Advertise on podcast: Brewed Chats: Moms' Morning Talks

بنيجي علي نفسنا كتير اوي عشان نرضي الي حوالينا و بننسي اننا محتاجين مسطرة و مرجعية نرجعلها لما نكون مش عارفين نعمل ايه.. ازاي نتصرف من غير ما نزعل و لا نيجي علي حد لصالح حد تاني..الاهم نفتكر احنا موجودين ليه و بنعمل ايه علي الارض و من خلال الرؤية بتاعتنا هنظبط البوصلة.

كل الامات دلوقتي عندها التخوف بتاع حدود مسيئولياتي لغاية فين؟ امتي نعاقب و امتي لا انا بنصح بس و امتي و لا ده و لا ده انا بس بآهله للفكرة…. دايما في العبادات او التذكير بيكون ساعات بالترهيب و العقاب و ده اكبر غلط.. طب نعمل ايه؟ هنتعلم مع هالة العسال امتي اعمل ايه و معملش ايه من اول و هما اطفال لغاية ما يبقي في احفاد… تعالوا نتعلم سوا عن حدودنا 

بعد ما اتكلمنا الحلقة اللي فاتت عن علاقتنا بربنا و ازاي نعرف ايه رؤيتنا في الحياة, هنتكلم في الحلقة ده مع هالة العسال عن ازاي يبقى عندنا رؤية في تربيتنا لأولادنا. ازاي اعرف ايه رؤيتي و احدد اهدافي. ازاي كل ده لازم اربطه بقراراتي اليوميه و كل الخطط اللي بعملها في حياتهم.  قولولنا بتاخدوا قرارات ازاي في تربية اولادكم؟ هل في قرارات بتندموا بعد ما تاخدوها و تحسوا انها ضد مبادئكم؟

مع بداية رمضان كل سنة بنحط خطط كتير لعبادات طول الشهر و مع مشغوليات كل يوم مش بنعرف ننتظم. و ده غير اصلا ان العبادات ده كلها مكانتش في اولوياتنا ولا بنعملها طول السنة. هل المشكلة اصلا في تنظيم الوقت و المشغوليات ولا المشكلة اكبر و أعمق من كدة؟ ليه دايما بنحس اننا تايهين و مش عارفين نمشي على اي خطط حاطينها؟ اسمعوا الحلقة أ-هالة العسال هتساعدنا نعرف أساس المشكلة و نحلها ازاي

جملة برضو بنسمعها كتير. كل اللي متجوزين جديد بيبقوا متلخبطين بين كلا اهلهم واللي حواليهم انهم ياخدوا خطوة الخلفة بس في نفس الوقت شايفين كل اصحابهم اللي حواليهم مضغوطين ازاي و مشغولين مع أطفالهم. شايفين ازاي ده مسؤولية كبيرة. و ساعات الوعي الزيادة ده بيخليهم مترددين زيادة و حاسين انهم مش مستعدين. طيب ايه الافضل نخلف على طول ولا نستنى؟ و نعرف ااي اننا مستعدين؟ هل في استعدادات اصلا؟

مهما الدنيا اتطورت برضو كل البنات سمعت الجملة ده. طيب البنات اللي اتجوزت بدري مرتاحين و مبسوطين؟ ولا البنات اللي اتجوزت متأخر؟ ايه الناسب أكتر؟ ولا كل حد ليه ظروفه و كل سيناريو ليه مميزاته و عيوبه؟ و امتى تعرفي انك فعلا مستعدة للجواز؟ شوفوا الحلقة الجديدة مه د. ناتالي نزيه و تجربتها الشخصية في توقيت الجواز و رأيها في عيوب و مميزات كل سيناريو.

اوقات كتير بتحسي انك عايزة تاخدي اجازة او تهربي. حتى امهتنا زمان كانوا بيقولوا همشي و محدش يعرفلي طريق. الشغل او الدراسة اة اي حاجة تانية ليها اجازة الا الامومة. حتى لو بعدتي او سافرتي برضو هم لسه في دماغك. طيب بتحسي بكدة ليه و تقدري تعملي ايه لما توصلي للاحساس ده؟ اسمعي الحلقة و قوليلنا بتعملي ايه لما توصلي للمرحلة ده

في بداية مشوار الأمومة منتي فاكرة انه اكيد كل ما الطفل يكبر كل ما الدنيا هتبقى اسهل. مع الوقت بتعرفي ان كل مرحلة ليها مميزاتها و التحديات بتاعتها. سن الطفولة المبكرة (سنتين و ثلاث سنوات) ده اول مرحلة الام بتواجه فيها تحديات في التربية و التعامل مع الطفل. مرحلة مختلفة تماما عن التعامل مع رضيع كل التحديات عبارة عن رعاية فقط. مرحلة فيها اختبار كبير لصبرنا و تحكمنا في مشاعرنا. مع ضيفة الحلقة سلمى مصطفى مدربه تربيه ايجابيه معتمده، وكوتش متخصصه في التربيه والعلاقات الاسريه هنتكلم ازاي نتعامل مع التحديات ده.

