Advertise on podcast: Habari za UN - Mtazamo wa Kimataifa Habari za kiutu

Wakati dunia ikiadhimisha Siku ya Chakula Duniani hii leo, Umoja wa Mataifa umeonya kuhusu kuongezeka kwa matumizi ya njaa kama silaha ya vita, huku ukihimiza ubunifu, teknolojia na hatua za mapema katika kukabiliana na uhaba wa chakula duniani. Tupate taarifa zaidi kutoka kwa Leah Mushi

Hii leo jaridani tunaangazia suala la uhakika wa chakula katika siku hii ya Chakula duniani tukikuletea ujumbe wa Katibu Mkuu. Pia tunamulika juhudi za wanawake Misri za kutumia mbinu za Akili Mnemba kwa kilimo kuhakikisha upatikanaji wa chakula kwa familia zao. • Wakati dunia ikiadhimisha Siku ya Chakula Duniani hii leo, Umoja wa Mataifa umeonya kuhusu kuongezeka kwa matumizi ya njaa kama silaha ya vita, huku ukihimiza ubunifu, teknolojia na hatua za mapema katika kukabiliana na uhaba wa chakula duniani. • Suala la kuhakikisha ubunifu unatumika ili kuongeza tija kwenye kilimo linatekelezwa kivitendo huko nchini Misri ambako wanawake wakulima waliko vijijini kupitia usaidizi wa shirika la Umoja wa Mataifa la Chakula na Kilimo, (FAO), sasa wanapata taarifa sahihi za kilimo kwa wakati, kwa urahisi na kulingana na mazingira yao. • Na Katibu Mkuu wa Umoja wa Mataifa, António Guterres, ametoa wito wa matumizi ya ubunifu, teknolojia na uwekezaji katika mifumo ya chakula ili kuhakikisha kila mtu anapata chakula salama, chenye lishe na cha bei nafuu. Katika ujumbe wake wa Siku ya Chakula Duniani hii leo, Guterres amesema licha ya dunia kuwa na maarifa na uwezo wa kulisha watu wote, mamilioni ya watu bado wanakabiliwa na njaa na ukosefu wa lishe bora. Mwenyeji wako ni Cynthia Akhangwa, karibu!

Katibu Mkuu wa Umoja wa Mataifa, António Guterres, ametoa wito wa matumizi ya ubunifu, teknolojia na uwekezaji katika mifumo ya chakula ili kuhakikisha kila mtu anapata chakula salama, chenye lishe na cha bei nafuu. Katika ujumbe wake wa Siku ya Chakula Duniani hii leo, Guterres amesema licha ya dunia kuwa na maarifa na uwezo wa kulisha watu wote, mamilioni ya watu bado wanakabiliwa na njaa na ukosefu wa lishe bora. Flora Nducha na maelezo zaidi.

Suala la kuhakikisha ubunifu unatumika ili kuongeza tija kwenye kilimo linatekelezwa kivitendo huko nchini Misri ambako wanawake wakulima waliko vijijini kupitia usaidizi wa shirika la Umoja wa Mataifa la Chakula na Kilimo, (FAO), sasa wanapata taarifa sahihi za kilimo kwa wakati, kwa urahisi na kulingana na mazingira yao. Assumpta Massoi.

Shirika la Umoja wa Mataifa la Afya duniani, (WHO) nchini Kenya, limesema mgonjwa wa pili wa Ebola aliyethibitishwa jana na serikali ya taifa hilo la Afrika Mashariki hivi sasa anaendelea na matibabu na kwamba ni jamaa ya mgonjwa wa Ebola aliyefariki dunia tarehe 5 mwezi huu wa Oktoba. Mwakilishi wa WHO nchini Kenya, Dkt. Neema Kimambo akizungumza na Idhaa ya Kiswahili ya Umoja wa Mataifa jijini Nairobi, Kenya amesema mgonjwa huyo aligunduliwa kupitia mfumo wa ufuatiliaji wa watu wote waliokutana na mgonjwa wa kwanza. Kupitia mahojiano yaliyofanyika Mjini Nairobi Kenya, Dkt. Kimambo anasema "Matibabu anayopatiwa mgonjwa yanahusisha kushughulikia dalili zinazojitokeza. Wagonjwa hupatiwa maji na virutubisho wanapopoteza maji mwilini kutokana na kutapika, dawa za kupunguza homa, na, inapohitajika, kuongezewa damu."

