Werben im Podcast: Chopfchaos

Für de Valentinstag hemmer über T`Gottmann-Methode gredet. De John und Julie Gottmann hend i ihrne Untersuechige über 3000 Paar beobachtet und unterschiedlichi Erkenntniss drus abgleitet. Die Methode beschribt Zeiche vo dysfunktionale Muster i Liebesbeziehige (4 Apokalyptische Reiter), wie au 7 Stufe für e glingendi Beziehig. Mir wünschet eu viel Spass debi! Links: Mehr zu de Methode: https://www.gottman.com/ Für Entspannig: https://www.youtube.com/breathewithsandy

I de 28. Folg und churz nach Neujahr, wenn die meischte Neujahrsvorsätz wieder über Board gworfe worde sind, möchtemer eu erneut Hoffnig geh. Wie setzt mer Ziel richtig, was bruuchts, dass mer die Ziel au durreziet und wie sie ein glücklich mached; all das besprechemer i dere Folg. Losed inne und kommentiered doch eli Neujahrsvorsätz und gend Bscheid öbs no aktuell sind.

I de erste Folg vom Jahr widmet mir eus de 5 innere Atrieber us de Transaktionanalyse: Sei perfekt! Sei Stark! Sei gefällig! Streng dich an! Sei Schnell! Wie die 5 innere Atrieber sich bi eus entwickelt, wie sie sich im Alltag zeiget und zu was es füere chan, wenns is extreme gheit, lernsch i dere Folg. Natürlich redet mir au über eusi Atrieber und über de Test wot au du diheime mache chasch unter: https://transaktionsanalyse-online.de/antreiber-test/

E chopfCHAOTISCHI Spezialfolg zum Jahresendi. I dere Folg erfahrsch du was mir eus fürs 2026 alles vorgno hend - wies Wiehnachtsgschenk vom Ivo demit zemme hengt UND du chasch öppis günne. Drum unbedingt lose, de entsprechend name kommentiere und mir freuet eus druf! Mir wünschet eu en super Start is neue Jahr und danke eu ganz herzlich dass ihr eus so fliessig glosst und unterstützt hend! Danke vielmals! Bis im neue Jahr, eues Chopfchaos-Duo.

Mir alli sind hin und wieder Opfer vo Prokrastination oder Uufschieberitis (läck isch das es wüeschts Wort)! Gwüssi (Tim) meh als anderi (Ivo). I de letschte offizielle Folg vom 2025 luegemer ah, wieso das mer prokrastiniered und Sache uufschiebed, welle Situation dezue füehred und was mer degege chan mache! Wenner für 2026 chli weniger wend uufschiebe, denn losed inne und schriebed eui eigene Erfahrige id Kommentär.

Was isch würklich Wirklichkeit? Dere sehr tüüfe, philosophische aber au sehr Alltagsrelevante Frag stellemer eus i de 25. Folg. Wie nehmet mir Sache wahr? Nehmet alli sgliche wahr oder giz da au Unterschied? Du erfahrsch wie unterschied i de Wahrnehmig aber au i de Interpretation entstönd, wie mer so au viele Missverständnis und Konflikt chönd umagh und was isch würklich Realität. Kei Sorge... so philosophisch wie das tönt, mir hend eus die besti Müeh geh, so alltagsnöch, mit vielne Bispiel zerkläre. Viel spass bim kreiere vo euere Würklichkeit während em lose vo dere Folg.

Die 24. Folg isch mal chli andersch...mer führen zdritte mit de Ines Schlumpf eifach es gmeinsams Gspröch. Umso schöner aber bi dem Thema, dass mer eifach mal chli mitenand chan rede. Mer redet zemme über eusi eigene Erfahrige mit Einsamkeit, wieso dMenscheit i de westliche Welt immer einsamer wird und was mer degege chan mache, wenn mer sich einsam fühlt. UNBEDINGT: Wenn ihr wieder mal möchtet in Kontakt mit neue Menschen cho und nöd ganz wüsstet wie, checket unbedingt Ivy Community ab!

Was passiert, wenn nüt „drin“ isch – aber din Körper trotzdem voll reagiert? I dere Folg tauched mir i d’Faszination vom Placebo und Nocebo ab: Wie chönd hoffnigsvolli Gedanke Heiluuslöser si – und wieso angschterfüllti Erwartige plötzlich Symptom uslöse, wo körperlich gar nöd „müesstet“ uufcho. Als rote Faden nemmed mir eu mit i d’Gschicht us em Postverteiligszentrum Schlieren: Es wises Pulver im Couvert, Alarmstimmig, Polizei – und viel Mitarbeitendi, wo plötzlich Kopfweh, Schwindel und Übelkeit verspürted. Spöter het sich denn sPulver als harmlose Maisstärchi usegstellt. De Körper het trotzdem reagiert – en klassische Nocebo. Mir lösed uf, was genau da im Chopf ablauft, wenn Erwartige zum „Wirkstoff“ werde.

