Advertise on podcast: Y Coridor Ansicrwydd

Gyda dwy gêm yn weddill yn erbyn Norwy a Phortiwgal (heb Cristiano Ronaldo), fe all Cymru orffen yn ail, trydydd neu olaf yn ei grŵp yng Nghynghrair y Cenhedloedd. Ac mae'r tri safle yna yn gallu golygu pedwar canlyniad gwahanol - lle yn rownd yr wyth olaf, aros yn adran A, gêm ail-gyfle neu disgyn i Adran B. Digon yn y fantol a digon o hollti barn rhwng Dylan Griffiths, Owain Tudur Jones a Malcolm Allen.

Ar ôl perfformiad "anobeithiol" yn erbyn Sheffield United, tarodd Wrecsam yn ôl mewn steil gyda buddugoliaeth wych yn erbyn Middlesbrough - y tîm ar frig y Bencampwriaeth. Digon i dynnu'r pwysau oddi ar ysgwyddau'r rheolwr Phil Parkinson fasa nifer yn ei feddwl... ond ddim felly Malcolm Allen! Mae o'n dal at ei farn bod rhaid curo Wolves dydd Sadwrn er mwyn tawelu'r sibrydion am ddyfodol y rheolwr. Daeth y fuddugoliaeth yn dilyn beirniadaeth gyhoeddus o'r garfan gan Parkinson - rhywbeth anghyffredin iawn yn ei gyfnod wrth y llyw. Ond mae hi'n gêm beryg, meddai Owain Tudur Jones, yn enwedig wrth gyfeirio at chwaraewyr fuodd yn llwyddiannus yn y Gynghrair Genedlaethol. Does dim byd ond clod i Jack Moylan wrth iddo serennu unwaith eto i Gaerdydd, tra Casnewydd yn parhau i gryfhau o dan Hayden Mullins. Ac mae'r criw wedi bod yn crafu pen yn hir er mwyn meddwl am ffaith gudd am eu gyrfa pêl-droed.

Mae Dylan Griffiths, Malcolm Allen ac Owain Tudur Jones wedi dod at ei gilydd am y tro cyntaf mewn blwyddyn er mwyn chwerthin ar ben helynt Manchester United. Does ganddyn nhw fawr o eiriau caredig i'w ddweud am ymateb Mikel Arteta i gerdyn coch Max Dowman, ond mae'r clod yn enfawr i Harry Kane am ennill gwobr y Ballon d'Or.

Aeth Mal i'r Cae Ras i wylio Wrecsam yn curo Preston yn hawdd - ond chafodd o ddim ei blesio gan y perfformiad, na chwaith cyfle i holi'r rheolwr Phil Parkinson am ei dactegau wedi'r gêm. Ydi Parkinson wir o dan bwysau a hwythau dim ond tri phwynt yn fyr o safleoedd y gemau ail-gyfle yn y Bencampwriaeth. Er colli i West Ham, parhau i edrych i lawr ar bawb mae Abertawe. A does gan Ows ddim amheuaeth o gwbl mai gwrthod unrhyw demtasiwn i adael byddai'r rheolwr Vitor Matos pe bai unrhyw glwb yn ei dargedu.

Dylan Griffiths, Owain Tudur Jones a Malcolm Allen sy'n dathlu perfformiad Cymru yn erbyn Albania sydd wedi mynd a thîm Rhian Wilkinson gam yn nes at gyrraedd Cwpan y Byd 2027. Norwy fydd y gwrthwynebwyr nesa'...a chyfle i brofi pwynt yn erbyn y cyn rheolwr Gemma Grainger. Ac wrth i Abertawe eistedd ar frig y Bencampwriaeth wedi 10 gêm gynta'r tymor, ydi hi'n amser dechrau ystyried bod ganddyn nhw'r gallu i ennill y gynghrair?