Hii leo jaridani tunakuletea mada kwa. Mwezi uliopita wa Septemba, huko jijini Nairobi nchini Kenya, shirika la Umoja wa Mataifa la Chakula na Kilimo, (FAO) kwa kushirikiana na serikali ya Kenya na wadau wengine walizindua mradi wa SoilFer. Pamoja na mambo mengine, mradi huu una lengo la kuhakikisha wakulima wanapata tija kupitia udongo wenye afya. Stella Vuzo kutoka Kituo cha Habari cha Umoja wa Mataifa nchini Kenya alikuwa shuhuda wetu na alizungumza na wadau mbali mbali hasa kuhusu hoja ya afya ya udongo. Pia tunakuletea muhtasari wa habari: • Mwakilishi wa shirika la Umoja wa Mataifa la Afya duniani, WHO nchini Kenya, Dkt. Neema Kimambo amezungmza na Idhaa ya Kiswahili ya Umoja wa Mataifa jijini Nairobi, Kenya na kusema mgonjwa wa pili wa Ebola ya virusi vya Bundibubyo aliyethibitishwa na serikali jana Jumatano sasa anapatiwa matibabu na kwamba, “mgonjwa huyu ni ndugu wa yule mgonjwa wa kwanza na ulikutana na yule mgonjwa alipokuwa amekuja na kutokana na hiyo ndio amepata maambukizi. Lakini jambo la kutia moyo ni kwamba baada ya kugundua kwamba yule mgonjwa wa kwanza ana Ebola, hatua zilichukuliwa kuhakikisha wale wote ambao kwa namna moja au nyingine walikutana na yule mgonjwa na kumgusa yule mgonjwa. Wakawekwa katika sehemu maalum ya karantini. Na sababu hiyo ndio namna muhimu ya kuzuia kwamba huu ugonjwa usiweze kuenea” • Tungali na Shirika la Umoja wa Mataifa la afya duniani WHO, ambalo leo pia limetoa wito kwa kila nchi duniani kuimarisha hatua za kuzuia watu kuathiriwa vibaya na sumu ya madini ya risasi, kwa lugha ya kiingereza lead, ambayo inakadiriwa kuchangia vifo vya watu zaidi ya milioni 3.5 duniani kila mwaka, huku mamia ya mamilioni ya watoto wakiwa katika hatari kubwa ya kuathirika kwa sababu ubongo na mfumo wao wa fahamu bado vinaendelea kukua. Richard Brown ni Mtaalamu Kiongozi wa Kiufundi na mionzi wa WHO na anasema “Jambo la muhimu sana ni kwamba hatari hizo zinaweza kuzuilika. Watoto wako katika hatari kubwa kwa sababu, kwa bahati mbaya, huingiza mwilini kiasi cha risasi mara nne au tano zaidi kuliko watu wazima kutoka kwenye mazingira au chakula. Na watoto wadogo hasa, kutokana na tabia ya kuweka mikono au vitu vinywani mwao katika mazingira yaliyochafuliwa na risasi, huongeza kiwango cha kukabiliwa na hatari hiyo.” • Na Katibu Mkuu wa Umoja wa Mataifa António Guterres ameonya kuwa licha ya nchi nyingi duniani kuweka malengo ya kulinda bayonuai hatua zinazochukuliwa bado hazitoshi kuzuia kupotea kwa viumbe hai na uharibifu wa mazingira. Akizungumza mjini Yerevan, Armenia, wakati wa uzinduzi wa ripoti ya hatua za kulinda biyoanuai Guterres amezitaka nchi “kuongeza fedha na uwezo wa nchi zinazoendelea, kutimiza ahadi za misaada ya maendeleo, na kuondoa ruzuku zinazochangia uharibifu wa mazingira.”. Mwenyeji wako ni Cynthia Akhangwa, karibu!

