Advertise on podcast: Refqet tariq | رفقة طريق

لما كنت بالعشرينات مثلك هلا فيه شغلات كثير ما عشتها مزبوط شغلات تانية زعلتني وقهرتني اكتشفت بعدين انها ما كانت مستاهلة وانها صارت لخيري وبعد ما مرقت العشرينات بحلاوتها وحيرتها كنت دايما قول لو حدا خبرني شو اعمل وكيف اتصرف يمكن كانت مساحة الضحكة عندي غطت كتير على مساحة الدمعة لهيك بعد ما قربت من الاربعين ما بدي ياك تقولي لو رح خبرك عن كل شي عشته وجربته واستنتجته عن هديك المرحلة كيف تعيشيها لاقصاها تفرحي، تتعلمي، تجربي وتغامري وما تزعلي على شي ،تلحقي قلبك وإحساسك بكل خطوة ويكون رضاك عن حالك قبل رضا كل الناس عنك. اسمعي الحلقة لتعرفي تفاصيل اكتر وانشالله تكون مساحة الضحكة والذكريات الحلوة كبيرة كتير بعشريناتك.

كم مرة بحياتكن توقعتو جرعة كبيرة من السعادة من شيء انتظرتو كثير لتحصلو عليه ولما حصلتو عليه خلصت بهجته بأقل من شهر وما عطاكن السعادة المطلوبة؟ وكم مرة خلاكن عطاءكن وتعاونكن مع الناس تحسو بسعادة مالها حدود ولفترة طويلة؟ بكثير أوقات بتختلط علينا مشاعر المتعة والسعادة وما منقدر نميز بيناتن بالحلقة الثانية عشر من رفقة طريق عن المتعة والسعادة رح نكتشف أهم الفروقات والمسببات لكل وحدة منهن اللي بتوصل حتى لكيمياء الدماغ والهرمونات اللي بيصنعها وكيف فينا نتجنب الخيبات لما نفرق الشعورين عن بعض وما نربط سعادتنا بأي مادة أو إنسان بتمنى تلاقو بالحلقة كل المتعة والفائدة

مهارات لسلامك الداخلي عنوان الحلقة الحادية عشر من رفقة طريق رح نشوف فيها كيف التغاضي والتسامح وتغيير ردود أفعالك الدفاعية على تصرفات اللي حواليك بيضمن سلامة وراحة بالك وخفة بقلبك وروحك كيف لما بتبدلي توقعاتك من الناس بالرضا والامتنان عن حالك عالمك رح يتغير بلحظة ولما بتعطي من قلبك بدون انتظار مقابل لعطاءك رح تعوضك الدنيا اضعاف وتلاقي الخير وين ما رحت اسمعو الحلقة لتعرفو تفاصيل وامثلة اكثر بتمنى تنال اعجابكم

الحلقة العاشرة من رفقة طريق مستوحاة من اجواء الاعياد بنهاية السنة بعنوان العيد والاحتفال رح نشوف فيها أنه مو بالضرورة أبدا نستنى العيد لنحتفل ونحس بالبهجة فينا نعتبر أي يوم أو لحظة سعادة عيد بحياتنا وأنه العيد ماله قانون أو دستور لازم نمشي عليه بكل سنة وممنوع يتغير، منقدر دايما نخلق بهجة جديدة للعيد حسب الظروف والامكانات المتاحة وما نضل نقارن الاعياد ببعضها ونزعل ونتحسر اسمعو الحلقة لتعرفو تفاصيل أكثر وانشالله تكون أيامكن كلها احتفالات وأعياد وكل عام وانتو بالف خير

الحلقة التاسعة من رفقة طريق بعنوان ثقة بالنفس أو غرور رح نشوف فيها التغيير الكبير اللي بتعمله ثقتك بنفسك وتقديرك لحالك على كل شي بحياتك زواج،عمل، تحقيق أحلام وغيره وأنه الواثق من نفسه أبعد ما يكون عن المغرور والمتعجرف وكيف لما بتتنازلي مرة رح تكملي حياتك بسلسلة تنازلات مالها نهاية.. اسمعو الحلقة لتعرفو تفاصيل أكثر  بتمنى تنال أعجابكم وتفيدكم

حصاد آخر السنة هو عنوان الحلقة الثامنة من رفقة طريق رح نشوف فيها شو المعايير اللي على أساسها منصنف كل سنة بحياتنا وليش منعمم حدث واحد على السنة كلها ..ومنضل نقارن السنين ببعضها ..ويا ترى التغيير اللي منستناه من سنة لسنة بحياتنا وأحوالنا نحن ولا السنين مسؤولين عنه اسمعو الحلقة لتعرفو تفاصيل أكثر وطرق لترتيب حساباتكن والتخطيط للسنة الجديدة بتمنى الحلقة تنال إعجابكن

