Publicidad en podcasts en: Luz de Sefarad

Konversamos kon Esther Bendahán sovre su livro 'El final del silencio: Violeta Friedmann', una novela ke es ansimezmo teksto teatral, onde una aktris se apareja para dar vida a Violeta Friedmann, aktivista superbiviente de Auschwitz ke luchó por los derechos umanos i se enfrentó al nazi León Degrelle, ante sus deklarasiones negasionistas de la Shoá, Holocausto. Kurunamos el programa kon el kante tradisional sefardí "Por la tu puerta" en la versión de la kantadera Esther Ackermann. Escuchar audio

La kuzina i platikos sefardim fueron viashando injunto a la lingua traverso los distintos paízes onde moraron los sefardim dempués de la ekspulsión de España en 1492, adjustando muevos savores i yevando los propios tradisionales a distintos kantones de las sivdades. Kompartimos kon los oyentes la recheta tradisional de las afamadas "Revanadas de parida" ke son a base de leche i pan, para ke las mujeres paridas puedan tener fuerza i enerjía, rikas en kualker momento. Kurunamos el programa kon el kante "La kumida de la manyana" en la interpretasión de Marlène Samoun. Escuchar audio

Selevramos Sukot, la Fiesta de las Kavanyas ke rekodran las Nuves de Gloria Divinas. Kompartimos i selevramos kon los oyentes Sukot, Fiesta de las Kavanyas en el Kalendario Evreo, ke rekodran las Nuves de Gloria de la proteksión del Dió. Vos azemos musafires en muestra "Kavanya de Luz de Sefarad" ¿Saves ke signifika Sukot? Selevramos kon la fragua de una ermoza Suká o Kavanya, es una fiesta alegre de la Torá onde devemos kumer i morar en la kavanya. Te eksplikamos komo deve fraguarse la Kavanya. Esta es una Fiesta Agríkola de la Torá onde pedimos al Dió por las luvias para toda la anyada, pujando las koseschas. Kurunamos el programa festivo de Sukot kon la Nana "Si este niño se durmiera" en la interpretasión de Ángel Carril. "Los oyentes son musafires en la Suká de Luz de Sefarad ¡Sukot alegre!" Escuchar audio

El día más sagrado del Kalendario Evreo: ayuno, análiza i limpiesa de la alma. Konmemoramos Yom Kipur, Día del Perdón ke prinsipia la nochada del Domingo 20, kon la análiza injunto al ayuno total. Es un día de enerjía espesial para arepentirmos i ser predonados por el Dió. Eksplikasiones i signifikado. Te kontamos sovre Yom Kipur, ke kaye el día numeró 10 del mes de Tishry del kalendario evreo i sus leyes. Este día sagrado kompleta la análiza i bilonio de la alma, ansí el Dió Promete predonar las transgresiones de toda la anyada. En la Sinagoga se toka el Shofar (kuerno de karnero ke vemos en la fotó) ke su sono espesial mos yeva a la refleksión i al tiempo avre las puertas del sielo. Orasión a kapella: "La Birajá de la mujer", se tarta de una orasión de bendisión para las mujeres ke kompozó Flory Jagoda. Escuchar audio

Selevramos kon los oyentes Rosh Ha Shaná, el anyo muevo 5787 ke prinsipió el Viernes 11, mos topamos en la selevrasión del empesijo de la mueva Anyada, el Domingo 13 en siendo el sigundo día festivo. En la Torá, Bemidbar, Números, el Dió dize ansí " Y en el Séptimo mes, en el primero del mes...un día de toque de Shofar será para vosotros"... Kompartimos kon los oyentes el orijin de Rosh Ha Shaná, una festividad sagrada ke konmemora la kreasión del ombre por parte del Dió. Nomvres de la festividad: Rosh Ha Shaná kere dizir empesijo de la anyada, se selevra kon un Seder familiar espesial, ma tambyén aresive unotros nombres, entre eyios Yom Teruá, Día del Toke del Shofar, Yom Ha Din, Día del Djuisio i Yom Hazikaron, Día del Rekodro, te kontamos sus signifikados. La mesa, la fiesta i el Seder: el Seder es el sentro de la festividad ke inisia una mueva Anyada, kumemos alimentos-simbol kon orasiones i binsisiones kada uno. El Seder: la kumida festiva se selevra las dos nochadas de Rosh Ha Shaná, en famyia, es un momento espesial para dezear todo lo mijor a la famyia i amigos, onde prinsipiamos kon la mansana kon miel, para tener una anyada buena i dulse. Kurunamos el programa kon múzika Sinagogal Baroka "Kol Ha Neshamá" Toda alma agradese al Dió, (Cristiano Lidarti) ke interpreta The Cameran Singers, Direksión Avnei Itai. "Luz de Sefarad: Anyada buena i dulse kon bindisiones para 5787 Escuchar audio