Hii leo jaridani tunakuletea mada kwa kinaUkosefu wa ajira bado ni changamoto kwa vijana wengi barani Afrika, wakati sekta ya kilimo ikiwa na fursa zinazoweza kuwasaidia kujiajiri na kujenga maisha yao. Nchini Cameroon, Jukwaa la Chakula Duniani, (World Food Forum,) WFF Cameroon, chini ya usimamizi wa vijana wenyewe lakini kwa uangalizi na ufadhili wa Shirika la Umoja wa Mataifa la Chakula na Kilimo, FAO na serikali, linawaleta pamoja vijana wanaoshiriki katika mifumo ya kilimo na chakula na kuwaunganisha na rasilimali wanazohitaji. Wakati wa Mkutano Mkuu wa Baraza Kuu la Umoja wa Mataifa UNGA81 Cynthia Akhangwa wa Idhaa hii alizungumza na kijana anayeongoza Jukwaa hilo kwa nchi ya Cameroon. Pia tunakuletea muhtasari wa habari: • Naanza na masuala ya ajira na ninakupeleka jijini Harare nchini Zimbabwe ambako Wiki ya Ujuzi barani Afrika inaendelea na wataalamu wanasema mafunzo yanayofanyika katika maeneo halisi ya kazi yanaweza kuwa suluhisho muhimu la kupunguza pengo kati ya ujuzi unaopatikana katika taasisi za mafunzo na mahitaji ya waajiri. Akizungumza kwenye Podikasti ya Shirika la Umoja wa Mataifa la Kazi Duniani (ILO), , Albert Rukeisa mmoja wa wajumbe wa Mtandao wa Afrika wa wakufunzi mahiri wa mafunzo yanayotolewa mahali pa kazi, unaoungwa mkono na ILO kwa ufadhili wa Ujerumani amesema, “tunasisitiza kuwa suala hili si kuwaweka tu wahitimu katika maeneo ya kazi, bali ni kuwasaidia katika safari yao ya kujifunza, kwa kuwapatia mafunzo na ukuzaji wa vipaji ulioandaliwa vizuri, ili wanapomaliza wawe na ujuzi unaohitajika katika soko la ajira. • Baada ya shirika la Umoja wa Mataifa la Afya duniani, WHO, Kanda ya Ulaya kubaini kuwa ni asilimia 15 pekee ya watu katika nchi za Muungano wa Ulaya ndio wanaofahamu kuwa pombe inaweza kusababisha saratani ya titi, licha ya ukweli kwamba unywaji pombe ni mojawapo ya vihatarishi vinavyotambulika vya ugonjwa huo, shirika hilo limezindua jukwaa jipya la kidijitali lenye msaidizi wa akili mnemba (AI) litakalosaidia wahudumu wa afya. Kwa mujibu wa Dkt. Carina Ferreira-Borges, ambaye ni Mshauri wa WHO Kanda ya Ulaya kuhusu Pombe, “Sasa, daktari au muuguzi anaweza kutumia dakika chache alizopata kati ya kumhudumia mgonjwa mmoja na mwingine kuuliza msaidizi wa akili mnemba wa jukwaa hili jinsi ya kuhoji kuhusu unywaji pombe na kupata jibu linalotegemea ushahidi wa kisayansi wa WHO. Hii inafanya mazungumzo kuhusu pombe kuwa sehemu ya kawaida ya huduma za afya, badala ya jambo la ziada linaloweza kuwa gumu kulizungumzia.”. • Na hapa jijini Nairobi nchini Kenya kunafanyika mkutano wa siku nne kuadhimisha miaka 35 tangu kuanzishwa kwa ushirika wa wajenzi wa amani unaohusisha wanawawake walio mstari wa mbele katika kujenga amani. Miongoni mwa washiriki ni Christine Egesa kutoka kaunti ya Bungoma hapa nchini Kenya ambaye akizungumza na Stella Vuzo wa kituo cha habari cha Umoja wa Mataifa amezungumzia matukio ya wasichana kutoweka majumbani. Mwenyeji wako ni Leah Mushi, karibu!