Mae Dylan Griffiths, Malcolm Allen ac Owain Tudur Jones yn cael cwmni amddiffynnwr ifanc Caerdydd a Chymru Dylan Lawlor, ychydig funudau ar ôl iddo gamu oddi ar y cae ymarfer. Mae Lawlor yn ysu i gychwyn y tymor oddi ddifri ar ôl i anaf i'w ben-glin olygu mai dim ond wyth munud o bêl-droed mae o wedi ei flasu - a hynny ym muddugoliaeth gyntaf Caerdydd o'r tymor yn erbyn Charlton. Mae o hefyd yn ysu i gael y cyfle i brofi ei hun yn ebryn Erling Haaland a Cristiano Ronaldo fis nesaf. Chafodd ddim y cyfle i wneud hynny mis yma oherwydd ei anaf, wrth i Gymru chwarae pedair gêm anodd iawn yng Nghynghrair y Cenhedloedd. Daeth y cyfnod heriol i ben wrth golli o gôl i ddim yn erbyn Denmarc, ond cyn hynny, codwyd calonnau pawb gyda'r fuddugoliaeth nodedig yn erbyn Norwy. Felly, beth ydan ni a Chymru wedi ei ddysgu o'r gemau yma..?

Dylan Griffiths, Owain Tudur Jones a Malcolm Allen sy'n pori dros ddau ganlyniad siomedig i Gymru yn erbyn Portiwgal a Denmarc yng Nghynghrair y Cenhedloedd. Tra bod yna falchder yn y perfformiad wrth golli yn Lisbon, mae'r perfformiad yn Copenhagen wedi codi cwestiynau dyrys dros safon y garfan a thactegau'r hyfforddwr Craig Bellamy. A chyda gemau cartref yn erbyn Norwy a Denmarc i ddilyn, mae'n bosib iawn fydd rhediad heb ennill Cymru yn ymestyn i wyth gêm. Doedd dim modd anwybyddu'r stori fawr am euogrwydd Manchester City am dorri rheolau gwario Uwch Gynghrair Lloegr, ac mae'r criw yn cofio nôl i 1994 pan ddaeth torf o 3,250 i wylio Porthmadog yn erbyn Bangor.

Dylan Griffiths, Malcolm Allen ac Owain Tudur Jones sy'n asesu gobeithion Cymru mewn gemau oddi cartref heriol yn erbyn Portiwgal a Denmarc.

Dylan Griffiths, Malcolm Allen ac Owain Tudur Jones sy'n ystyried os ydi rheolwr Cymru Craig Bellamy wedi tawelu'r amheuon wrth ymateb i gwestiynau am ei drafodaethau efo Burnley. Roedd yna "ddiffyg parch" gan Bellamy yn ôl Malcolm, tra bod Owain yn credu bod yr holl broses yn rhywbeth cyffredin iawn yn y byd pêl-droed. Un peth anghyffredin iawn, serch hynny, ydi'r pwysau mae rheolwr Wrecsam Phil Parkinson yn ei deimlo ar ôl cychwyn hynod siomedig i'r tymor, gafodd ei amlygu gan y grasfa o 6-0 yn West Ham. Fydd y perchnogion hyd yn oed ystyried diswyddo'r rheolwr o gofio ei holl lwyddiant? Ac mae dannedd Malcolm yn creu trafferth iddo unwaith eto, ac yn peryglu diogelwch Dylan!

Penodiad Ashley Williams ac Alan Sheehan i dîm hyfforddi Craig Bellamy gyda Chymru sy'n hawlio prif sylw Dylan Griffiths, Malcolm Allen ac Owain Tudur Jones ar y bennod yma. Mae 'na gryn edrych ymlaen hefyd i gynhadledd y wasg wythnos nesaf pan fydd Bellamy yn cael ei gwestiynu am y tro cyntaf am ei gysylltiadau gyda Burnley dros yr haf. Mae'r bennod yn cael ei amharu gan argyfwng Mal gyda'i giw iâr, a tydi ei hwyliau'n gwella dim wrth i Owain wrthod datgelu sut gafodd o docyn i eistedd nesaf i Mick Jagger yn Stadiwm Emirates dydd Sul.

Tair buddugoliaeth, un gêm gyfartal ac mae Owain Tudur Jones yn barod yn breuddwydio am flasu'r bwyd ysblennydd sydd ar gael i'r wasg gan glybiau Uwch Gynghrair Lloegr. Do, mae Abertawe wedi cael cychwyn calonogol iawn i'r tymor ac yn eistedd ar frig y Bencampwriaeth. Ac i ychwanegu at y gobaith am dymor llwyddiannus, mae'r clwb wedi bod yn brysur yn ystod y ffenestr trosglwyddo, ac wedi llwyddo i ddal eu gafael ar Zan Vipotnik. Ond siawns bod hi bach yn gynnar i ddechrau meddwl am ddyrchafiad. Does fawr i'w ddathlu ymysg cefnogwyr Wrecsam wrth iddyn nhw barhau aros i weld y Cochion yn ennill. Mae'r clwb wedi bod yn gwario eto ar chwaraewyr newydd, ond tydi Dylan Griffiths na Malcolm Allen yn siŵr os ydi'r wynebau newydd wedi gwella safon y garfan. Tydi Caerdydd heb wario, a rhai yn cwestiynu ymroddiad y perchennog Vincent Tan. Ac ydi Caernarfon wedi darganfod seren newydd..?