اي حد بيشتغل دايما محتاج يطور من نفسه في شغله ياخد دورات دبلومات كورسات او دراسات عليا. طيب و الأم؟ يعني امومة و بيت و اولاد و شغل و كمان دراسة؟ أزاي؟ امهات كتييير مضغوطة انها توفق بين كل ده. اسمعوا الحلقة ده بنتكلم عن حياة الأم اللي بتدرس و تشتغل و ايه الحلول اللي ممكن نعملها علشان نسهل الدنيا شوية

كام مرة قرأنا كومنت بجد ممكن يعمل مصيبة على بوست في نصيحة للأم. النت و الوسائل التواصل الإجتماعي أكيد فادتنا كأمهات و سهلت علينا حاجات كتير في الأمومة. معلومات و توجيهات و دعم اكيد امهاتنا كانوا بيتعبوا اوي علشان يوصلوا له زمان. بس برضو زي اي حاجة ليها مميزات ليها اضرار و عيوب. أيه مشاكل السوشيال ميديا و ازاي نتجنبها. شوفوا الحلقة مع ضيفة الحلقة إستشاري الأسري المعتمدة د. رضوى عبد الحميد.

اي ام مرت او لسه يتمر بفقرة تقديمات المدارس عارفة قد ايه هي فقرة فعلا صعبة و من الحاجات اللي في الامومة اللي الناس مش بتتخيل أبدا انها مرهقة من جميع النواحي. بتاخد وقت كبير يمكن بتقعدي سنة قبلها تدوري. و تلفي و تسألي. نفسيا مضغوطة انك تختاري لطفلك الاحسن. حاسة انه اول قرار مصيري تاخديه له و هيأثر على فكره و تكوين شخصيته و نفسيته و حياته كلها. شوفي الحلقة كلملة بنتكلم عن كل اللي الام بتمر بيه و على الحيرة اللي هي فيها. و ايه الاساسيات اللي عليها نبني قرار زي ده؟

قبل الجواز ده حاجة و بعد الجواز حاجة تانيه خالص؟ اكيد كلنا شوفنا متجوزين بينهم مشاكل او عدم تفاهم او برود و قولنا احنا مش هنبقى زيهم. احنا اكيد مش هنوصل لكدة. اتجوزتوا؟ فهمتوا ان الجواز مش سهل و محتاج مجهود؟ اكتشفتوا ان عادي الواحد ممكن بسهولة يوصل لده لو مشتغلش مع شريك حياته على علاقتهم؟ طيب ايه الاساسيات اللي لازم تبقى موجودة علشان الجواز يبقى ناجح؟ قولولنا في التعليقات رأيكوا في الحلقة.

ساعات كتير بننسى ان مرحلة الامومة ده مش مجرد ان البيبي او الطفل اللي معانا محتاج رعاية. الأمومة فيها تغييرات كتير محتاجين نتعود عليها و فيها حاجات كتير محتاجين نتعلمها و من اهمها ازاي نتأقلم على الحياة الجديدة من غير ما نيجي على الطفل ازاي نحط في حسابتنا انه فرد جديد ليه احتياجات و تفضيلات لازم نحترمها. حلقة جديدة مع ضيفة الحلقة رنا بكيرمدربة تربية ايجابية.

ساعات كتير سرعة الحياة بتخليكي تنسي توقفي و تاخدي منهمحضن كبير طويلمن غير سربعة. و تيجي بعد ما يناوا تبصي عليهم تحسي انهم واحشينك و تفضلي تبوسيهم كتييير. طيب فكرتي قبل كدة بتعبري عن حبك ليهم كفاية ولا لأ؟ طيب هل هم وصلهم كمية الحب اللي في قلبك ولا طول اليوم واخدين الوش بتاع التعليمات و التوجيهات و التعديلات. طيب لما يكبروا هيفتكروا كنتي بتعبيرلهم عن حبك ازاي؟ قوليلنا بتعبري عن حبك ليهم ازاي؟

"عادي كلنا خلفنا قبل كده" اكيد سمعتي الجملة ده قبل كدة. بس اكيد بيدور في دملغك " بس انا اول مرة ابقى أم". هل ده تغيير سهل عليكي؟ و لا ده مرحلة اصلا جديدة في حياتك فيها تغييرات كتير. هل ممكن ترجعي لحياتك القديمة؟ حلقة جديدة مع هند القاضي (مدربة معتمدة من ال ICF و ال MCF) هنتكلم فيها عن الافكار و المشاعر اللي بتدور في دماغك في المرحلة ده.Production House: Ferkish StudioMusic Ashraf Rizk