Hii leo jaridani tunakuletea mada kwa kina Waswahili wana msemo usemao, Mungu hakupi kilema akakunyima mwendo. Tafsiri yake inaweza kuwa kwamba kila changamoto unayopitia katika Maisha inaweza kuja na fursa nyingine. Mfano halisi ni wa Maisha ya kijana ambaye utasikia simulizi yake katika mahojiano yafuatayo. Kijana huyu hivi sasa ni mpiga picha za mazingira na ni mwanaharakati mchechemuzi wa kuhifadhi mazingira na kupambana na mabadiliko ya tabianchi. Anold Kayanda alizungumza na kijana huyu hapa katika makao makuu ya Umoja wa Mataifa Jijini New York-Marekani wakati wa wiki ya Mjadala Mkuu wa kikao cha 81 cha Baraza Kuu la Umoja wa Mataifa, UNGA81. Pia tunakuletea muhtasari wa habari: • Leo ni siku ya kimataifa ya kupunguza athari za majanga, Umoja wa Mataifa unapigia chepuo uimarishwaji wa juhudi za kujiandaa kabla ya majanga na kusaidia jamii kujikwamua baada ya dharura, kwa lengo la kulinda maisha, kupunguza watu kulazimika kuhama makazi na kujenga ustahimilivu wa jamii. Akizungumza siku hii Maria Moita Mkurugenzi wa Idara ya Mwitikio na Urejeshaji wa Kibinadamu wa Shirika la Umoja waMataifa la Uhamiaji IOM amesema, “maandalizi ya mapema hupunguza athari mbaya za majanga, huku mipango ya urejeshaji ikisaidia waathiriwa kurejea katika maisha yao kwa usalama na utu.” • Huko Medellín, nchini Colombia, jamii zinazoishi kando ya mito zimeelimishwa kuwa tahadhari za mapema ni pamoja na kumtambua Jirani yako, kushirikishana taarifa na kuhakikisha kila mtu anajua la kufanya hatari inapoongezeka. Carolina Vásquez, Kiongozi wa Kundi la Kijamii la Tahadhari za Mapema, anasema, “jukumu letu kama jamii ni kuufuatilia mto mara kwa mara na kuangalia mabadiliko yake na kujiandaa kwa tahadhari yoyote. Naye José Rodolfo Sánchez, kutoka Kamati ya Jamii ya La Planta, anasema maandalizi huanzia nyumbani na kuimarishwa kupitia mafunzo, mazoezi na kusaidiana miongoni mwa majirani, akisema “tunafundisha jamii thamani ya kila mtu. Hakuna vinyongo, hakuna wivu. Kuna thamani ya uhai wa kila mtu mwingine. • Na taarifa mpya iliyotolewa leo na Shirika la Umoja wa Mataifa la Uhamiaji IOM imebainisha kuwa safari za kupitia baharini kutoka Afrika Magharibi kuelekea barani Ulaya zikizidi kuwa za hatari zaidi, idadi ya wanaoweka rehani maisha yao kusaka maisha bora barani Ulaya imepungua kwa kiasi kikubwa, asilimia 59. Hata hivyo Mkurugenzi Mkuu wa IOM, Amy Pope ametahadharisha kuwa “Mara nyingi wahamiaji hubadili njia na kuelekea sehemu nyingine. Ndiyo sababu ni muhimu kuangalia safari nzima, kuanzia wanakoondoka hadi wanakofika.”. Mwenyeji wako ni Assumpta Massoi, karibu!

Hii leo jaridani tunakuletea mada kwa kina inayotupeleka nchini Kenya kumulika juhudi za kukabiliana na upotevu na utupaji wa chakula kupitia teknolojia bora za uhifadhi, usambazaji wa chakula kilichozidi na matumizi ya Akili Mnemba (AI), hatua zinazolenga kuharakisha utekelezaji wa Lengo la Maendeleo Endelevu, (SDG) namba 12.3. Kupitia mahojiano na Assumpta Massoi wa Idhaa hii katika makao makuu ya UNEP jijini Nairobi, Meneja wa Miradi na Mtaalamu wa Maarifa hiyo, Michael Muratha, amesema kupunguza upotevu wa chakula ni muhimu katika kuimarisha uhakika wa chakula, kulinda mazingira na kuongeza kipato cha wakulima. Pia tunakuletea muhtasari wa habari: • Ripoti mpya ya Shirika la Umoja wa Mataifa la Mpango wa Maendeleo UNDP na Chuo Kikuu cha Oxford imeonesha kuwa idadi ya watu wanaoishi katika umaskini wa duniani imeongezeka kwa watu milioni 51.5, na kufikia watu bilioni 1.2, kwa mara ya kwanza katika miaka 15. Mkuu wa UNDP, Alexander De Croo, amesema, “Kuongezeka kwa umaskini kunapaswa kuwa kengee ya kuiamsha dunia ichukue hatua.” Amesema watu hao wanakabiliwa na changamoto zinazochocheana, zikiwemo njaa, ukosefu wa elimu, maji safi na umeme. Hata hivyo, De Croo amesisitiza kuwa, “Tunajua kwamba maendeleo yanawezekana,” akizitaka nchi zichukue hatua madhubuti na kushughulikia changamoto hizi kwa pamoja. • Ukata wa fedha unahatarisha msaada na ulinzi kwa watu milioni 117 waliolazimika kuyahama makazi yao kote duniani limeonya leo Shirika la Umoja wa Mataifa la kuhudumia Wakimbizi UNHCR. Kamishina Mkuu wa UNHCR, Barham Salih, amesema shirika hilo limepokea dola bilioni 3 pekee kati ya dola bilioni 8.5 zinazohitajika mwaka huu. Amesisitiza kuwa, “Kuna tofauti kati ya kufanya mambo mengi kwa rasilimali chache na kuombwa kufanya jambo lisilowezekana,” akibainisha kuwa wafanyakazi 8,000 wamelazimika kuondoka kazini tangu mwaka 2024. • Na Shirika la Afya la Umoja wa Maataifa Duniani (WHO) limeweka lengo la kuhakikisha kila nchi inagundua na kuelewa vitisho vipya vya kiafya ndani ya saa 24 tangu vinapojitokeza, ifikapo mwaka 2030. Akizindua mkakati huo mpya mjini Berlin, Ujerumani, Mkurugenzi Mkuu wa WHO, Dkt. Tedros Adhanom Ghebreyesus, amesema lengo ni kuchukua hatua mapema kabla milipuko haijageuka kuwa majanga makubwa. Akitaka kuwa na “Dunia ambayo kila nchi inaweza kuchukua hatua haraka dhidi ya vitisho vya kiafya kabla havijageuka kuwa majanga makubwa. WHO inasema kufanikisha lengo hilo kutahitaji uwekezaji endelevu na ushirikiano wa kimataifa ili kuimarisha mifumo ya tahadhari ya mapema na kulinda jamii dhidi ya milipuko ya magonjwa. Mwenyeji wako ni Leah Mushi, karibu!

