Advertise on podcast: Noss chors

Il dirigent e chantadur engiadinais dat in sguard enavos sin sia lavur cun differents chors ch'el ha manà. L'emissiun porta in bouquet da chanzuns interpretadas da differents chors da l'Engiadina - tuns da La Cumbricula, il Rudè da chant, Las Filomelas sco era inquals auters chors che Jachen Janett ha dirigì.

Chantaduras e chantadurs han rimnà tuns e suns da chor. Il chor mischedau Rueun-Siat datti dapi l'onn 2006. Quest chor sa deditgescha adina puspè a projects da chant cun tempra innovativa. Tar lur project actual cun concerts als 24 e 25 october 2026 chanta il chor sursilvan differenta musica da film.

Da musica tradiziunala a melodias pli modernas: Marco Nay ha rimnà chanzuns preferidas. Noss emprendist Marco Nay, che abita a Danis/Tavanasa, ha tschernì ina selecziun da chanzuns da chor che han per el ina muntada speziala. El preschenta differentas melodias e raquinta da regurdientschas e colliaziuns cun las chanzuns.

Chantaduras e chantadurs han creà in'emissiun plain variaziun. La Cumbricula è ina furmaziun vocala pitschna cun chantaduras e chantadurs da l'Engiadina. Quest chor è vegnì fundà la fin da la stad 1998, là sut la direcziun da Jachen Janett. Oz è Selina Bontognali la manadra musicala da quest chor. L'emsemble sa deditgescha a litteratura a capella da tut different gener.

Il chor da project dal Surses ha rimnà chanzuns preferidas. Cantastic è in chor da project dal Grischun Central. Il chor sa deditgescha a chanzuns da fitg different gener - i vegnan chantadas chanzuns popularas sco era arranschaments da pop. La manadra musicala da questa furmaziun è Maria Capeder.

In'ura cun in massa tuns rumantschs. Kontra.cant è in ensemble vocal grischun ch'è vegnì fundà il 2012 da Flavio Bundi. Oriundamain è el naschì per in project da chant da Nadal. L'ensemble da project sa cumpona da chantaduras e chantadurs motivads da differentas regiuns dal Grischun.

Il musicist e dirigent, oriund da la Surselva, ha rimnà chanzuns. Willi Derungs ha tranter auter fundà il Canto Classico, l'Orchestra Classica ed il Novocanto. El sa deditgescha a musica da la renaschentscha fin a la musica contemporana ed ha er adina puspè dà paisa da preschentar ovras betg uschè deresadas ed enconuschentas.

Chantaduras e chantadurs han rimnà chanzuns. Il chor cecilian Glion è vegnì fundà l'onn 1893. Il chor che sa deditgescha principalmain a musica sacrala enramescha onn per onn numerusas festas ecclesiasticas.

Differentas chantaduras han rimnà chanzuns da tut gener. Frestg, orientà al tun e multifar - quai è il Damenchor Chursüd. Cun ina gronda purziun passiun e plaschair dechantan las dunnas sper chanzuns popularas era litteratura spirituala e classica da chors da dunnas sco era chanzuns da pop e rock e sa laschan gugent en sin in u l'auter experiment musical.

In'ura cun ina massa chant da chor viril. Il chor viril Breil è in chor viril da tradiziun da la Surselva cun ragischs fin l'onn 1901. Suenter il focus inizial sin chant sacral sa deditgescha il chor oz surtut a musica da chor profana, surtut era a chanzuns rumantschas. Cun numerusas preschentaziuns e la tgira dal possess da chanzuns regiunalas è el fin oz ina part impurtanta da la vita culturala a Breil.

Chantaduras e chantadurs han rimnà da tuttas sorts chanzuns. Consonus vokalensemble è in ensemble vocal svizzer che realisescha projects cun chantaduras e chantadurs cun experientscha. La furmaziun interpretescha musica da chor en tuttas colurs. Il dirigent da quest chor è Mauro Ursprung ch'è creschì si a Cuira.

Noss chors porta ils giavischs musicals dal Chor mischedau Vignogn. Cun grond engaschi e plaschair chantan las dunnas ed ils umens da Vignogn e conturn en il chor. Dapi radund dus onns diregia Annette Stopp il chor. Ella deriva da la Bassa ed ha emprendì rumantsch. Ils giavischs musicals da chantaduras e chantadurs portan in'ura curturella e divertiment, magari er in zic nostalgia.

Il chor maschadà da Danis-Tavanasa festivescha quest onn giubileum da 20 onns. Sper il concert per l'onn da giubileum cun novas chanzuns rumantschas han chantaduras e chantadurs dal chor Uvriu giavischà chanzuns da tuttas sorts. Ordlunder hai dà in'emissiun da chant da tuttas coluras, spartas e geners. In'ura divertenta che fa buna luna e porta curturella.

Chantadurs e chantaduras han rimnà chanzuns en tuttas colurs. Il Cor masdà Tschlin datti dapi la fin dal 19. tschientaner. Enfin oz enramescha la furmaziun differentas occurenzas dal vitg cun tuns vocals.