1964 in New York: D’Kitty Genovese wird spaat am Abig vor ihrem Huus agriffe. In de Medie isch denn d’Gschicht umgange, es het zig Nachbare geh, wo's gseh händ – aber niemert hätt richtig iiggriffe. D’Zahle sind hüt umstritte, aber d’Story het es Phänomen berüehmt gmacht: de Zuschauereffekt (Bystander-Effekt). Kurz gseit: Je meh Lüüt debi sind, desto chlinner isch d’Wahrschinlichkeit, dass e einzelne Person hilft. Verwantwortig verteilt sich („Verantwortungsdiffusion“), mer luegt, was di andere mached („pluralistische Ignoranz“), und mer het Angscht, öppis falschs z’mache oder bewertet z’werde. I dere Folge vo Chopfchaos tauchemer i d’Psychologie hinderem Zuschauereffekt ii: vo klassische Experiment bis zu Bispiel us em ÖV, im Büro und online. Mer redet drüber, wieso mer mängisch paralyisiert sind – und vor allem, wie mer’s durchbreche chönd: Situation klar benenne, direkt a Lüt adressiere („Du im rote Pulli, ruf bitte 144!“), und Uufgabe zuewiese statt vage „chann öpper…?“ z’fröge. Hesch du so en Moment schomal erlebt? Schick eus dini Gschicht – und lern mit eus, wie mer vo Zuschauer:in zur Helfer:in wird. 💬🎧

Tüüfgang it Persönlichkeitspsychologie mitem Gast Giani Bardy. De Giani isch Psycholog und Expert im Bereich Diagnostik vor allem Managementdiagnostik. Mit ihm tauchemer ab is Big 5 Persönlichkeitsmodell. Das bestaht us 5 Dimensione: Neurotizismus, Extraversion, Offeheit, Gwüssehaftigkeit und Verträglichkeit. Und dass das ganze nöd theoretisch bliebt, hend mir en Persönlichkeitsfrageboge usgfüllt, vom Giani uswerte lah und gmeinsam i dere Folg besproche. Wer vo eus zwei isch offener, wer isch hilfsbereiter und wie extravertiert sind mir? Das alles und no viel meh i dere Folg! Viel Spass! 😃 Links: Email Giani: [email protected] IAP (ZHAW) IAP Institut für Angewandte Psychologie

Imposter Syndrom isch aktuell es riese Thema. Das Gefühl womer bechunt, wenn mer denkt, dass mer nöd gnueg guet isch und mer ständig Angst het, dass mer jetzt denn grad ufdeckt wird und allne bewusst wird, dass mer nöd da anne ghöred. Was im Volksmund gang und gäbe isch, chan grossi Uuswürkige uf euses Chopfchaos ha. Mir redet drüber, was es genau isch, wer devo betroffenisch und vor allem, was mer denn eigentli chan mache, zum besser demit umzga! Ah und für die wo letschti Wuche gloset hend: Mir hend no es Geständnis. De Tim het gseit, dass er ei Wuche lang sie Handy ersch 30 Minute nach em Aufwache ahlueget und devo berichtet. Mir hend luuter Jubiläumsgfühl total vergesse zverzelle. Also de TIm hets 5 vo 7 Täg gschafft (a dene zwei Tag wos nöd klappet het, hets dra glegge, dass er het müesse de Kalender ahluege zum wüsse was er muess packe - eventuell au Uusrede haha) A dene Tag was klappet het, het er sich jedoch würkli entspannter gfühlt vor allem will denn wenner as Handy isch, es en bewusste Entscheid gsie isch. So gnueg glese/gschriebe, loset jetzt inne und mir sind sehr gspanne uf euer Feedback uf Imposter Syndrom!!

Brandkatuells Thema! Wie viel Ziit verbringemer eigentlich am Handy? Immer erreichbar, immer ufem neuste Stand und selte mal e Minute vo de rueh... Algorithme wo eus besser kennet als eusi Familie, Bildschirmziite wo au Arbeitszite chöntet si und Folge wo nachere schlimme Droge tönet. Was macht das mit eus und wie gönd mir zwei demit um, das alles i de 19. Folg. Viel spass!

Was isch passiert? Ez wetsch doch Geld spare und denn chunts zume Impuls-ichauf... naja: "ich ha mer scho lang nüt meh gönnt." Hüd abig min Vorsatz vo Gsund esse umsetzte? Nei, ich ha hüd so härt gschaffte, ich bstell öppis. Eigentlich welle ufhöre mit Rauche... aber ja ez trinki gad en aperol, da cha mer sich scho so e "Gnuss-Zigi" genehmige... Mir kennets alli: Ab und zue chunts zu innere Widersprüch, de sogenannte Kognitive Dissonanz. I dere Folg erfahrsch alles dezue, wie sie entstaht, was für Strategie mir Mensche so awendet zum sie uflöse und wie schlimm isch es eigentlich würklich??? Viel Spass und gnüsstes!

I de 17. Folg isch de Kyle Varley, Sportpsycholog us Züri bi eus z`Gast. Mir redet drüber wie mer mit Niederlage umgat, was wichtigi mentali Fähigkeite sind, wie gat mer mit Verletzige um und ganz spannend: Söll mer sini dunkli Motivation würklich witer verfolge und nutze? Check it out: Zum Kyle: https://kyleardenvarley.com/ 4 Quadrant vo de Attributionstheorie: https://www.spektrum.de/lexikon/psychologie/attribution/1584 Optimale Leistungszustand: https://rtp-alpin.deutscherskiverband.de/trainingstheorie/sportpsychologie/aktivierungsregulation/

Hoi zemme Chlises Chrüsimüsi mit de Folge: Mer hend die Folg müsse vorzieh, will mer no uf sOK vomene Gast wartet. I dere Folg gahts ums Reflektiere und wieso es mengisch so schwer isch, dass mer sich Ziit für sini eigene Gedanke nimmt. Ihr findet sModell vom Gibbs da: ⁠Gibbs Reflective Cycle⁠ Und da findeder no die Verteilige vo Persönlichkeite: ⁠Grafik⁠ Und ganz wichtig!! Wenner Muster bi eus erchenned oder eus eifach eui Fremdwahrnehmig wend geh (chan au eifach es Feedback sii), denn schriebed eus bitte unbedingt, mir schätzed das sehr!