Hivi karibuni hoja ya watoto na AI ilimulikwa kwenye makao makuu ya Umoja wa Mataifa hususan jinsi ya kulinda haki za watoto. Je watoto wenyewe wananufaika vipi nayo? Wanataka nini kifanyike ili iwaletee maendeleo Chanya? Tuungane na Assumpta Massoi kutoka Nairobi Kenya akizungumza na mtoto anayeanza kwa kujitambulisha.

Hii leo jaridani tunaangazia mshindi wa Tuzo ya Amani ya Nobel mwaka 2026, maoni ya vijana kuhusu Akili Mnemba, na mchezaji wa soka au kandanda nchini Tanzania. • Kamati ya tuzo ya Nobel nchini Norway imemtangaza Navanethem “Navi” Pillay kuwa mshindi wa Tuzo ya Amani ya Nobel mwaka 2026 kutokana na mchango wake katika kukuza amani na sheria za kimataifa. • Katika masuala ya Akili Mnemba au AI hivi karibuni hoja ya watoto na AI ilimulikwa kwenye makao makuu ya Umoja wa Mataifa hususan jinsi ya kulinda haki za watoto. Je watoto wenyewe wananufaika vipi nayo? Wanataka nini kifanyike ili iwaletee maendeleo Chanya? Tuungane na Assumpta Massoi kutoka Nairobi Kenya akizungumza na mtoto anayeanza kwa kujitambulisha.. • Na Nchini Tanzania, mchezaji wa soka au kandanda, Fatuma Issah Suleiman amegeuza changamoto na kukatishwa tamaa kuwa chachu ya kufuatilia ndoto yake katika mchezo wa soka. Licha ya kukosa uungwaji mkono mwanzoni na baadaye kupata jeraha kubwa lililomweka nje ya uwanja kwa miezi kadhaa, Fatuma hakukata tamaa na hatimaye akafanikiwa kufikia kiwango cha kuchezea timu ya taifa. Mwenyeji wako ni Flora Nducha, karibu!

Nchini Tanzania, mchezaji wa soka au kandanda, Fatuma Issah Suleiman amegeuza changamoto na kukatishwa tamaa kuwa chachu ya kufuatilia ndoto yake katika mchezo wa soka. Licha ya kukosa uungwaji mkono mwanzoni na baadaye kupata jeraha kubwa lililomweka nje ya uwanja kwa miezi kadhaa, Fatuma hakukata tamaa na hatimaye akafanikiwa kufikia kiwango cha kuchezea timu ya taifa. Kulikoni? tuungane na Cynthia Akhangwa kwa ufafanuzi zaidi.

