Advertise on podcast: Fjórtaktur

Úndína Ýr er ungur dýralæknir sem lýkur nú námi sínu við Kaupmannahafnarháskóla með stórri rannsókn hér á Íslandi þar sem könnuð er tíðni magasára og eðli þeirra.  Úndína segir okkur frá því hvað magasár eru, hvernig einkenni þeirra gætu birst okkur, ástæður fyrir því að þau myndast og hvað sé til ráða. Við ræddum líka rannsóknina og dýralæknanámið sem hefur verið strembið er skemmtilegt! 

Fyrsti þáttur í nýrri seríu er komin út! 🎉 Við ákváðum að byrja þessari seríu á stóru trompi, viðtali við Jóhönnu Þorbjörgu, sem er menntaður hundaþjálfari og hegðunarfræðingur.  Hér segir Jóhanna okkur frá grunnþáttum þjálfunarfræðinnar, hvernig dýr meðtaka upplýsingar, læra og hvernig hegðunin mótast, meðvitað og ómeðvitað 🧠.  Ekki er allt sem sýnist við hefðbundna þjálfun hrossa og því fer engin frá þessum þætti ósnortinn, því getum við lofað!! 

Allt sem þú þarft að vita um hindrunastökkið á Ólympíuleikunum í Tokyo! 

Í þessum síðasta þætti Fjórtakts í bili ræðum við söfnun og samþjöppun, skilgreininguna á því fyrrnefnda og hver munurinn er.  Þátturinn er ekki með sama þema og verið hefur í vetur þar sem við höfum stutt okkur ætíð við vísindagreinar og staðreyndir heldur ræðum við hér hugmyndafræðina um söfnun sem rituð hefur verið í bækur um gildi klassíska reiðmennsku. 

Í þessum þætti ræðum við öndunarkerfi hrossa, virkni þess og hvað er vert að hafa í huga þegar við þjálfum hross. Við ræddum einnig öndun knapans og hvernig hún tengir okkur við hestinn og getur hjálpað okkur við þjálfun. 

Andrea dýralæknir settist niður með okkur og ræddi allt það sem tengist hrossasótt. Við fórum yfir orsakir, einkenni og Pain Face, sem gefur okkur skýr merki um að eitthvað ónáði hestinn. 

Við ræðum misstyrk, hvaðan hann á rætur sínar í náttúrulegu eðli hestanna okkar og hvernig hann birtist okkur þegar það er komið að því að þjálfa hestinn. Við ræddum vandamálin sem misstyrkur getur valdið og leiðir til þess að gera hestinn samspora ásamt smá umræðu um mikilvægi þess að hesturinn sé jafnvígur þrátt fyrir að mælistikurnar fyrir misstyrk séu litlar þegar komið er í keppni, sama hver reiðstíllinn er! 

Í þættinum förum við yfir lykilatriði markmiðasetningar, hvað það er sem skiptir máli þegar við veljum vegferð verkefna og hvernig við getum nýtt mátt hugans til að koma okkur þangað. 

Þátturinn fjallar um hitastýrikeri íslenskra hrossa sem flokkast sem kaldblóðshestar. Við förum yfir þá erfðasynd íslenskra, sá mikli hæfileiki til að halda á sér hita!  Líkt og áður berum við fyrir okkur rannsóknir og greinar dýralækna við dýpri umfjallanir líkt og þessa og ræðum kosti og galla þess að raka, nota ábreiður og valið að gera ekki neitt! 

Ertu í alvöru með réttan hnakk?!  Í þessum þætti ræddum við heima og geima hnakkana með Eveliinu Marttisdóttur sem rekur hnakkastillingarfyrirtækið Hestbak. Eveliina sérhæfir sig í því að skoða, mæla og greina bök hrossa og velja þeim hnakk sem þjónar þeirra þörfum, sem og knapans. Við ræddum allt sem tengist hnökkum, undirdýnum og áhrifum þess að vera með rétta og RANGAN hnakk á milli hests og knapa! 

Þáttur vikunnar fjallar um stóra vísindalega skilgreiningu sem tengist öllu sem við upplifum og gerum við dýrahald! Manngerving (e. Anthropomorphism) er innvinklað í alla hegðun mannskepnunnar, enda er það hennar helsti eiginleiki að reyna að skilja eðli alls, hvort sem að baki því er vísindaleg nálgun eða ekki.  Manngerving er ástæða þess að við tengjumst dýrunum okkar, hvati okkar til þess að halda áfram að þjálfa þau og elska þau. Við förum yfir hvað þetta er, hvað þetta þýðir, hverjir ábatarnir eru og afhverju þetta getur komið í veg fyrir framfarir eða jafnvel ógnað velferð dýranna okkar!  

Það að taka hest úr náttúrulegu umhverfi sínu í haganum með stóðinu og inn í hesthús í ófjölbreyttara umhverfi getur verið mikil breyting og hreinlega niðurdrepandi fyrir hestana. Í þætti þessarar viku ræddum við hvað andleg örvun er, hvernig við getum örvað skynfæri hrossana okkar í hinum ýmsu aðstæðum sem eru sett í sem reiðhross og hin ýmsu leikföng sem hægt er að notast við!