Werben im Podcast: Im Bild - de zemli fotografisch Podcast

Gähn… Archiviere, Ordne, Sammle, Erschlüsse, Sueche… und das vo über 7 Millione (!) Pressebilder… bäh, ned grad e spannendi Sach? Oder doch? Sogar so spannend das mer nöm cha ufhöre Froge stelle? Jep genau so spannend isch das Ganze, de Adi hettis ned denkt wonner aber dank em Cornelius sine Museums-Connections es Gspröch met de Laura Aellig (Fachleitung und Kuration Fotografie) und em Lukas Frey (Leitung Erschliessung, StAAG) im Ringier Schauarchiv im Stadtmuseum Aarau het chöne organisiere hends eus so viel spannendi Facts und Behind the Scenes us errem Archivierigs und Kuratierigsarbet verzellt das de Adi nömm ussem stuhne cho isch und er het au plötzlich viel zviel Froge kha... Guet, es wird wohl e 2.0 Folg geh, den mer hends i dem spannende Gspröch met dene beidne in übere Stund ned gschafft alles azluege. Aber apropo aluege, die Podcastfolg lohnt sech ganz fescht au uff eusem Youtube Kanal z’luege! Infos zom Schauarchiv: https://www.stadtmuseum.ch/page/512 Infos zom Ringier Bildarchiv: https://www.ag.ch/de/themen/kultur-sport/kultur/bibliothek-archiv/staatsarchiv/bestaende-sammlungen/ringier-bildarchiv

Sodeli, mer send mol weder retour för en Alltagsfolg! De Adi het sini Grossprojekt mol chöne Abschlüsse, isch chli igsprunge för de Cornelius, het en schwirigi Situatuion erlebt wonnem d’Erfahrig ghule het – de Cornelius isch natürlich au busy gsieh, het aber erstuunlicher Wies ned sooo viel dezue z’verzelle kha. Es lauft einiges und mer hend au voll verpasst was alles gloffe isch i de Branche, drum einigi spannendi Businessnews und auch viel Diskusione zu Gear :) Danke Robin schomol fürs Update! Ah und au ewigi Diskusionenen zu KI Chattbots döffed ned fehle und wieso em Adi fascht d‘Sicherige durrebrenned metem Chatty 😆 Viel Spass bim drihlose und luege, euches «im Bild» Team

Zwoi Bruefsfotografe, spannendi Gäst:innen und e Materialschlacht, wo langsam fascht Studiocharakter het. 🎙️📷 Das isch de Mundart-Podcast Im Bild - de zemli fotografisch Podcast. Adrian und Cornelius führed durch d’Sendige, während de Robin zwüsche Mikrofone, Kameras und Kabelchaos für Bild, Schnitt und Social Media sorget. Jetzt inelose und driiluege.

Das isch die erschti Podcast Folg wo met de Zämmearbet vo Same Kollektiv entstande isch. Same Kollektiv setzt sech vor allem Ih för d’Sichtbarkeit vo de Fotografinne i eusere Branche. Das unterstütze mer natürlich meh als gärn und drumm werded mer in Zuekunft no so einigi spannendi Gspröchspartnerinne us em Same Kollektiv bi eus z’Gast ha! Falls er meh zu Same Kollektiv wend erfahre findet er no eusi Live-Ufnahm met de zwoi Gründerinne i eusem Podcast Archiv oder gönd direkt uf www.samekollektiv.ch Und jetzt zu eusem Gast, d’Michelle Aimée isch imene Fotografische Umfeld tätig wo de Cornelius grad Herzliauge becho het 😍 Sie isch agschtellt als Fotografin bi de Veterinary Faculty a de Uni Zürich und het dete so zimlich alles vor de Linse, vo Chnoche, Tier, OP Situatione, WisseschaftlerInne, usw. Also sehr vielsitig und unglaublich spannend. Wieso d’Michelle freud hed endlich met anderen Bruefslüt über eri Arbet z’spreche, wieso de Cornelius ufblüet bi dem Thema, wie die WisseschaftlerInne wohl nomol id Schuel söttet för Mediekompetenze und was den e Chnoche so Ähnlichkeite met em Adi sinerer Fotografie het erfahred ehr alles i eusem Gspröch. Do no de Michelle eri Website: www.michelle-aimee.ch