Ofresemos a los oyentes informasiones sovre los Shindler espanyoles, los Diplomátikos salvadores de djudiós en tiempos del Holocausto, i komo pusieron en riesgo sus lavoros por salvar el mayor karar de djudiós. Fueron rekonosidos por el "Yad Vashem", Museo del Holocausto de Israel (Yerushalayim) komo "Justos entre las Naciones" komo simbol de onor i dignidad, en su apoyo a salvar las vidas de sienes de djudiós en tiempos de persekusión nazi. Kontinuaremos informando sovre estos destakados éroes Diplomátikos salvadores de djudiós. Kurunamos el programa kon el kante tradisional sefardí "Abraham Abinu" en la versión de Soledad Bentolila. Escuchar audio

Kontinuamos kontando la milakrosa istoria de David Galante, superbiviente del Holocausto, Shoá, nasido en Rodas (Grecia) el 21 de Agosto de 1925, kon soltanto 17 anyos fue yevado a los kampos de la muerte nazis injunto a su famyia. Por el tiempo de 50 anyos no pudo ni kisho avlar de la vida en Auschwitz, ma dempués se konvensió ke devía kontarlo todo i dar ensenyanza de su vida i lucha. ¿Kómo reushó en su terivle lucha por sobrebivir? ¿Kómo fue su vida dempués en Buenos Aires, Argentina? Un omenaje a David Galante ke murió en Buenos Aires, Argentina en 2020. En el Museo del Holocausto de Buenos Aires (Argentina) i en Yad Vashem (Israel), se guadra dokumentasión i fotos de su istoria. Kurunamos el programa kon el kante "Yo m'enamorí" en la boz de Fortuna. "Mi vedradera liverasión fue kuando pude empezar a kontar" David Galante (Rodas, 1925 - Buenos Aires, 2020) Escuchar audio

Kompartimos la istoria de David Galante, sefardí nasido en Rodas (Grecia) ke injunto a su ermano Moshé fue el úniko superbiviente de su famyia ke fueron yevados a kampos de eksterminio nazis. Sus padres Abraham i Rebeca, i sus tres ermanas Rosa, Matilde i Sara fueron matados todos en Auschwitz, akí kontamos parte de su istoria en el kampo de eksterminio. Semana vinien kontinuamos kon la istoria de David Galante komo omenaje a las víktimas de la Shoá, Holocausto. Kurunamos el programa kon el kante "Arvolés yoran por luvias" en la versión de Isaac Levy. Escuchar audio

Informamos a los oyentes sovre el Holocausto, los sefardim i el apoyo de Franco. Dientro del Congreso Legado Sefardí organizado en Zamora por el Centro Isaac Campantón kompartimos investigasiones de Ricardo Angoso, periodista i eskritor ke ofresió la Ponensia "Los Sefardíes, el Holocausto y el régimen de Franco". Ricardo mos aporta informasiones sovre la pozisión de Franco en atadura a los sefardím, un tema muy interesante ke mos da a konoser desde una mirada diferente i tambyén istórika. Kurunamos el programa kon el kante "Printzesita" en la versión de Flory Jagoda. Escuchar audio

Informamos a los oyentes sovre el Congreso Internacional Legado Sefardí, basho lema Transmisión, Reparación y Conservación, del 1 al 3 de Julio de 2026. Es la edisión numeró 14 de este Congreso organizado en Zamora por el Centro Issac Campantón, kon Jesús Jambrina a la kaveza, un destakado Congreso kon distintas temátikas kon ponensias sovre istoria del Legado Sefardí, traverso su transmisión i konservasión. Konversamos kon Jesús Jambrina, organizador del Congreso. Algunos temas del Congreso Legado Sefardí: "Los sefardíes, el holocausto y el régimen de Franco" por el periodista Ricardo Angoso, "Testimonio y escritura del legado sefardí" por la eskritora Bella Ventura. Kurunamos el programa sintiendo la nana "Durme durme mi andjeliko" en la versión del Grupo A Ballare. Escuchar audio

