e laamu Etats-Unis. Oo hooreejo leydi, ɓamii pellitte keewɗe e ɗii lebbi 12 skkitiiɗi. E ɗeen no tawaa : ɓeydugol saggalle, raɗagol ɗanniiɓe, dartingol jonngugol wisa (visa), yaltingol Etats-Unis e nder pelle adunaynkooje ɗuuɗuɗe... Pellite ɗe Dawlaaji Ndentuɗi Aerik meeɗa ƴettude. Ko ɓeydii ɗoon, Donald Trump nanngii hooreejo Venezuela, himo aadii kadi jattude Groenland. Nguu laamu Donald Trump, ko laamu doole tan, ko ɗum holli Houleye Thiam, neɗɗo sosieyete siwil jooɗiiɗo Amerik. Ko kanko woni koɗo men hannde. E faandu haala Ibrahima Timbi Bah, himo taskoo ndee hitaande aranere Donald Trump e hooreyaaku Amerik.

Foolotiro leyɗe Afrik hitaande 2025, sikki alaa, ko Senegal sakkitii suutude deesewal ngal, caggal kawral maɓɓe e Maroc, yuɓɓinnooɓe ɗum ɓee. Kawgu ngu aldaa e bettere no feewi, so en tuugniima e Binetou Dia, jaayndiyanke gollanoowo hoore mum, keertoriiɗo coftal ɓalli, teeŋtii e fuku koyngal. Ko kanko woni koɗo men hannde. O waddii e Bokar Tall yeewtere ngam artude e ngu poolgu, e ngoo foolotiro e mbaadi kuuɓtidinndi. Keɗoɗen…

Hooreeɓe Senegal e Sierra Leone, yahuno Guinee Bissau e lannoode ndee yontere faltiinde. Bassirou Diomaye Faye e Julius Maada Bio tummbondirno e hooreeɓe laamu faddewu. Kono haa hannde anndaaka ko feƴƴi e ndeen jonnde, sabu hollitol hay gootol yaltinaaka. Balɗe ɗiɗi caggal nguu njillu, kununkooɓe ardiiɓe Guinee Bissau wayli dosngal lyedi maɓɓe. E sariya keso oo, ɓe ɓeydani hooreejo leydi cemmbe. Ɗum ɗoo hino holli wonndema nguu njillu ɓee hooreeɓe leydi ɗiɗi, alaa ko jibini, e bi’ol Mamadou Albert Sy hertorɗo renndoo. O ɓeydi wonndema ardiiɓe Guinée Bissau miijaaki jonnitude laamu. E hinle CEDEAO alaa ko waawi waɗude ngam wajimbingol ɓee konunkooɓe ciwliiɓe laamu. Ko Mamadou Albert Sy woni koɗo men hannde. Himo jaaboo lamnde Ibrahima Timbi Bah.

Gila ñannde 28 lewru faltiindu seppooji mawɗi hino jaali Iran. Ɗiin ko fuɗɗori ko hollugol mettu-ɓernde sabu satteendi ngurndam, si ɗi sakkitori laataade ŋiñirɗi laamu Iran. Seppooɓe teemeɗɗe walla ujune waraama si en tuugike e limoore pelle ɗe humondiraa e laamu. Kono kabaaruuji laaɓuɗi hino saɗti heɓude Iran hannde sabu hooreeɓe leydi ndin taƴi talifon e internet. Ko holɗum woni caggal ɗii seppooji? Taw si ɗii waawan liɓude laamu Iran joɗiingu gila hitaande 1979? Holko wonata darnde Dawlaaji Ndentuɗi Amerik, caggal nde Donald Trump hajii laamu Teheran warugol ɓee seppooɓe ? Koɗo men hannde ko Anta Barry hertoɗo gollidal hakkunde leyɗe. Himo jaaboo lamnde Ibrahima Timbi Bah.

Moritani, rewɓe ina njokki haalde, kono haa jooni sariya oo reenaani ɓe no haanirta nii. Darnde daraniiɓe hakkeeji aadee fof e maantinde, eɓɓaande sariya ngam haɓaade bonanndeeji baɗeteeɗi e rewɓe ina heddii e uddaade. Holko waɗi waylude miijooji e sariyaaji ina saɗi? Hannde, eɗen njaɓɓii Aysé Sy. Ko o karallo jokkondiral, kadi daraniiɗo, omo hiña caɗeele kaɗooje ñaawoore ndee yahrude yeeso ngam kisal debbo. O hollitii no moƴƴiri wallitde rewɓe yanateeɓe e no sukaaɓe ɓee mbaawirtee fammineede ngam natta fawde rewɓe ɓee ko woodaani. Koɗo hannde ine jaɓɓii wootere e daaɗe daraniinde ndimaagu debbo saliinde deƴƴude, hono Ayse Sih o yeewtidi ko e Oumar Elhadj Thiam.