Mer hend en spannendi Fotografin als Gast bi eus im Podcast Studio döffe begrüesse. Sie isch erscht grad retour us Namibia cho und den schnurstracks ab zu eus nach Aarau. D’Claudia Link isch e Lifestyle und Resiefotografin meteme spannende Background us de Kunst und het eus so einiges chöne äber Reiseplanig, Material uf Reise, Ängst und Schöns am Reise, usw. chöne verzelle.  Usserdem hemmers no öber eres Bilddatebank-Projekt AETHIK verzellt, mega spannend! I dem Sinn lönd euch in e anderi Welt loh begleite und gnüsseds met euchne Ohre :) Claudia Link: www.claudialink.ch

Hello zäme, mer send mol weder Remote unterwegs! Hend das grad gnutzt um euses neue Ass im Ärmel de Robin i eusi Alltagsfolge izbinde, er verzellt jetzte ussem Nähchäschtli ussem Business. Er het do wesentlich meh Insiderwösse för euch zum abiete, jeah, mer generieret doch Mehrwert för euch 💪🏻😉 Usserdem verzellt de Adi vom... ehm nütmache? Het bitz Flaute, chas geh, hingegege de Cornelius mol weder nume i de Arbet versinkt, er schient was besser (anderscht) zmache 😎 Loset (oder besser lueged uf Youtube) inne und mer wönsched euch witerhin viel Spass und Erfolg bim Knipse!

Mer send immer no «on the road»! Domol im schöne Olte im IPFO Haus der Fotografie. Dete faht abem Samschtig de 24. Januar d'Usstellig vom Jens Krauer, meteme Best of vo sine 10 Johr Streetphotography ah. Mer hend de Moment grad gnutzt um eus metem Jens über sini Arbet, sini Inspiratione, sini Herangehenswies und allgemein öber Fotografie z'unterhalte. Dodebie send so einigi Anekdote und interessanti Moment as Liecht cho 😉 Und ja, sie send grad no am Ufbaue gsieh vo sinere Usstellig, es cha chli rumple bi de Ufnahme 🔨🚧⚒️ Loset (oder lueged, eus gets au als Video-Podcast uf Youtube) inne und vor allem: bsuechet doch am Jens sini Usstellig und lönd euch inspiriere vo sine grossartige schwarzwiess Momentufnahme ussem urbane echte Lebe! 🌃 Meh Infos zu de Usstellig: www.ipfo.ch

We are on the road 🚗💨 Mer hend eus mol weder met Bruefskollege troffe, met denne chamer eifach so schön öber alli Sörgeli rede und sech guet ustusche. Aber isch das eigentlich immer so gsieh? Isches ned eher amigs eso dassmer schnell vo Fotograf:inne schräg agluet worde isch a Jöbs oder sogar ignoriert? Hender au scho so Erfahrige gmacht? Zum Glöck isch das nöm so wahnsinnig schlimm und s'Szene änderet sech i die richtig Richtig. Mer hend eus in Solothurn gnau zu dem Thema metem Roy und em Simon i erem Atelier 7 troffe. Beidi schaffet wie de Adi gröschteteils i de Gastronomie als Fotografe und mer hend denkt das passt doch grad zum öber Zämmearbet und Konkurenz z'rede. Es isch es spannends Gspröch wurde, loset dri und es het au es paar Tipps för euch drunder falls er mengisch au no Hemmige settet ha vo eusne Bruefskolleg:inne 😉

Es isch vollbracht, 2025 isch bald i de Büecher. Mer schwafflet i de letschte Folg vo im Bild Podcast nomol rechtig über die Erfahrige vom letschte Johr und lueged au nochli vorus. Und nei kei Angst, es isch eifach die letschti Folg vom 2025! Ned die letschti aller Folgen, nei, mer mached nämli witer und hend scho einiges vor nächscht Johr! Meh dezue i dere Folg. Ah ja apropo, mer mached ja kei halbi Sache und entwicklet eus ja emmer witer, und da mer ja no en Videospezialischt jetzte im Team hend hemer die Folg au weder uf Video ufgnoh! Und damal rechtig, so wies sech för eus khört! Kei halbi Sache.... de Seich isch dasmer das jetzte so witermache müend, jano, danke Robin! ;) Euch ganz en tolle Jahresabschluss und mer ghöret (und gsend) eus im nächste Johr! PS: Youtube Kanal folge!