Beth oeddech chi'n neud yn 15 mlwydd oed? Ddim yn chwarae i Gaerdydd, mae hynny'n sicr. Ond dyna mae Noah Anyadike wedi ei gyflawni ar ôl cael ei ddewis i gychwyn mewn gêm yng Nghwpan y Gynghrair i'r Adar Gleision. Yn sicr, mae gan y rheolwr Brian Barry-Murphy meddwl mawr o'r Cymro ifanc. Ai dyma'r seren nesaf i gamu allan o'r academi? Ychydig wythnosau'n ôl, roedd Bobby Kamwa yn arwr i gefnogwyr Casnewydd. Tydi o ddim bellach. Aeth Kamwa rhy bell wrth ddathlu yn wynebau'r cefnogwyr Casnewydd ar ôl sgorio i'w glwb newydd Bristol Rovers? Owain Llŷr sy'n ymuno gyda Malcolm Allen ac Owain Tudur Jones.

Pwynt yr un i Gaerdydd a Wrecsam; buddugoliaeth yr un i Abertawe a Chasnewydd - roedd yna rywbeth i bawb ar benwythnos agoriadol y tymor i'r clybiau EFL. Ai dyma'r tymor fydd Rubin Colwill yn torri mewn i gynlluniau Craig Bellamy? Lle mae Wrecsam angen cryfhau? Fydd Zan Viponik dal yn Abertawe wythnos nesaf? Ydi Hayden Mullins wedi darganfod y gyfrinach yng Nghasnewydd? Ac mae Owain a Malcolm yn talu teyrnged i Darren Thomas, wrth i'r Cofi Messi benderfynu dod â gyrfa 15 mlynedd gyda Chaernarfon i ben. Owain Llyr sy'n cyflwyno.

Ar drothwy tymor newydd, mae'n amser proffwydo unwaith eto wrth i Abertawe, Caerdydd a Wrecsam gystadlu yn erbyn ei gilydd yn ail haen Lloegr am y tro cyntaf ers tymor 1981-82. Pwy fydd yn gorffen uchaf? Fydd unrhyw un yn cael dyrchafiad i'r Uwch Gynghrair? Mae gan Brennan Johnson gartref newydd arall wrth iddo adael Crystal Palace am Everton. Fydd David Moyes yn gallu datgloi'r gyfrinach i gael y gorau allan o ymosodwr Cymru? Ond cyn hynny mae angen trafod a dadansoddi'r siom o beidio ennill gwobr podlediad chwaraeon gorau Cymru yng Ngwobrau Pod Cymru ar faes yr Eisteddfod. O, ac mae Mal wedi colli ei ddannedd!

Ar drothwy tymor newydd, mae'n teimlo fel bod y byd pêl-droed wedi ei throi ar ei phen. Pwy feddylia fod llywydd Fifa, Gianni Infantino, yn cynllunio i werthu Cwpan Y Byd? Wel, mae’r ymateb wedi bod yn chwyrn, gyda Chymdeithas Bêl-droed Cymru ar flaen y gad. Testun balchder i’r criw Coridor yn sicr. Roedd ‘na gychwyn addawol i’r Cymru Premier, sydd ar ei newydd wedd, wrth i’r cefnogwyr heidio i’r gemau agoriadol. Fydd y diddordeb yn parhau tan fisoedd oer y gaeaf, a fydd ‘na glwb yn gallu herio’r Seintiau Newydd erbyn hynny? Ac wrth i Joe Allen baratoi i gael ei dderbyn i gylch yr Orsedd yn Eisteddfod y Garreg Las, Ows sy’n esbonio’r her o geisio esbonio i’w ffrind a'i wraig beth yn union fydd yn digwydd, a pham, yn ystod y seremoni urddo.