La Djudería de Sevilla en la Red de Juderías de España. Angie Moreno, Teniente de Alcalde y Delegada de Turismo y Cultura del Ayuntamiento de Sevilla. Sevilla entró esta anyada 2026 en la Red de Juderías de España, es una Djudería kon una profunda istoria de su Komunidad. Konversamos kon Angie Moreno, Teniente de Alcalde y Delegada de Turismo y Cultura del Ayuntamiento de Sevilla para konoser los proyektos en turismo i kultura en la Djudería de Sevilla. La Komunidad Djudía de Sevilla fue una de las más importantes de todo Sefarad, la Komunidad djudía yegó a kontar kon más de unos 4.000 djudiós, i fue la sigunda djudería más grande de España dempués de la de Toledo, es por esto ke los djudiós de Sevilla kontaron kon un destakado rolo en el komersio I desvelopando la ekonomía de la sivdad. Kurunamos el programa sintiendo el kante tradisional sefardí "Los Bilbilikos" ke interpreta la kantadera Judy Frankel. Escuchar audio

La tradisión sefardí se baza en la espiritualidad, tanto en las bindisiones komo en las orasiones i los savios ofresen sus konsejos para kontar kon una vida más espiritual. Tambyén las festividades kontan kon sus butos (objetivos) espirituales. Vos deshamos importantes konsejos en este programa. Eksplikasiones de ke es la visión espiritual, la ke va más ayá de los 5 sentidos. Kurunamos el programa kon el kante kontemporáneo ke mos avla de la bindisión de las manos ke krean "Kon mis manos" poesía de Matilda Kohen Sarano i múzika de Horacio Lovecchio en la boz de Mónica Monasterio. Escuchar audio

Ofresemos kompartir una rika recheta de la kuzina sefardí "Pishkado gizado kon mues o almendras", a baze de pishkado i mueses o almendras, una viesha recheta muy savurida i kompleta. Las rechetas de los sefardim viasharon kon eyios komo parte de la kultura i patrimonio ke fue yevado dempués de la eskpulsión de España en 1492 a paízes onde se enrikesieron kon más ingredientes del lugar, al igual ke akontesió kon la lingua sefardí o djudeo-espanyola ke se enrikesió kon palavras de estos paízes. Kurunamos el programa kon el kante "Raguza" ke interpreta la kantadera Flory Jagoda. Escuchar audio

Ofresemos kompartir la prezentasión del livro "Máximo José Kahn Nussbaum, los sefardíes de Grecia y la Legación de España en Atenas durante la Guerra Civil española" de la Profesora de Historia Contemporánea Matilde Morcillo Rocillo, puvlikado en linguas espanyola i grego por el Ministerio de Asuntos Exteriores de España kon kolavorasión del Instituto Cervantes y la Agencia Española de Cooperación Internacional para el Desarrollo. Sentimos la istoria de Máximo José Kahn, eskritor djudió de orijin alemán naturalizado espanyol, kon palavras de su autora Matilde Morcillo, en la prezentasión en Centro Sefarad-Israel onde mos topimos musafires, indemás partayó en la prezentasión José Eugenio Thovar, Director de Centro Sefarad-Israel. Este livro es un omenaje a Kahn, komo filósofo, pensador i salvador de munchas famyias de djudiós sefardim de Atenas y Salónica en Grecia, ke fue Diplomátiko en Grecia durante la guera civil espanyola, primero komo Cónsul del governo repuvlikano en Salónica entre 1937 i 1938. Tambyén kolavoró en Un Proyekto Sefardí i kontó kon la idea de puvlikar un Romancero para salvaguadrar los romanses sefardim. Kurunamos el programa kon el romanse "La rosa enflorece" ke interpreta Isaac Levy. Escuchar audio

Kompartimos la prezentasión del muevo livro "Tradiciones y Costumbres Judías en Melilla" de Mordejay Guahnich. La mueva edisión del livro "Tradiciones y Costumbres judías en Melilla" konta kon en serka de 100 pajinas más, ensenyando la istoria del djudaísmo en la sivdad, kon fotós destakadas i basa en la Ruta La Melilla Sefardí onde los kapitolós yevan el nomvre de Kandelikas ke mos kontan la vida de la Komunidad Djudía Sefardí de Melilla, indemás kapitolós dedikados a la liturjia, el kalendario evreo i el siklo de la vida basho la tradisión ortodoksa. El Kasher es un tema kon mirada espiritual i material, kon figuras de importantes Rabinos sefardim. Palavras de Mordejay Guhanich Bitán ke mos avla sovre este muevo kompleto livro ke amostra las tradisiones de los djudiós sefardim de Melilla. Kurunamos el programa kon el romanse "Una ija tiene el Rey", en la versión de Viviana Rajel Barnatán. Escuchar audio