الحلقة السابعة من رفقة طريق بعنوان كلشي ممكن.. ليش لا؟ ..رح نشوف فيها مقومات الانسان الناجح والمؤثر بحياته وحياة اللي حواليه ..كيف بتغيير طريقة تفكيرنا وتصنيفنا لحالنا منغير وضعنا بالحاضر والمستقبل ..كيف ضروري نفكر بالاشياء اللي بدنا هي بدل اللي منخاف منها ومنكرهها ..اسمعو الحلقة لتعرفو تفاصيل أكثر بتمنى الحلقة تنال إعجابكم

إذا فكرنا بحياتنا منلاقيها عبارة عن مجموعة لحظات وتفاصيل ومواقف مرتبة بدقة وجمال خاص ...بالحلقة السادسة من رفقة طريق رح نحكي عن لحظات تخطف الأنفاس، لحظات بتحرك جواتنا براكين من المشاعر والعواطف منوقف عندها عاجزين عن الوصف والتعبير لحظة ولادة الطفل، وقوعنا بالحب لاول مرة، لقاء شخص عزيز بعد غياب.. وغيرها كثير خلوكن عالسمع لتعرفو تفاصيل أكثر  بتمنى الحلقة تنال إعجابكم

فن العيش سهل ممتنع بيتطلب حكمة ومرونة ومهارات بسيطة بتخلينا نكسب الناس ونستمتع بوجودهن بحياتنا أكثر :من هالمهارات مراعاة الاختلاف بالطباع ووجهات النظر بين الناس فصل التصرف الغلط عن صاحبه عدم إصدار أحكام وتعميم صفات معينة على فئة أو مجموعة كل العمر.. التركيز عالخير عند الناس ليفرجونا منه أكثر.. خلوكن عالسمع لتعرفو تفاصيل أكثر بتمنى الحلقة تنال إعجابكم

حلقتنا لليوم عن محطات الطريق برحلة حياتنا ..رح نشوف فيها أنه بكل محطة بحياتنا دايما فيه شي ناقص والكمال بأي وقت مستحيل ..كل محطة منوصلها بتوقيتنا الخاص اللي بيتناسب مع خياراتنا وأولوياتنا ..لا تستعجلي تحرقي مراحل، استمتعي بحلاوة وخصوصية كل مرحلة ..اشبعي بكل محطة من حالك فيها  شكلك، مشاعرك، ردود أفعالك لأنه كل مرحلة ومستوى جديد بحياتك بيطلب نسخة مختلفة وجديدة عنك اسمعو الحلقة لتعرفو تفاصيل وأمثلة أكثر بتمنى الحلقة تنال إعجابكم

الفضفضة وفش الخلق علاج وحاجة أساسية لكل امرأة ما بتقدر تعيش او تكمل بلاهن وتحافظ على صحتها النفسية والجسدية أهم شي بالحكي انها تختار شخص تثق فيه وما يغدر فيها بعدين ويفشي اسرارها او يستغلها بسببهن رح نشوف بهالحلقة أساليب وطرق منوعة للفضفضة وفش الخلق مثل الرياضة، الكتابة، الاكل وغيرها ونتعرف على تاثير الزعل والكبت على صحتك وطاقتك اسمعو الحلقة بالكامل لتعرفو تفاصيل أكثر بتمنى تنال اعجابكم

الاستثمار بالنفس هو محرك الثروة والطريق الوحيد للنجاح والتميز رح نشوف بهالحلقة كيف تعبك على حالك وتعلمك وانفتاحك المستمر على كل شي جديد وسعيك لتطوير حالك من كل النواحي بيساعدك لتعيشي شغفك وتوصلي لهدفك اللي بتحلمي فيه كيف معرفتك بحالك، نقاط قوتك وضعفك، سلبياتك وايجابياتك، شو بتحبي وشوبتكرهي هي البوصلة اللي رح تدلك على الطريق المناسب تماما لرحلتك كيف التساؤل والتجربة وإعادة ترتيب الأولويات بيطالعك من حالة الضياع والحيرة اللي عايشتيها وبيظهرلك إمكاناتك وقدراتك اسمعو الحلقة بالكامل لتفاصيل اكثر بتمنى تنال اعجابكم