Advertise on podcast: MANTALITID

Nan edikasyon n ap bay timoun yo, san nou pa rann nou kont, nou konn itilize kèk ekspresyon ki ka afekte estim yo gen pou tèt yo ak pèsonalite yo. Nan epizòd MANTALITID sa, w ap jwenn egzanp 10 fraz negatif ou pa dwe janm di yon timoun. Epi pou kisa.

Sikoloji ak sante mantal genyen anpil mit ki antoure yo. Move pèsepsyon sa yo souvan konstitye obstak pou anpil moun, lè pou yo chèche sipò sikolojik yo nesesite nan vi yo. Nan epizòd MANTALITID, nou prezante w 7 nan mit sa yo, ki pa kadre ak reyalite a.

Twoub pèsonalite nasisik karakterize pa yon obsesyon eksesif, yon moun devlope pou tèt li, kote li vle se li ki se sant atansyon tout bagay, sa ki riske afekte relasyon li ak lòt moun. Nan epizòd MANTALITID sa, nou pale sou kritè dyagnostik twoub pèsonalite nasissik ak kòman ou ka viv ak yon moun nasissik.

Seksyalizasyon avan lè kay timoun, fè referans ak seksyalizasyon tout fòm ekspresyon ak kòd vestimantè yo itilize sou timoun yo, ki pa kadre ak laj, epi kapasite sikolojik yo. Sa ki mete an danje, devlopman pèsonèl ak emosyonèl timoun yo, pandan y ap grandi.

Nan kòmansman nouvo ane yo, gen moun ki souvan pran divès rezolisyon nan lavi yo. Men, pou yon rezon ou yon lòt, objektif yo konn pa reyalize. Nan epizò Mantalitid sa, nou pataje ak ou 7 atitid entelijan ou ta dwe adopte, pou yon pi bon ane 2022.

Nan yon relasyon santimantal, kote enkonpatibilte karaktè ak lòt diferans ant 2 moun yo konn souvan kreye gwo konfli, kominikasyon se yon kle enpòtan. Nan epizòd Mentalitude sa, w ap jwenn 5 sijè fondamantal ou dwe pale ak patnè w la, pou yon pi bon epanouyisman relasyon an.

Sou yon fòm ou yon lòt, pase ou gen pou akonpanye ou pou tout res vi w. Souvni yo, bon tankou move, menm jan ak eksperyans yo, fè pati trajektwa lavi w. Men, si ou rete esklav pase ou, nou riske pèdi tout bèl opòtinite lavi te ka ofri ou.

PADONE pa toujou yon egzèsis fasil, sitou lè nou nouri rankin ak dezi vanjans pou yon moun ki te koze nou yon tò. Men, kiltive padon enpòtan pou sante mantal ou e li ka ede ou geri sikatris emosyonèl sa k pase a. Se de sa nou abòde nan epizòd MANTALITID jodi a.

Rezilyans fè referans ak yon ansanm konpòtman, panse ak aksyon ou kapab aprann epi devlope pandan w ap viv, ki ba ou abilite pou fè fas ak moman difisil yo. Men, rezilyans ale pi lwen pase yon senp kesyon adaptasyon. Li ka yon faktè enpòtan nan byennèt emosyonèl ou.

Konpasyon pou pwòp tèt ou, se yon fòm entelijans emosyonèl ki pèmèt ou rive trete tèt ou ak menm lanmou, pasyans ak respè menm jan ou t ap fè l pou yon pwòch ou ki nan yon moman difisil, olye pou jije epi kondane tèt ou, pafwa ak rigè ki pa nesesè. 

Vin papa, sitou pou premye fwa, se yon avanti emosyonèl enteresan, men ki konn vini ak ensètitid tou. Sitou lè kondisyon yo pa reyini. Soti nan gwosès manman an, pase nan nesans timoun nan, rive nan lè l ap grandi, wòl papa a konn gen gwo enpak sou lavi sikolojik mesye yo. Nan epizòd MANTALITID sa, 4 envite ap pale de eskperyans pèsonèl yo.

Sikoloji Pozitif se yon branch nan sikoloji ki konsantre l sou tout aspè favorab ki ka amelyore eksperyans n ap fè kòm moun.  Kontrèman ak divès lòt branch nan sikoloji, ki plia chita sou trete twoub mantal ak patoloji yo, demach sikoloji pozitif la se ankouraje tout sa ki ka kontribye nan fè nou menmmen yon vi ki pi sinifikatif.

Sante mantal se yon eleman esansyèl nan byennèt jeneral nenpòt moun nan. Nan ka patikilye yon atlèt ki souvan ap fè fas ak divès egzijans disiplin espòtif yo mande, yon bon preparasyon mantal endispansab nan pèfòmans atlèt yo. Nan epizòd MANTALITID sa, Sikològ Frandy Pierre-Louis ap bay plis detay sou sa.

Ant laj 14 ak 16 ane, Max Junior Raymond ki t ap fè fas ak DEPRESYON fè 2 tantativ pou mete fen ak lavi l. Nan epizòd MANTALITID sa, nou eseye gade ki sa ki te sous detrès emosyonèl sa, kòman eksperyans sa make lavi li elatriye. 

Daprè OMS, anviwon 800 mil moun touye tèt yo chak ane. Aprè aksidan machin, SWISID see dezyèm koz lanmò nan mitan jèn ki soti nan laj soti 15 pou rive 29 lane. Nan epizòd MANTALITID sa, nou pale sou kòman ou ka ede nan prevansyon kont SWISID ki se yon pwoblematik sante piblik, sitou nan mitan adolesan yo.