Kamati ya tuzo ya Nobel nchini Norway imemtangaza Navanethem “Navi” Pillay kuwa mshindi wa Tuzo ya Amani ya Nobel mwaka 2026 kutokana na mchango wake katika kukuza amani na sheria za kimataifa. Selina Jerobon na maelezo zaidi.

Hii leo jaridani tunakuletea mada kwa kina. Umoja wa Mataifa unaonya kwamba pengo la kidijitali linaweza kubadilika kuwa pengo la Akili Mnemba (AI), na hatimaye kuwa pengo la maendeleo, usalama na mamlaka ya nchi. Shrika la Umoja wa Mataifa la Mpango wa Maendeleo UNDP linatoa takwimu likisema barani Afrika kwa mfano, ni chini ya asilimia mbili ya uwezo wa vituo vya kuhifadhi na kuchakata data duniani ndi upo barani umo, huku ni asilimia tano tu ya wabunifu wa AI barani humo ndio wana uwezo wa kupata nguvu za kompyuta wanazohitaji. Hali hiyo ndio msingi wa mazungumzo yafuatayo kati ya Anold Kayanda wa Idhaa hii, na Gloria Anderson, Mkurugezi wa shirika la TEDI Tanzania. Gloria Anderson alikuwa New York Marekani kuhududhuria mikutano mbalimbali wakati wa UNGA81. Pia tunakuletea muhtasari wa habari kama zifuatazo. • Shirika la Afya Duniani (WHO) kwa kushirikiana na wadau mbalimbali leo wamezindua mpango mpya wa kimataifa wa kukabiliana na matatizo ya shinikizo la juu la damu wakati wa ujauzito ambayo huathiri mamilioni ya wanawake duniani kote kila mwaka. Shinikizo la damu huweza kusababisha kudhurika kwa viungo vya mwili hasa figo ambapo mpango husika utaleta pamoja utafiti, dawa, mwongozo wa kitabibu, mifumo ya afya na hatua za kisiasa ili kuhakikisha nafasi ya mwanamke kuishi salama wakati wa ujauzito na kujifungua mtoto haiamuliwi na mahali anapoishi. • Nasalia na afya ambapo leo ikiwa ni siku ya uoni duniani, WHO inakumbusha apu yake ya kuchunguza macho ambapo mtu anaweza kutumia simu janja kujifanyia uchunguzi wa awali kabla ya kwenda kwa mtaalamu wa macho ili kubaini iwapo macho yake yako salama au la, na kisha kuwahi hospitali. Apu hiyo inaitwa WHOeyes, na ni bure huko App Store au Google Store. WHO inasema uchunguzi wa mapema huepusha uharibifu mkubwa zaidi wa macho. • Na hatimaye huko kwenye maeneo ya ndani zaidi huko Sudan Kusini, ujumbe wa Umoja wa Mataifa wa kulinda amani nchini humo, UNMISS unasaidia vijana kuachana na magenge ya uhalifu ili waweze kujenga upya maisha yao kupitia mipango mipya. Cephus Diggs ambaye Afisa wa UNMISS akihusika na ulinzi anasema, “tuliweza kuwaleta pamoja viongozi wa makundi mbalimbali ya magenge, wakiwemo wasichana waliokuwa kwenye magenge. Kwa sasa, tunajihusisha na shughuli za ukaushaji wa samaki kwa kutumia moshi ili waweze kunufaika na shughuli hizo na kufikiria upya namna ya kushiriki katika shughuli zenye manufaa, badala ya kukaa tu au kuzurura kambini na kuwashambulia watu.” Mwenyeji wako ni Assumpta Massoi, karibu!

Hii leo jaridani tunakuletea kipindi maalumu cha mahojiano yanayozingatia tangazo la jana kutoka serikali ya Kenya ya kwamba mtu mmoja amekufa kwa ugonjwa wa Ebola ya virusi vya Bundibugyo nchini humo. Kufuatia tangazo hilo Assumpta Massoi wa Idhaa ya Kiswahili ya Umoja wa Mataifa jijini Nairobi, Kenya amezungumza na Mwakilishi wa shirika la Umoja wa Mataifa la Afya duniani,(WHO) nchini humo Dkt. Neema Rusibamayila Kimambo kufahamu kinachoendelea. Kwanza anaanza kwa kuelezea wanachofahamu kuhusu mgonjwa huyo aliyefariki dunia. Mwenyeji wako ni Flora Nducha, karibu!