Mer lieferet no e spannendi und vor allem sehr Zitaktuelli Folg noche, es isch au die letschti Folg in zämearbet metem IPFO 2025. Mer hend am IPFO Pro döffe en Roundtable füere met em zwar eher "schwere" aber ned minder wichtige Thema Urheberrecht. Do met debie send gsieh d'Annatina Menn selber Juristin und Expertin im Film- und Fernsehrecht sowie em Andreas Trampe Photo Editor und i dem Jahr no neu Mitarbeit im dütsche Fotorat. Am Andreas z'lieb isch de Roundtable in HOCHDEUTSCH ufgnoh wurde :) Tüend eu de schweri Juristischi Brocke doch ah, es isch zwar intensiv aber es lohnt sech.

Heyho liebi Hörer, mer redet mol endli weder öber Fotografie und euse Alltag! Mer hend de Zuekunftstag bim Cornelius duregfüert und d’Chance grad gnutzt e neui Alltagsfolg ufzneh. PS: welcome Robin offiziell im Podcast Team! PPS: Danke Sara för eusi tolli neui Website: www.imbildpodcast.ch Dur das es scho lang her isch… mehreri Mönet, Schande über uns… hemmer ned so detailiert über eusi Projekt gschwafflet sondern eher so Ereignis erwähnt. Und natürlich isch au einiges gloffe i de Industrie und deshalb gets en fette Part Businessnews!

Es führen viele Wege nach Rom… oder halt zu eusem Podcast 😜 I dem Gspröch gahts Hauptsächlich umen Werdegang zur Fotografie, gnauer wiemer met verschiednige Usbeldige id Fotografie chund. Aber natürlich hemmer au en chline Hintergedanke kha metem Interview vom Robin, er isch nemli euses neuste Podcast Teammitglied und unterstützt eus neu i de Technik und em Schnitt! Juhui 🥳 Das isch au grad sini erschti selber gschnittnigi Folg, also isch er allei Gschuld wenn was ned stimmt, ha er nimmt au grad gern jeglichi Kritik entgege unter [email protected] 😆 Hey und no meh Schliechwerbig, eusi neui Website isch endli dusse! Danke Sara (Ehefrau vom Cornelius) för din Isatz. Mer fendet ja isch mega wurde! Und endlich gsehts au bitz professionell us 😎 Aso nomol viel Spass met allne neue Sache und em spannende Interview metem Robin Baumann!

IPFO & Dan Winters isch e Liebesgschicht, eini wo er so zelebriert dasser versproche het er chund zu jeder Usgab wos no geh werd. Was för es Verspreche vo einem vo de grösste Bildermacher eusere Ziit! De Dan het sech met eus vorrem IPFO Publikum zämegsetzt zum echli öber sini Karriere, öber Erlebnis und Fails, öber psychischi Gsundheit und öber sini Art uf d‘Welt zluege z‘rede. Debie isch es spannends und persönlichs Gspröch entstande wommer euch ned wend vorenthalte. Am Schluss simmer de plötzli no zumene Rezeptpodcast wurde… Mer freued eus uf de Dan unds Chilli im Zelt am IPFO 2027! Vor dere Ufzeichnug hemmer no sini unglaublich spannendi National Geographic Doku über in und sis Lebe döffe alueg. Es lohnt sech die vor em Podcast azluege, du findsch sie uf Disney+. PS: Mer sammlet gern no euchi persönliche Chillirezept, chönd sie denn gern metem Dan teile 😉

Info: Podcast isch in Mundart bim Intro und nachere uf englisch! Hey mer send am IPFO (International Photo Festival Olten) und hend die unglaublichi ehr kha metem PLATON, eine vo de international bekantischte Portraitfotografe, chöne z‘plaudere… und plauderet hetter 😉 Über sini Ideal, sini Weltaaschauig, über Chriegsmacher und Chriegsopfer, analogi Fotografie (Adi hets ned chöne loh nochezfröge obwohl er gar ned so gern über Technik redet 😅) und Zuekonft vo eusere Branche. Unglaublich phylosophisch und inspirierend, losed dri!

Bald isches sowit, eis vo de gröschte Fotografie Highlights i de Schwiz findet weder statt, und zwar vom 20. August bis am 24. August 2025! d'Red isch vom IPFO, International Photo Festival Olten. Mer send stolzi Mediepartner vom IPFO met eusem Podcast und döffed au so einiges mache a dem Festival! Mer hend metem Remo Buess, eine vo de Mitbegründer vom IPFO (de ander Part isch niemert gringers als de Marco Grob) über s'kommende Festival und Highlights gredet. Userdem verzellemer was mer alles met eusem Podcast abdecket und was de Cornelius und de Adi no för spannendi Seminar döffed geh. Chömeder au? Jetzt unbedingt amelde und mer freued eus uf euch und spannendi Talks am IPFO 2025! www.ipfo.ch